चंद्रकांत दादांच्या कामाचं ऑडिट भोवलं; राष्ट्रवादीच्या दोन नगरसेवकांचा निधी शून्य, महायुतीतील वाद चव्हाट्यावर
पुणे महापालिकेत महायुतीतील अंतर्गत धुसफूस आता उघडपणे समोर आली आहे. राज्याचे मंत्री चंद्रकांत पाटील यांच्या कामाच्या ऑडिटची मागणी करणाऱ्या राष्ट्रवादी काँग्रेसच्या नगरसेवकांना त्याचा फटका बसल्याचा आरोप करण्यात आला आहे. राष्ट्रवादीचे नगरसेवक सुनील टिंगरे आणि अमोल बालवडकर यांचा निधी शून्य करण्यात आल्याने राजकीय वातावरण तापलं आहे. या निर्णयामागे राजकीय सूडबुद्धी असल्याचा गंभीर आरोप राष्ट्रवादीकडून करण्यात आला आहे.
या प्रकरणामुळे पुणे महापालिकेतील सत्ताधारी भाजप आणि राष्ट्रवादी काँग्रेसमधील मतभेद अधिक तीव्र होण्याची शक्यता आहे. निधी परत मिळवण्यासाठी राष्ट्रवादीने आक्रमक भूमिका घेतली असून, गरज पडल्यास कायदेशीर मार्गाचा अवलंब करण्याचा इशाराही देण्यात आला आहे.
चंद्रकांत पाटील यांच्या कामाच्या ऑडिटची मागणी
पुणे महापालिकेतील राष्ट्रवादीचे नगरसेवक अमोल बालवडकर यांनी चंद्रकांत पाटील यांच्या कामाच्या ऑडिटची मागणी करणारा प्रस्ताव दिला होता. या प्रस्तावावर राष्ट्रवादीचे शहराध्यक्ष आणि नगरसेवक सुनील टिंगरे यांनी अनुमोदक म्हणून सही केली होती.
Related News
राज्यात सुट्ट्या खाद्यतेलावर बंदी? तुकाराम मुंढेंचा मोठा निर्णय; विक्रेत्यांना थेट इशारा
‘माज, दादागिरी तुमच्या राज्यात’; मराठीला विरोध करणाऱ्यांवर पुष्कर जोग भडकला
भीषण अपघात! विमान हेलिकॉप्टरला धडकलं; हवेतच विमानाचे तुकडे-तुकडे
Prithviraj Chavan : 2014 मध्येच मविआ सरकारचा प्रस्ताव! पृथ्वीराज चव्हाणांच्या गौप्यस्फोटाने राजकारणात खळबळ
पॅलेट गन पीडितासह राहुल गांधींचा पोलीस ठाण्याबाहेर ठिय्या; FIR नोंदवण्याची मागणी
दीपिकाने मागितला चित्रपटाच्या नफ्यात 10% वाटा? ‘स्पिरीट’च्या वादात निर्मात्यांचा मोठा आरोप
निलेश राणे रवींद्र चव्हाणांच्या पैशांवर निवडून आले; वैभव नाईकांचा जोरदार पलटवार
गुजरातच्या माधोपुरा बँकेकडे महाराष्ट्रातील नागरी बँकांचं नेतृत्व? संजय राऊतांचा गंभीर आरोप
श्वेता तिवारीचा राज ठाकरेंना थेट सवाल; ‘मराठी माणूस असण्याचा अर्थ आता हाच झाला आहे का?’
कोरोनानंतर कॅन्सरवर मोठी झेप! Moderna च्या mRNA लसीने मेलेनोमाविरोधात दाखवला आश्वासक परिणाम
जयपूरमध्ये ‘कॉकरोच जनता पार्टी’च्या कार्यकर्त्यांना हुसकावलं; मारहाणीच्या आरोपाने गावात तणाव
इमरान खान यांची पुन्हा जेलमध्ये रवानगी; रुग्णालयात दाखल केल्यानंतर अवघ्या 6 तासांत काय घडलं?
याच पार्श्वभूमीवर टिंगरे आणि बालवडकर यांच्या निधीला ब्रेक लावण्यात आल्याचा आरोप राष्ट्रवादीकडून करण्यात आला आहे. दोन्ही नगरसेवकांचा निधी शून्य करण्यात आला असून, त्यांच्या कामांना प्रशासकीय मान्यताही मिळालेली नसल्याचं सांगण्यात येत आहे.
राष्ट्रवादीने या निर्णयाला राजकीय दबावाचं उदाहरण असल्याचं म्हटलं आहे. विरोधात प्रश्न उपस्थित करणाऱ्या नगरसेवकांना अशा प्रकारे निधीपासून वंचित ठेवण्याचा प्रयत्न होत असेल तर हा लोकशाही प्रक्रियेवर प्रश्नचिन्ह निर्माण करणारा प्रकार असल्याचं राष्ट्रवादीचं म्हणणं आहे.
सुनील टिंगरे आक्रमक; म्हणाले, “निधी परत मिळालाच पाहिजे”
निधी शून्य केल्याच्या निर्णयावर सुनील टिंगरे यांनी तीव्र नाराजी व्यक्त केली आहे. विरोधात प्रश्न विचारल्यामुळे दहशत निर्माण करण्याच्या उद्देशाने हा निर्णय घेण्यात आल्याचा आरोप त्यांनी केला.
टिंगरे यांच्या म्हणण्यानुसार, अमोल बालवडकर यांनी चंद्रकांत पाटील यांच्या कामाच्या ऑडिटची मागणी करणारा प्रस्ताव मांडला होता. त्यावर आपण केवळ अनुमोदक म्हणून सही केली होती. या प्रकरणात आपला कोणताही वैयक्तिक संबंध नसल्याचं आपण चंद्रकांत पाटील यांनाही स्पष्ट केल्याचं त्यांनी सांगितलं.
“फक्त सही केली म्हणून निधी शून्य केला असेल, तर हा संविधानाचा अपमान आहे. ही तर हिटलरशाही आहे,” असा घणाघाती आरोप टिंगरे यांनी केला.
राष्ट्रवादीच्या सर्व नगरसेवकांची तातडीची बैठक
या प्रकरणावर चर्चा करण्यासाठी राष्ट्रवादी काँग्रेसने पुणे महापालिकेतील सर्व नगरसेवकांची तातडीची बैठक बोलावली आहे. या बैठकीत पुढील आंदोलनाची दिशा आणि भाजपविरोधात कोणती भूमिका घ्यायची, यावर चर्चा होणार आहे.
शहराध्यक्ष सुनील टिंगरे यांच्या अध्यक्षतेखाली होणाऱ्या या बैठकीला आमदार चेतन तुपे, महापालिकेतील राष्ट्रवादीचे विरोधी पक्षनेते निलेश निकम आणि दीपक मानकर यांच्यासह प्रमुख पदाधिकारी उपस्थित राहणार आहेत.
दरम्यान, टिंगरे यांनी या प्रकरणाची माहिती उपमुख्यमंत्री सुनेत्रा पवार यांच्यापर्यंत पोहोचवली असल्याचं सांगण्यात आलं आहे. त्यामुळे आता या वादात पक्षाच्या वरिष्ठ नेतृत्वाची भूमिका काय असणार, याकडेही राजकीय वर्तुळाचं लक्ष लागलं आहे.
एकनाथ शिंदेंकडे तक्रार करण्याचा इशारा
निधी शून्य करण्याच्या निर्णयाविरोधात राज्याचे नगरविकास मंत्री एकनाथ शिंदे यांच्याकडे तक्रार करण्याचा इशारा राष्ट्रवादीकडून देण्यात आला आहे.
सुनील टिंगरे यांनी सांगितलं की, “आम्ही विरोधात प्रश्न विचारले म्हणून दहशत निर्माण करण्यासाठी निधी शून्य करण्यात आला आहे.” त्यामुळे हा विषय केवळ महापालिकेपुरता मर्यादित न राहता राज्य पातळीवर जाण्याची शक्यता आहे.
महायुतीमध्ये भाजप, शिवसेना आणि राष्ट्रवादी काँग्रेस हे घटक पक्ष असताना पुणे महापालिकेतील या संघर्षामुळे आघाडीतील समन्वयावरही प्रश्न उपस्थित झाले आहेत.
“निधी जनतेच्या कामासाठी होता, माझ्यासाठी नाही”
टिंगरे यांनी निधीच्या मुद्द्यावरून सत्ताधाऱ्यांना थेट सवाल केला. नगरसेवकांना मिळणारा निधी हा वैयक्तिक वापरासाठी नसून मतदारसंघातील नागरिकांच्या विकासकामांसाठी असतो, असा दावा त्यांनी केला.
“तुमचा आमच्यावर राजकीय आकस असू शकतो. मात्र आमच्या जनतेच्या प्रश्नांचं काय? हा निधी मला येणार नव्हता, जनतेच्या कामासाठी येणार होता,” असा सवाल टिंगरे यांनी उपस्थित केला.
तसंच, एखाद्या कामाच्या चौकशीची मागणी केली म्हणून निधी कापला जात असेल, तर संबंधित कामात काही गैरप्रकार किंवा गौडबंगाल आहे का, असा सवालही त्यांनी उपस्थित केला.
अमोल बालवडकरांचा भाजपवर हल्लाबोल
राष्ट्रवादीचे नगरसेवक अमोल बालवडकर यांनीही भाजपवर जोरदार टीका केली आहे. निवडून आलेला नगरसेवक असूनही आपल्याला शून्य निधी देण्यात आल्याचा आरोप त्यांनी केला.
“माझ्या कुठल्याच बजेटचं प्रशासकीय वर्गीकरण झालं नाही. माझ्या एकाही कामाला प्रशासकीय मान्यता मिळाली नाही,” असं बालवडकर यांनी म्हटलं.
सत्ताधारी भाजपकडून आपली बदनामी करण्याचा प्रयत्न होत असल्याचाही आरोप त्यांनी केला. “भाजपला बहुमताचा अहंकार झाला आहे,” अशी टीका करत त्यांनी सत्ताधाऱ्यांवर निशाणा साधला.
बालवडकर यांनी आपल्या पूर्वीच्या भाजपमधील राजकीय भूमिकेचीही आठवण करून दिली. एकेकाळी आपण भाजपसाठी काम केलं असून, त्याची जाणीव पक्षाच्या नेत्यांनी ठेवावी, असं त्यांनी म्हटलं.
कोर्टात जाण्याचीही तयारी
निधी परत मिळाला नाही तर न्यायालयात जाण्याची तयारी राष्ट्रवादीने दर्शवली आहे. या प्रकरणात उपलब्ध असलेल्या सर्व कायदेशीर मार्गांचा अवलंब केला जाईल, असा इशारा सुनील टिंगरे यांनी दिला आहे.
“आमचा निधी आम्हाला मिळाला पाहिजे. अन्यथा आम्ही कोर्टात जाऊ. जे काही कायदेशीर मार्ग आहेत, त्याची आम्ही अंमलबजावणी करू,” अशी भूमिका त्यांनी स्पष्ट केली.
महायुतीतील वाद आणखी वाढणार?
पुणे महापालिकेतील निधीच्या मुद्द्यावरून सुरू झालेला हा वाद आता महायुतीतील अंतर्गत राजकारणासाठी महत्त्वाचा ठरण्याची शक्यता आहे. चंद्रकांत पाटील यांच्या कामाच्या ऑडिटच्या मागणीपासून सुरू झालेला वाद दोन नगरसेवकांचा निधी शून्य करण्यापर्यंत पोहोचला आहे.
राष्ट्रवादीने हा निर्णय राजकीय सूडबुद्धीचा असल्याचा आरोप केला आहे, तर पुढील काळात भाजपकडून यावर काय भूमिका घेतली जाते, हे पाहणं महत्त्वाचं ठरणार आहे. दरम्यान, राष्ट्रवादीच्या नगरसेवकांची तातडीची बैठक, वरिष्ठ नेत्यांकडे तक्रार आणि कायदेशीर कारवाईची तयारी यामुळे पुणे महापालिकेतील राजकीय वातावरण आणखी तापण्याची चिन्हं आहेत.
