‘ऑपरेशन प्रहार’ अंतर्गत कठोर पावले; दुचाकीस्वारांच्या सुरक्षेसाठी लोखंडी गार्डचे वाटप
मूर्तिजापूर प्रतिनिधी :
मकरसंक्रांतीच्या पार्श्वभूमीवर पतंग उडवण्याच्या नावाखाली जीवघेणा ठरणारा नायलॉन व चायनीज मांजाचा वापर रोखण्यासाठी मूर्तिजापूर शहर पोलिसांनी कडक भूमिका घेतली आहे. उच्च न्यायालयाच्या आदेशाचे उल्लंघन करून चायनीज मांजाचा वापर व विक्री करणाऱ्यांविरुद्ध ‘ऑपरेशन प्रहार’ अंतर्गत मोठी कारवाई करण्यात आली असून, या कारवाईत तीन आरोपींवर गुन्हे दाखल करण्यात आले आहेत.
मकरसंक्रांतीच्या काळात दरवर्षी नायलॉन व चायनीज मांजामुळे दुचाकीस्वारांचे गळे कापले जाणे, पक्ष्यांचे जीव जाणे तसेच गंभीर अपघात घडण्याच्या घटना समोर येतात. या पार्श्वभूमीवर न्यायालयाने अशा मांजावर संपूर्ण बंदी घातली आहे. मात्र, तरीही काही समाजकंटकांकडून नियम धाब्यावर बसवून घातक मांजाची विक्री व वापर सुरू असल्याचे निदर्शनास आले होते.
जिल्हा पोलीस अधीक्षक अर्चित चांडक यांच्या स्पष्ट आदेशानुसार व मार्गदर्शनाखाली मूर्तिजापूर शहर पोलीस स्टेशनने विशेष मोहीम हाती घेतली. या कारवाईदरम्यान कलम १२५, १२३, २९६ भारतीय न्याय संहिता तसेच पर्यावरण संरक्षण अधिनियमातील कलम ४, ५ आणि १५ अंतर्गत अप क्र. ०५/२६, १४/२६ व १५/२६ नुसार तीन आरोपींविरुद्ध गुन्हे दाखल करण्यात आले आहेत. या कारवाईमुळे शहरात चायनीज मांजाची विक्री व वापर करणाऱ्यांमध्ये मोठी खळबळ उडाली आहे.
Related News
ऑपरेशन प्रहारचा दणका! बार्शीटाकळी हादरली! गावठी दारू विक्रेते आणि जुगार अड्डे पोलिसांच्या रडारवर ,6 ठिकाणी छापे
“ऑपरेशन प्रहार : अकोला पोलिसांची तडाखेबंद कारवाई, 2.01 लाखांचा मुद्देमाल नष्ट करून हातभट्टी उद्ध्वस्त – तिघांविरुद्ध गुन्हा दाखल”
4 जणांची हत्या करून स्कॉर्पिओ पेटवली ; बापाच्या अत्याचाराचा भयंकर शेवट!
Twisha Sharma मृत्यू प्रकरणात मोठा ट्विस्ट; 20 लाखांचे शेअर्स CBIच्या तपासाच्या केंद्रस्थानी
Twisha Sharma मृत्यू प्रकरणात मोठा ट्विस्ट! सासूने पुराव्यांमध्ये छेडछाड केल्याचा संशय
Solapur Crime : सासरच्या छळामुळे 2 वर्षांच्या मुलासह आईची धक्कादायक आत्महत्या, अक्कलकोट हादरलं
Nida Khan Case : 8 तासांच्या चौकशीत धक्कादायक खुलासे, ‘प्रेग्नेंट पाहुणी’साठी घर मागितल्याची कॉल रेकॉर्डिंग समोर
Ratnagiri Crime: 33 वर्षीय बँक कर्मचाऱ्याची धक्कादायक बेपत्ता घटना; 4 पानी पत्रात चौघांवर गंभीर आरोप
दुचाकीस्वारांच्या सुरक्षेसाठी पुढाकार
केवळ कायदेशीर कारवाईपुरतेच न थांबता, मूर्तिजापूर पोलिसांनी सामाजिक बांधिलकी जपत नागरिकांच्या सुरक्षेसाठीही महत्त्वाचे पाऊल उचलले आहे. आज शहरातील छत्रपती शिवाजी महाराज चौक येथे पोलीस अधिकारी, कर्मचारी व पत्रकारांच्या उपस्थितीत दुचाकींना नायलॉन मांजापासून संरक्षण मिळावे यासाठी लोखंडी तारांचे संरक्षक (गार्ड/आर्च) बसवून त्याचे वाटप करण्यात आले.
दुचाकीस्वारांच्या गळ्याला मांजा लागून होणारे अपघात प्राणघातक ठरतात. अशा घटना टाळण्यासाठी हे संरक्षक अत्यंत उपयुक्त ठरणार असून, नागरिकांनी याचा जास्तीत जास्त वापर करावा, असे आवाहन पोलिसांकडून करण्यात आले आहे.
पोलिसांचे नागरिकांना आवाहन
या प्रसंगी पोलीस निरीक्षक अजित बा. जाधव यांनी नागरिकांना स्पष्ट शब्दांत आवाहन करताना सांगितले की,
मकरसंक्रांतीदरम्यान पतंग उडवताना नायलॉन किंवा चायनीज मांजाचा अजिबात वापर करू नये.
अशा घातक मांजाची विक्री करणाऱ्यांची माहिती तात्काळ पोलिसांना द्यावी.
मानवी जीव, दुचाकीस्वार आणि पक्ष्यांचे प्राण धोक्यात येतील असे कोणतेही कृत्य करू नये.
नागरिकांनी नियमांचे पालन केल्यासच सण सुरक्षित व आनंददायी पद्धतीने साजरा होऊ शकतो, असेही त्यांनी नमूद केले.
संयुक्त प्रयत्नांचे यश
ही संपूर्ण कारवाई पोलीस अधीक्षक अर्चित चांडक, अप्पर पोलीस अधीक्षक चंद्रकांत रेड्डी आणि उपविभागीय पोलीस अधिकारी वैशाली मुळे यांच्या मार्गदर्शनाखाली पोलीस निरीक्षक अजित जाधव व त्यांच्या पथकाने यशस्वीपणे पार पाडली.
मूर्तिजापूर पोलिसांच्या या ठोस आणि संवेदनशील कारवाईमुळे नागरिकांच्या सुरक्षेला प्राधान्य दिले गेले असून, आगामी काळातही चायनीज मांजाविरोधात कठोर पावले उचलली जाणार असल्याचा इशाराही पोलिसांनी दिला आहे.
