रत्नागिरी-सातारा अंतर ५० किमीने कमी! कोकण-पश्चिम महाराष्ट्राला जोडणारा भव्य पूल उद्घाटनाच्या प्रतीक्षेत
रत्नागिरी : कोकण आणि पश्चिम महाराष्ट्र यांच्यातील प्रवास आता अधिक वेगवान, सोयीस्कर आणि रोमांचक होणार आहे. रत्नागिरी जिल्ह्यातील खेड आणि सातारा जिल्ह्यातील महाबळेश्वर यांना जोडणाऱ्या बहुप्रतिक्षित केबल स्टेड पुलाचे काम पूर्ण झाले असून, पावसाळ्यानंतर हा पूल नागरिकांसाठी खुला करण्यात येणार आहे. तब्बल १७५ कोटी रुपये खर्चून उभारण्यात आलेल्या या प्रकल्पामुळे रत्नागिरी ते सातारा दरम्यानचे अंतर जवळपास ५० किलोमीटरने कमी होणार आहे.
विशेष म्हणजे, पश्चिम महाराष्ट्रात उभारण्यात आलेला हा पहिलाच केबल स्टेड पूल असून त्याची तुलना मुंबईतील वरळी सी-लिंकशी केली जात आहे. या पुलामुळे कोकण आणि पश्चिम महाराष्ट्र यांच्यातील दळणवळण अधिक मजबूत होणार असून पर्यटन आणि उद्योग क्षेत्रालाही मोठी चालना मिळण्याची अपेक्षा व्यक्त होत आहे.
Related News
मोठी राजकीय घडामोड! शिवसेनेत प्रवेशानंतर आनंद परांजपे थेट शरद पवारांच्या सिल्व्हर ओकवर
तमिळनाडू निवडणुकीत मोठा घोटाळा! 10 विदेशी नागरिक अटकेत; विजय सरकारसमोर मोठं आव्हान
Mumbai News: 418 कोटींचा भव्य केबल-स्टेड पूल; ओशिवारा-गोरेगाव प्रवास होणार सिग्नलमुक्त
बच्चू कडूंचा मोठा दावा! ‘आज सर्व्हे झाला तर मुख्यमंत्रीपदासाठी एकनाथ शिंदेंनाच सर्वाधिक पसंती’; महाराष्ट्राच्या राजकारणात खळबळ
‘ब्यूटी पार्लर ते हेलिकॉप्टर बिल’; अजित पवार गटात नेमकी ती महिला कोण?
साताऱ्यातील बिचुकले गावाचा भन्नाट प्रयोग! प्रत्येक घरावर ‘चांगलं चाललंय’; 5 सवयी बदलू शकतात तुमचं आयुष्य
‘हे हास्यास्पद आणि धक्कादायक!’ अविनाश आदिकांचा इशारा; तटकरे-पटेल प्रकरणात कायदेशीर कारवाईचे संकेत
“सुनील तटकरे प्रदेशाध्यक्षच राहणार”, राष्ट्रवादीची पत्रकार परिषद; रोहित पवारांवर गंभीर आरोप
Sergey Lavrov : ‘…नाहीतर सुरक्षा रक्षक बंदूक काढतील!’ दिल्लीतील पत्रकार परिषदेत रशियाच्या मंत्र्यांचा संताप; व्हिडिओ व्हायरल
कसा आहे हा भव्य पूल?
तापोळा ते गाढवली आहिर या मार्गावर उभारण्यात आलेला हा पूल तब्बल ५४० मीटर लांबीचा आणि १४ मीटर रुंदीचा आहे. पुलाच्या मध्यभागी ४३ मीटर उंचीची आकर्षक व्ह्यू गॅलरी तयार करण्यात आली आहे. या गॅलरीतून पर्यटकांना कोयना धरणातील बॅकवॉटर, सह्याद्री पर्वतरांगांचे दृश्य तसेच सूर्योदय आणि सूर्यास्ताचे मनमोहक दृश्य पाहता येणार आहे.
पर्यटकांच्या सुविधेसाठी येथे कॅप्सुल लिफ्टची सुविधा उपलब्ध करून देण्यात येणार आहे. तसेच दोन्ही बाजूंनी जिन्याची सोयही करण्यात आली आहे. त्यामुळे हा पूल केवळ वाहतुकीसाठीच नाही तर पर्यटनाचे मोठे आकर्षण ठरणार आहे.
प्रवास होणार अधिक सोपा
सध्या रत्नागिरीहून महाबळेश्वर किंवा साताऱ्याकडे जाण्यासाठी पोलादपूरच्या आंबेनळी घाटमार्गाचा वापर करावा लागतो. मात्र या नव्या पुलामुळे खेड तालुक्यातील रघुवीर घाटमार्गातून थेट तापोळा मार्गे महाबळेश्वर आणि पुढे साताऱ्याकडे जाता येणार आहे. त्यामुळे प्रवासाचा वेळ आणि अंतर दोन्ही कमी होणार आहेत.
विशेषतः पावसाळ्यात घाटमार्ग धोकादायक ठरत असल्याने वाहनचालकांना मोठा त्रास सहन करावा लागत होता. आता या पुलामुळे सुरक्षित आणि जलद प्रवासाचा पर्याय उपलब्ध होणार आहे.
पर्यटनाला मिळणार मोठी चालना
महाबळेश्वर, तापोळा, कोयना बॅकवॉटर आणि कोकण किनारपट्टी ही महाराष्ट्रातील लोकप्रिय पर्यटनस्थळे आहेत. नव्या पुलामुळे या भागांमध्ये पर्यटकांची संख्या मोठ्या प्रमाणात वाढण्याची शक्यता आहे. व्ह्यू गॅलरी हे या पुलाचे सर्वात मोठे आकर्षण ठरणार आहे.
कोयना धरणातील विस्तीर्ण जलाशय, हिरव्यागार डोंगररांगा आणि धुक्याने वेढलेला परिसर पर्यटकांना अनोखा अनुभव देणार आहे. स्थानिक व्यवसाय, हॉटेल उद्योग आणि पर्यटनाशी संबंधित छोट्या उद्योजकांनाही याचा मोठा फायदा होणार आहे.
आणखी ३०० कोटींचा पूल उभारणीच्या मार्गावर
दरम्यान, सातारा जिल्ह्यातील दरे गाव आणि कोयना खोऱ्यातील बामणोली गाव यांना जोडणारा आणखी एक महत्त्वाकांक्षी पूलही उभारण्यात येत आहे. तब्बल ३०० कोटी रुपये खर्चाच्या या प्रकल्पामुळे कोयना आणि खांदाटी खोऱ्यातील नागरिकांचा प्रवास अधिक सुरक्षित आणि सुलभ होणार आहे.
सध्या पावसाळ्यात नागरिकांना कोयना बॅकवॉटरमधून बार्जच्या सहाय्याने प्रवास करावा लागतो. हा प्रवास अनेकदा धोकादायक ठरत असल्याने स्थानिक नागरिकांकडून कायमस्वरूपी पुलाची मागणी केली जात होती.
शिंदे सरकारकडून प्रकल्पाला गती
हा पूल प्रकल्प युती सरकारच्या काळात प्रस्तावित करण्यात आला होता. तत्कालीन मुख्यमंत्री मनोहर जोशी यांच्या कार्यकाळात याची संकल्पना मांडण्यात आली होती. मात्र नंतर अनेक वर्षे हा प्रकल्प रखडला होता. मुख्यमंत्री झाल्यानंतर एकनाथ शिंदे यांनी या कामाला गती दिली आणि आता हा पूल पूर्णत्वास आला आहे.
अलीकडेच उपमुख्यमंत्री एकनाथ शिंदे यांनी या पुलाच्या कामाची पाहणी केली होती. सार्वजनिक बांधकाम विभागाचे अभियंता अजय देशपांडे यांनी दिलेल्या माहितीनुसार, पुलाचे मुख्य काम पूर्ण झाले असून व्ह्यू गॅलरीचे अंतिम टप्प्यातील काम सुरू आहे.
स्थानिकांसाठी विकासाची नवी संधी
या पुलामुळे केवळ वाहतूक सुधारणा होणार नाही तर कोकण आणि पश्चिम महाराष्ट्रातील आर्थिक देवाणघेवाणही वाढणार आहे. शेतीमाल, मत्स्यव्यवसाय, पर्यटन आणि लघुउद्योगांना याचा थेट फायदा होणार आहे.तसेच दुर्गम भागातील नागरिकांना आरोग्य, शिक्षण आणि रोजगाराच्या सुविधा अधिक सहज उपलब्ध होतील. त्यामुळे हा पूल महाराष्ट्राच्या विकासातील महत्त्वाचा टप्पा मानला जात आहे.
