उष्णतेपासून दिलासा शोधताना काळाचा घाला; तीन वेगवेगळ्या घटनांमध्ये सहा निष्पाप जीवांचा अंत
राज्यात वाढत्या उष्णतेमुळे नागरिक पाणवठे, धरणे, नदीकाठ आणि हौदांमध्ये पोहण्यासाठी जात असताना दुर्दैवी घटनांमध्ये वाढ होताना दिसत आहे. सोमवारी राज्यातील अमरावती, नाशिक आणि अहिल्यानगर जिल्ह्यात घडलेल्या तीन वेगवेगळ्या घटनांमध्ये एकूण सहा जणांचा पाण्यात बुडून मृत्यू झाल्याने हळहळ व्यक्त होत आहे. यामध्ये अमरावती जिल्ह्यातील तीन सख्ख्या भावंडांचा मृत्यू सर्वाधिक हृदयद्रावक ठरला असून संपूर्ण परिसर शोकसागरात बुडाला आहे.
अमरावतीत तीन सख्ख्या भावंडांचा पुसली धरणात बुडून मृत्यू
अमरावती जिल्ह्यातील वरुड तालुक्यात ही अत्यंत दुर्दैवी घटना घडली. पुसली धरण परिसरात तीन सख्खी भावंडे पाण्यात बुडाल्याने त्यांचा जागीच मृत्यू झाला. पंकज संतुलाल उईके (वय 10), प्रिया संतुलाल उईके (वय 8) आणि पवन संतुलाल उईके (वय 7) अशी मृत मुलांची नावे आहेत.
मिळालेल्या माहितीनुसार, संतुलाल उईके हे मनोहर निमकर यांच्या शेतातील झोपडीत वास्तव्यास होते. त्यांची तीनही मुले नरखेड येथील आश्रमशाळेत शिक्षण घेत होती. सुट्टीमुळे ही मुले घरी आली होती. दुपारच्या सुमारास ही तिघेही मुले पुसली धरण परिसरात गेली. आंघोळ करण्यासाठी किंवा मासेमारीसाठी ते पाण्यात उतरल्याचा अंदाज व्यक्त केला जात आहे.
Related News
अभिजीत दिपकेंच्या भेटीवरून महायुतीत खळबळ! शिंदेंनी संजय शिरसाट, बच्चू कडूंना झापलं?
शिवसेनेचं चिन्ह आपल्यालाच मिळणार; नाही मिळालं तर गोठवलं जाईल, उद्धव ठाकरेंचं मोठं विधान
मात्र बराच वेळ घरी परत न आल्याने कुटुंबीयांनी शोधाशोध सुरू केली. त्यानंतर धरण परिसरात मुलांचे कपडे आणि इतर वस्तू आढळून आल्याने संशय बळावला. स्थानिक नागरिक आणि प्रशासनाच्या मदतीने शोधमोहीम राबवण्यात आली असता तिन्ही मुलांचे मृतदेह पाण्यातून बाहेर काढण्यात आले.
एकाच कुटुंबातील तीन निष्पाप मुलांचा मृत्यू झाल्याने गावात शोककळा पसरली आहे. उईके कुटुंबावर दुःखाचा डोंगर कोसळला असून परिसरातील नागरिकांनी हळहळ व्यक्त केली आहे.
नाशिकमध्ये दोन चिमुकले भावंडे पाण्याच्या खड्यात बुडाली
नाशिक जिल्ह्यातील सुरगाणा तालुक्यातील बोरगावजवळ चिखली येथे आणखी एक हृदयद्रावक घटना घडली. घराजवळ खेळत असताना दोन चिमुकली भावंडे पाण्याने भरलेल्या खड्यात पडल्याने त्यांचा मृत्यू झाला.
दर्शन जगदीश भोये (वय 4) आणि तन्मय निलेश भोये (वय 3) अशी मृत बालकांची नावे आहेत. सकाळच्या सुमारास दोन्ही मुले घराजवळ खेळत होती. परिसरात घर बांधकामासाठी पाणी साठवण्यासाठी मोठा खड्डा खोदण्यात आला होता. या खड्ड्यात पाणी साचलेले होते.
खेळता खेळता दोन्ही मुले त्या पाण्याच्या खड्यात पडली. काही वेळाने मुलांचा आवाज बंद झाल्याने कुटुंबीयांनी शोध सुरू केला. त्यावेळी दोन्ही मुले पाण्यात आढळून आली. ग्रामस्थांच्या मदतीने त्यांना तातडीने बाहेर काढून बोरगाव प्राथमिक आरोग्य केंद्रात नेण्यात आले. मात्र वैद्यकीय अधिकाऱ्यांनी तपासणीनंतर दोघांनाही मृत घोषित केले.
या घटनेनंतर संपूर्ण गावावर शोककळा पसरली आहे. इतक्या लहान वयात दोन भावंडांचा मृत्यू झाल्याने कुटुंबीयांचा आक्रोश पाहून उपस्थितांचे डोळे पाणावले.
अहिल्यानगरमध्ये प्रवरा नदीत 14 वर्षीय मुलाचा मृत्यू
अहिल्यानगर जिल्ह्यातील कोल्हार परिसरात प्रवरा नदीत बुडून 14 वर्षीय मुलाचा मृत्यू झाल्याची घटना समोर आली आहे. दिनेश नितीन जाधव असे मृत मुलाचे नाव आहे.
माहितीनुसार, दिनेश हा आपल्या आई-वडिलांसोबत नदीकाठी गेला होता. नदीत उतरल्यावर त्याला पाण्याच्या खोलीचा अंदाज आला नाही आणि तो खोल पाण्यात गेला. काही क्षणातच तो पाण्यात बुडाला. कुटुंबीयांनी आरडाओरडा करत मदतीसाठी हाक मारली, मात्र तोपर्यंत उशीर झाला होता.
घटनेची माहिती मिळताच राहाता, शिर्डी आणि श्रीरामपूर नगरपालिकेच्या आपत्कालीन पथकांनी शोधमोहीम सुरू केली. तब्बल 19 तासांच्या अथक प्रयत्नांनंतर दिनेशचा मृतदेह नदीपात्रातून बाहेर काढण्यात आला.
या घटनेमुळे परिसरात हळहळ व्यक्त होत असून नदीकाठच्या सुरक्षेबाबत प्रश्न उपस्थित केले जात आहेत.
वाढत्या उष्णतेत पाणवठ्यांजवळ सावधगिरीची गरज
राज्यात सध्या अनेक ठिकाणी तापमान 45 अंशांच्या पुढे गेले आहे. त्यामुळे नागरिक, विशेषतः लहान मुले नदी, धरण, तलाव आणि हौदांमध्ये पोहण्यासाठी जात आहेत. मात्र अशा ठिकाणी सुरक्षा व्यवस्था नसल्याने दुर्घटनांचा धोका वाढत आहे.
तज्ज्ञांच्या मते, पालकांनी मुलांवर सतत लक्ष ठेवणे गरजेचे आहे. तसेच धरणे, खोल नदीपात्रे किंवा पाण्याने भरलेले खड्डे याठिकाणी चेतावणी फलक लावणे आणि संरक्षण जाळी बसवणे आवश्यक आहे. प्रशासनानेही अशा ठिकाणी नियमित गस्त वाढवण्याची मागणी नागरिकांकडून केली जात आहे.
या सलग घटनांमुळे संपूर्ण राज्यभरातून दुःख व्यक्त केले जात असून मृतांच्या कुटुंबियांवर शोककळा पसरली आहे.
