मुर्तीजापुर प्रतिनिधी :
मुर्तीजापुर शहर आणि तालुक्यात आजपासून उच्च माध्यमिक प्रमाणपत्र (HSC) म्हणजेच बारावीच्या परीक्षेला उत्साहात सुरुवात झाली. पहिल्याच दिवशी झालेला इंग्रजी विषयाचा पेपर अत्यंत शिस्तबद्ध, भयमुक्त आणि कॉपीमुक्त वातावरणात पार पडल्याने विद्यार्थ्यांसह पालक आणि प्रशासनाने समाधान व्यक्त केले आहे. तालुक्यातील एकूण आठ परीक्षा केंद्रांवर जवळपास दोन हजार विद्यार्थ्यांनी परीक्षेला हजेरी लावली.
शासनाच्या मार्गदर्शक सूचनांनुसार सर्व परीक्षा केंद्रांवर काटेकोर नियोजन करण्यात आले होते. प्रत्येक केंद्रावर सीसीटीव्ही कॅमेरे बसविण्यात आले असून परीक्षेच्या प्रत्येक टप्प्यावर बारकाईने देखरेख ठेवण्यात आली. केंद्र परिसरात अनावश्यक गर्दी होऊ नये यासाठीही विशेष खबरदारी घेण्यात आली होती.
मुर्तीजापुरातील गाडगे महाराज ज्युनिअर कॉलेज, भारतीय महिला महाविद्यालय, गाडगे महाराज महाविद्यालय ही शहरातील प्रमुख केंद्रे असून ग्रामीण भागात अनंतराव देशमुख विद्यालय (हिरपूर), जे.एम. टेकाडे ज्युनिअर कॉलेज (कुरूम), सुनील राठोड ज्युनिअर कॉलेज (दहातोंडा), स्वामी विवेकानंद ज्युनिअर कॉलेज (मंगरूळ कांबे) आणि अनवर उर्दू हबीबिया ज्युनिअर कॉलेज (माना) येथे परीक्षेचे आयोजन करण्यात आले आहे.
Related News
कोरपना तालुक्यात 1525 विद्यार्थी देणार बारावीची परीक्षा; सहा केंद्रांवर सीसीटीव्ही व बैठे पथकाची निगराणी
उमरी अरबजवळ भीषण अपघात; कारंजा येथील दोन तरुणांचा मृत्यू, चार गंभीर जखमी
मूर्तिजापूर नगरपरिषद उपाध्यक्ष आणि ३ स्वीकृत सदस्यांच्या निवडीकडे शहराचे लक्ष
रेल्वेतून पडून अज्ञात इसमाचा दुर्दैवी मृत्यू
३० वर्षांनंतर उजळल्या महाविद्यालयीन आठवणी ‘स्नेहबंध १९९५’ गेट-टुगेदर उत्साहात संपन्न
मूर्तिजापूरचे ‘देवदूत’ डॉक्टर गौरव गोसावी यांचे निधन
अवैध हातभट्टी दारू विक्रेत्यावर धडक कारवाई –16 हजारांचा मुद्देमाल जप्त,आरोपी ताब्यात!
आज झालेल्या इंग्रजी विषयाच्या पहिल्या पेपरसाठी एकूण १,९४८ विद्यार्थी उपस्थित होते. विशेष म्हणजे परीक्षेदरम्यान कॉपी किंवा गैरप्रकाराची एकही घटना समोर आली नाही. कोणत्याही विद्यार्थ्यावर कारवाई करावी लागली नसल्याने परीक्षा व्यवस्थापनाच्या दृष्टीने हा दिवस यशस्वी ठरला आहे.
या परीक्षेसाठी गटशिक्षणाधिकारी (मुर्तीजापुर) कुमारी वैशाली रामटेके या परिरक्षक म्हणून कार्य पाहत असून उपपरिरक्षक म्हणून मोहम्मद इब्राहिम अली यांची नियुक्ती करण्यात आली आहे. त्यांच्या मार्गदर्शनाखाली प्रश्नपत्रिकांचे सुरक्षित वितरण करण्यात आले. परिरक्षक केंद्र, मुर्तीजापुर येथून नऊ रनरच्या माध्यमातून सर्व केंद्रांवर वेळेत प्रश्नपत्रिका पोहोचविण्यात आल्या.
परीक्षा सुरळीत आणि कॉपीमुक्त पार पडावी यासाठी जिल्हाधिकारी यांच्या मार्गदर्शनाखाली तसेच शिक्षणाधिकारी (माध्यमिक व प्राथमिक) यांच्या निर्देशनानुसार उपविभागीय अधिकारी संदीप अपार आणि तहसीलदार शिल्पा बोबडे यांनी भरारी पथक व बैठे पथकाचे योग्य नियोजन केले आहे. या पथकांनी केंद्रांवर वेळोवेळी भेट देत परिस्थितीचा आढावा घेतला.
सुरक्षेच्या दृष्टीने शहर व ग्रामीण पोलिस ठाण्यांकडून सर्व परीक्षा केंद्रांवर चोख बंदोबस्त ठेवण्यात आला होता. केंद्र संचालक आणि त्यांच्या सहकारी टीमनेही विद्यार्थ्यांना कोणताही ताण येऊ नये यासाठी आवश्यक सुविधा उपलब्ध करून दिल्या. परीक्षा केंद्रांवर वेळेआधीच विद्यार्थी दाखल होत असल्याचे चित्र दिसून आले.
ही उच्च माध्यमिक परीक्षा १८ मार्चपर्यंत चालणार असून परिरक्षक केंद्रात परीक्षा प्रक्रियेसाठी एकूण २० कर्मचारी कार्यरत आहेत. पहिल्याच दिवशी परीक्षा शांत आणि नियोजनबद्ध वातावरणात पार पडल्याने पुढील पेपरही अशाच पद्धतीने सुरळीत होतील, असा विश्वास प्रशासनाने व्यक्त केला आहे. एकंदरीत, इंग्रजीच्या पहिल्या पेपरने विद्यार्थ्यांच्या परीक्षेच्या प्रवासाची सकारात्मक सुरुवात झाली आहे.
read also : https://ajinkyabharat.com/mahagaichya-jhala-fifteen-hundred-rupees-how-baseless-is-the-world/
