अंतरवाली सराटी येथे आयोजित बैठकीला मोठ्या संख्येने मराठा बांधव उपस्थित होते. उपस्थित गर्दी पाहून भावूक झालेल्या जरांगेंनी समाजाला एकत्र येण्याचं आवाहन केलं. “मराठा समाजाने आता पक्षीय राजकारणापेक्षा आपल्या समाजाच्या प्रश्नांना प्राधान्य दिलं पाहिजे. सरकारला मराठा समाज मोठा झालेला पाहायचा नाही,” अशी टीकाही त्यांनी केली.

जरांगेंनी राज्य सरकारवर गंभीर आरोप करत सांगितलं की, “सरकारकडून जाणूनबुजून प्रमाणपत्रं रोखली जात आहेत. गरीब मराठा समाजाला न्याय मिळू नये, यासाठी वेळकाढूपणा सुरू आहे. मराठा समाजाने आंदोलनादरम्यान मुंबई जिवंत केली होती. पण आता सरकार त्या आंदोलनाचं महत्त्व विसरत आहे.”

मुख्यमंत्री Devendra Fadnavis यांच्यावर थेट आरोप टाळत असतानाही जरांगेंनी अनेक प्रश्न उपस्थित केले. “मी फडणवीसांचा विरोधक नाही, पण सत्य सांगणारच. कुणबी प्रमाणपत्र का रोखलं जातंय? सातारा आणि कोल्हापूर संस्थानच्या जीआरचा निर्णय का प्रलंबित आहे?” असे सवाल त्यांनी उपस्थित केले.

यावेळी त्यांनी सरकारला स्पष्ट इशारा दिला की, आंदोलनाच्या तारखेपूर्वी मराठा समाजाला प्रमाणपत्र देण्याचा निर्णय घ्यावा, अन्यथा आंदोलन अधिक तीव्र होईल. “तुमच्या 50 पिढ्या आल्या तरी मराठा समाजाचं नुकसान होऊ देणार नाही,” असं ठाम विधान त्यांनी केलं.

जरांगेंनी आपल्या भाषणात समाजाशी असलेल्या नात्याचाही उल्लेख केला. “मी समाजाशी कधीही बेईमान होणार नाही. खोटं बोलून पैसे कमवणाऱ्या टोळ्या वेगळ्या आहेत. पण मी माझं आयुष्य मराठा समाजासाठी अर्पण केलं आहे,” असं भावनिक वक्तव्य त्यांनी केलं.

दरम्यान, आंदोलनाला कमकुवत करण्यासाठी काही संघटनांना पैसे देण्याचा प्रयत्न होत असल्याचाही गंभीर आरोप त्यांनी केला. “एका मंत्र्याने एका संघटनेला दोन कोटी रुपये देण्याचं ठरवलं होतं, फक्त जरांगेंविरोधात बोलण्यासाठी. पण ते लोकच माझ्याकडे आले,” असा दावा त्यांनी केला. या आरोपांमुळे राज्याच्या राजकारणात नव्या चर्चांना उधाण आलं आहे.

मराठा आरक्षणाचा प्रश्न गेल्या अनेक वर्षांपासून राज्यातील सर्वात संवेदनशील राजकीय आणि सामाजिक मुद्दा राहिला आहे. विविध आंदोलने, मोर्चे आणि न्यायालयीन प्रक्रियेनंतरही अद्याप या प्रश्नावर कायमस्वरूपी तोडगा निघालेला नाही. त्यामुळे आता जरांगेंच्या नव्या आंदोलनाकडे संपूर्ण राज्याचं लक्ष लागलं आहे.

विशेष म्हणजे, जरांगेंनी यावेळी समाजाला संयम राखण्याचं आवाहन करताना संघर्षाची तयारीही ठेवण्याचा संदेश दिला. “कितीही डाव टाका, मी लढाई सोडणार नाही. गरीब मराठा समाज हुशार आहे, त्यांना कमी समजू नका,” असं सांगत त्यांनी कार्यकर्त्यांमध्ये नवसंजीवनी निर्माण केली.

30 मेपासून सुरू होणाऱ्या आमरण उपोषणामुळे सरकारसमोर मोठं आव्हान उभं राहण्याची शक्यता आहे. आगामी स्थानिक स्वराज्य संस्था आणि इतर निवडणुकांच्या पार्श्वभूमीवर मराठा आरक्षणाचा मुद्दा पुन्हा एकदा राज्याच्या राजकारणाचा केंद्रबिंदू ठरणार असल्याचं चित्र दिसत आहे.

आता सरकार जरांगेंच्या मागण्यांवर काय भूमिका घेणार आणि आंदोलनाचा पुढील टप्पा किती आक्रमक होणार, याकडे संपूर्ण महाराष्ट्राचं लक्ष लागलं आहे.

read also :  https://ajinkyabharat.com/supreme-courts-historic-decision-2-days-a-week-work-from-home-virtual-hearing/