पुणेकरांसाठी मोठी खुशखबर
पुणे शहरातील नागरिक गेल्या अनेक महिन्यांपासून हिंजवडी ते शिवाजीनगर मेट्रो मार्गाची आतुरतेने वाट पाहत आहेत. अखेर आता या प्रकल्पाबाबत महत्त्वाचे अपडेट समोर आले आहे. पुणे मेट्रो 3 अर्थात पिंक लाइनचा पहिला टप्पा जून 2026 अखेर सुरू होण्याची शक्यता व्यक्त करण्यात आली आहे. या प्रकल्पामुळे आयटी हब हिंजवडी आणि पुण्याच्या मध्यवर्ती शिवाजीनगर परिसरातील प्रवास अधिक जलद, सुरक्षित आणि सुलभ होणार आहे.
23.23 किलोमीटर लांबीच्या या उन्नत मेट्रो मार्गामुळे पुण्यातील वाहतूक कोंडी कमी होण्यास मोठी मदत मिळणार आहे. विशेष म्हणजे, शिवाजीनगर येथे पुण्यातील इतर दोन मेट्रो मार्गांशी जोडणी मिळणार असल्याने ‘ट्रिपल कनेक्टिव्हिटी’ निर्माण होणार आहे.
अनेक महिन्यांपासून रखडलेला प्रकल्प
हिंजवडी-शिवाजीनगर मेट्रो प्रकल्प गेल्या अनेक महिन्यांपासून चर्चेत आहे. सुरुवातीला हा मार्ग मार्च 2026 मध्ये सुरू होईल अशी माहिती देण्यात आली होती. त्यानंतर उद्घाटनाची तारीख मे महिन्यापर्यंत पुढे ढकलण्यात आली. आता नवीन माहितीनुसार, जून महिन्याच्या अखेरीस पहिला टप्पा सुरू होण्याची शक्यता आहे.
Related News
मुंबईतील पहिल्या भुयारी बोगद्याला वेग! 250 मीटर खोदकाम पूर्ण; 40 मिनिटांचा प्रवास आता फक्त 5 मिनिटांत
Nagpur News : पत्नीसोबत सतत वाद, पतीचा मानसिक तोल ढासळला; 5व्या मजल्याच्या सज्जावर अडकला, थरारक रेस्क्यू
मोठी बातमी! भोंदू खरात प्रकरणात रोहित पवारांचा सर्वात मोठा गौप्यस्फोट; “पैसे घेऊन अनेकांना बाहेर काढलं जातंय”
धक्कादायक घटना! पोहण्याचा अनुभव असूनही विहिरीच्या खोल पाण्याचा अंदाज चुकला, तरुणाचा अंत
दहावीत सर्व विषयांत 35 मार्क्स; सांगलीच्या गजूभाईची सोशल मीडियावर जोरदार चर्चा, गावात लागले बॅनर
Mumbai News: मुंबईकरांसाठी दिलासादायक बातमी! ‘गोरेगाव-मुलुंड लिंक रोड’चा पहिला टप्पा जूनपूर्वी सुरू; 12.2 किमी प्रकल्पामुळे ट्रॅफिकमधून मोठी सुटका
धक्कादायक आकडा! महाराष्ट्रात रेल्वे प्रवास सर्वाधिक धोकादायक; NCRB च्या अहवालात 20,519 गुन्ह्यांची नोंद
तथापि, नागरिकांना पूर्ण कॉरिडॉरचा लाभ तात्काळ मिळणार नाही. सुरुवातीला केवळ 12 स्थानकांदरम्यान मेट्रो सेवा सुरू केली जाणार आहे. उर्वरित स्थानकांचे काम अद्याप सुरू असून ते ऑक्टोबर 2026 पर्यंत पूर्ण होण्याची शक्यता आहे.
CMRS सुरक्षा चाचणी महत्त्वाची
मेट्रो सुरू करण्यापूर्वी मेट्रो रेल्वे सुरक्षा आयुक्त (CMRS) यांच्याकडून अंतिम तपासणी केली जाणार आहे. मे महिन्याच्या अखेरीस ही सुरक्षा पाहणी अपेक्षित आहे. या तपासणीत सर्व तांत्रिक बाबी आणि सुरक्षा मानकांची पूर्तता झाली तर जूनअखेरीस मेट्रो सेवेला हिरवा कंदील मिळू शकतो.
अधिकाऱ्यांच्या माहितीनुसार, मान ते बालेवाडी या भागातील स्थानकांचे काम जवळपास पूर्ण झाले आहे. त्यामुळे पहिल्या टप्प्यातील सेवा सुरू करण्यासाठी प्रशासन तयारीत आहे.
पहिल्या टप्प्यात कोणती स्थानकं सुरू होणार?
पहिल्या टप्प्यात हिंजवडी परिसरातील महत्त्वाची स्थानकं प्रवाशांसाठी खुली केली जाणार आहेत. यात पुढील स्थानकांचा समावेश असेल:
- मेगापोलिस सोसायटी
- क्वाड्रन बिझनेस पार्क
- डोहलर
- इन्फोसिस फेज 2
- विप्रो टेक्नॉलॉजीज फेज 2
- पॉल इंडिया
- शिवाजी चौक
- कोर्टयार्ड बाय मॅरियट
- वाकड चौक
- बालेवाडी स्टेडियम
- ऑर्किड हॉटेल
- रामनगर
या मार्गामुळे विशेषतः आयटी कंपन्यांमध्ये काम करणाऱ्या हजारो कर्मचाऱ्यांना मोठा फायदा होणार आहे.
दुसऱ्या टप्प्यात संपूर्ण मार्ग खुला
ऑक्टोबर 2026 पर्यंत उर्वरित 11 स्थानकांचे काम पूर्ण होण्याची शक्यता आहे. त्यानंतर संपूर्ण हिंजवडी-शिवाजीनगर मेट्रो मार्ग सुरू केला जाईल.
दुसऱ्या टप्प्यात सुरू होणारी प्रमुख स्थानकं पुढीलप्रमाणे:
- हाय स्ट्रीट
- बालेवाडी फाटा
- बाणेरगाव
- बाणेर
- कृषी अनुसंधान
- यशदा
- सावित्रीबाई फुले पुणे विद्यापीठ
- आरबीआय
- कृषी महाविद्यालय
- शिवाजीनगर
- जिल्हा व सत्र न्यायालय
विलंब का झाला?
मेट्रो प्रकल्प वेळेत पूर्ण न होण्यामागे बाणेर आणि शिवाजीनगर परिसरातील काही महत्त्वाच्या स्थानकांच्या बांधकामातील अडथळे कारणीभूत ठरले आहेत. विशेषतः चार प्रमुख स्थानकांच्या कामामध्ये तांत्रिक आणि नागरी अडचणी निर्माण झाल्यामुळे प्रकल्पाचा वेग मंदावला.
याशिवाय वाहतूक व्यवस्थापन, उड्डाणपुलावरील काम आणि काही प्रशासकीय मंजुरी यांमुळेही प्रकल्प उशिरा पूर्ण होत असल्याचे सांगितले जात आहे.
ट्रिपल कनेक्टिव्हिटीचा मोठा फायदा
सध्या पुण्यात दोन प्रमुख मेट्रो मार्ग सुरू आहेत.
- मेट्रो लाइन 1 : पीसीएमसी ते स्वारगेट
- मेट्रो लाइन 2 : वनाझ ते रामवाडी
हिंजवडी-शिवाजीनगर मेट्रो सुरू झाल्यानंतर शिवाजीनगर हे शहरातील प्रमुख इंटरचेंज स्टेशन ठरणार आहे. येथे तिन्ही मेट्रो मार्ग एकमेकांना जोडले जातील. त्यामुळे पुणेकरांना शहरातील विविध भागात जलद आणि अखंड प्रवास करता येणार आहे.
विशेषतः आयटी पार्क, शैक्षणिक संस्था, सरकारी कार्यालये आणि व्यापारी भाग यांना थेट जोडणी मिळणार असल्याने सार्वजनिक वाहतुकीला मोठी चालना मिळेल.
फ्रेंच कंपनीकडे जबाबदारी
या मार्गावरील मेट्रो सेवा चालवण्याची जबाबदारी फ्रान्समधील Keolis या कंपनीकडे देण्यात आली आहे. ही कंपनी पुढील 10 वर्षे मेट्रोच्या तिकीट व्यवस्थापनासह ऑपरेशन आणि देखभालीचे काम पाहणार आहे.
या मार्गावर एकूण 22 मेट्रो गाड्या धावणार असून 23 स्थानकांद्वारे प्रवाशांना सेवा दिली जाणार आहे.
वेळापत्रक आणि भाडेदर अद्याप जाहीर नाहीत
मेट्रो प्रशासनाकडून अद्याप अधिकृत वेळापत्रक आणि भाडेदर जाहीर करण्यात आलेले नाहीत. मात्र, पहिल्या टप्प्याचे उद्घाटन जवळ आल्याने लवकरच याबाबत घोषणा होण्याची शक्यता आहे.पुणेकरांना आता या मेट्रोमुळे वाहतूक कोंडीतून मोठा दिलासा मिळेल, अशी अपेक्षा व्यक्त केली जात आहे.
