मूर्तिजापूर प्रतिनिधी : एकात्मिक समाज शिक्षण प्रसारक मंडळ गांधीग्राम द्वारा संचालित श्री शंकर विद्यालय येथे इयत्ता दहावीच्या विद्यार्थ्यांचा निरोप समारंभ शनिवार, दि. १४ फेब्रुवारी २०२६ रोजी अत्यंत उत्साहपूर्ण आणि भावूक वातावरणात पार पडला. कार्यक्रमादरम्यान विद्यार्थ्यांच्या चेहऱ्यावर पुढील वाटचालीची उमेद दिसत होती, तर शिक्षक व पालकांच्या डोळ्यांत अभिमान आणि भावनांचा संगम पाहायला मिळाला.
कार्यक्रमाच्या अध्यक्षस्थानी शाळेचे संस्थापक अध्यक्ष विनायक भुईभार होते. प्रमुख पाहुणे म्हणून महाराष्ट्रातील प्रसिद्ध हास्यकवी भटकर, सामाजिक कार्यकर्ते मधुकरराव गोपनारायण तसेच पोलीस पाटील राजाभाऊ कानकिरड यांची विशेष उपस्थिती लाभली. कार्यक्रमाच्या प्रारंभी शाळेच्या वतीने सर्व मान्यवरांचे पुष्पहार देऊन स्वागत करण्यात आले.
प्रास्ताविकात मुख्याध्यापक तायडे यांनी विद्यार्थ्यांना मार्गदर्शन करताना “संघर्षाशिवाय यश मिळत नाही. कठोर परिश्रम आणि चिकाटीच्या जोरावरच उज्ज्वल भविष्य घडते,” असा प्रेरणादायी संदेश दिला. तसेच येऊ घातलेल्या दहावीच्या परीक्षेसाठी सर्व विद्यार्थ्यांना मनःपूर्वक शुभेच्छा दिल्या.
Related News
ग्रामीण भागातील विद्यार्थ्यांशी साधला संवाद ; अर्थशास्त्र विभागाची जिल्हा परिषद शाळेला शैक्षणिक भेट
काजळेश्वरमध्ये हरिनाम संकीर्तनाचा गजर ; उत्कर्ष फाउंडेशनचा कीर्तन सोहळा उत्साहात संपन्न
अकोट येथील सांस्कृतिक कलाभवनात जिल्हा ग्रंथोत्सवाचा उत्साहात शुभारंभ संपन्न झाला
मूर्तिजापूरमध्ये बेपत्ता इसमाचा कुजलेल्या अवस्थेतील मृतदेह सापडला
पुंडा येथील श्री नंदिकेश्वर विद्यालयात दहावीच्या विद्यार्थ्यांना निरोप समारंभ उत्साहात संपन्न
प्रसन्न मन हेच सर्व सिद्धीचे कारण – प्रिया पानझाडे
महाविद्यालयात नव्या संधींसाठी विद्यार्थ्यांचे मार्गदर्शन कार्यक्रम
हिवरखेड पोलीस स्टेशनसह ठिकठिकाणी प्रजासत्ताक दिन साजरा
मूर्तिजापूर नगर परिषद स्थायी व विषय समित्यांची निवडणूक अविरोध संपन्न
रोटरी क्लब ऑफ अकोटतर्फे ‘युथ मंथ’ उत्साहात साजरा
हास्यकवी भटकर यांनी आपल्या खुसखुशीत शैलीत विद्यार्थ्यांचे मन जिंकले. विनोदातून जीवनातील सकारात्मकतेचे महत्त्व अधोरेखित करत त्यांनी विद्यार्थ्यांना आत्मविश्वासाने पुढे जाण्याचा सल्ला दिला. सामाजिक कार्यकर्ते मधुकरराव गोपनारायण यांनी शालेय जीवनात मिळालेले संस्कार आणि शिस्त आयुष्यभर जपावीत व त्यांचा उपयोग समाजाच्या भल्यासाठी करावा, असे आवाहन केले.
पोलीस पाटील राजाभाऊ कानकिरड यांनी विद्यार्थ्यांना प्रामाणिकपणा, जबाबदारी आणि ध्येयवादी वृत्ती यांचे महत्त्व पटवून देत यशस्वी भविष्यासाठी शुभेच्छा दिल्या. वर्गशिक्षक गायकवाड यांनी “शाळेने दिलेले संस्कार जोपासा आणि आपल्या कर्तृत्वाने कुटुंब व गावाचे नाव उज्ज्वल करा,” अशा शब्दांत विद्यार्थ्यांना प्रोत्साहित केले.
समारंभात दहावीच्या विद्यार्थ्यांनी शाळेतील आठवणींना उजाळा देत आपले मनोगत व्यक्त केले. शिक्षकांचे मार्गदर्शन, मित्रमैत्रिणींसोबत घालवलेले क्षण आणि विविध उपक्रमांची आठवण सांगताना अनेक विद्यार्थी भावूक झाले. नववीच्या विद्यार्थ्यांनीही आपल्या वरिष्ठांना निरोप देताना त्यांच्या पुढील शैक्षणिक वाटचालीसाठी शुभेच्छा दिल्या. यामुळे कार्यक्रमात एकाच वेळी आनंद आणि विरहाचे वातावरण निर्माण झाले होते.
या कार्यक्रमास गावातील प्रतिष्ठित नागरिक बबनराव इंगळे, अरविंद दादा तळोकार, बाळाभाऊ बढे आणि अमोल देवके यांच्यासह शाळेतील ज्येष्ठ शिक्षक मांजरे, शिक्षिका शाहीन शेख व विजया गिरी उपस्थित होत्या. त्यांच्या उपस्थितीमुळे कार्यक्रमाची शोभा अधिकच वाढली.
कार्यक्रमाचे सूत्रसंचालन इयत्ता नववीची विद्यार्थिनी श्रावणी राऊत आणि कु. सृष्टी तळोकार यांनी आत्मविश्वासपूर्ण पद्धतीने केले, तर आभार प्रदर्शन कु.लक्ष्मी शेगर हिने मानले. संपूर्ण कार्यक्रमाचे नियोजन शिक्षक व विद्यार्थ्यांच्या सहकार्याने सुरळीत पार पडले.
उत्साह, मार्गदर्शन आणि आठवणींनी सजलेला हा निरोप समारंभ विद्यार्थ्यांच्या शालेय जीवनातील अविस्मरणीय ठरला असून, नवीन स्वप्ने आणि ध्येय घेऊन पुढे जाण्यासाठी त्यांना प्रेरणा देणारा ठरला.
READ ALSO :https://ajinkyabharat.com/sand-mining-by-boat-in-janori-melghat/
