पोहरादेवी येथील ‘बणजारा विरासत’ संग्रहालयाची मंत्री संजय राठोड यांच्याकडून पाहणी; विकासकामांचा घेतला सविस्तर आढावा
वाशिम, दि. ३० मे : राज्याचे मृद व जलसंधारण मंत्री संजय राठोड यांनी पोहरादेवी येथील ‘बणजारा विरासत’ संग्रहालयाला भेट देऊन संग्रहालयाच्या कामकाजाचा, उपलब्ध सुविधांचा तसेच सुरू असलेल्या विकासकामांचा सविस्तर आढावा घेतला. बंजारा समाजाचा इतिहास, संस्कृती आणि परंपरा जतन करण्यासाठी उभारण्यात आलेले हे संग्रहालय भविष्यात राज्यातील एक महत्त्वाचे सांस्कृतिक आणि पर्यटन केंद्र म्हणून विकसित व्हावे, यासाठी आवश्यक उपाययोजनांवर यावेळी चर्चा करण्यात आली.
या पाहणी दौऱ्यात लोकमत मीडिया समूहाचे अध्यक्ष विजय दर्डा यांची विशेष उपस्थिती होती. तसेच जिल्हाधिकारी योगेश कुंभेजकर, मुख्य कार्यकारी अधिकारी अर्पित चौहान, कारंजा प्रांताधिकारी रवी महाले, उपविभागीय पोलिस अधिकारी योगेश क्षीरसागर, मानोरा तहसीलदार राजेंद्र पाटील, सार्वजनिक बांधकाम विभागाचे अधीक्षक अभियंता सुनील थोटांगे, प्रादेशिक जलसंधारण अधिकारी दिलीप निपाने, कार्यकारी अभियंता शुभम जोशी, श्याम फेरवाणी, निता बोकाडे तसेच महंत जितेंद्र महाराज यांच्यासह अनेक अधिकारी उपस्थित होते.
संत सेवालाल महाराजांना अभिवादन
संग्रहालयाच्या पाहणीपूर्वी मंत्री संजय राठोड आणि उपस्थित मान्यवरांनी बणजारा विरासत संग्रहालय परिसरातील सेवाध्वजास वंदन केले. त्यानंतर बंजारा समाजाचे आराध्य दैवत संत सेवालाल महाराज यांच्या अश्वारूढ पुतळ्यास पुष्पहार अर्पण करून अभिवादन करण्यात आले. यावेळी परिसरात भक्तीमय आणि उत्साहपूर्ण वातावरण निर्माण झाले होते.
Related News
पुण्यातून विक्रम काकडे यांनाच राष्ट्रवादीची उमेदवारी, जळगावात राजकीय खळबळ; 4 तासांच्या जोरदार माथापच्चीनंतर अखेर निर्णय!
पुणे स्टेशनवरून 1 वर्षाच्या मुलीचे अपहरण; 65 CCTV फुटेजमुळे उलगडला थरारक गुन्हा
लाडकी बहीण योजनेतून 81 लाख महिलांची नावे वगळली? रोहित पवारांचा धक्कादायक दावा;
मुंबई उडवण्याचा कट फसला! 9 संशयित दहशतवादी अटकेत, दिल्ली पोलिसांची मोठी कारवाई
900 कोटींच्या टेंडरसाठी आंदोलन? मनोज जरांगे यांच्यावर अमोल खुणे यांचे धक्कादायक आरोप
सावधान! लोणावळ्याच्या टायगर पॉइंटवर 450 फूट दरीत पडून नौदल अधिकाऱ्याचा अंत
मराठा आरक्षणावर मुख्यमंत्र्यांची मोठी घोषणा! 5 महत्त्वाचे निर्णय घेणार, पण कोर्टाच्या आदेशांचे पालन अनिवार्य
कन्फर्म तिकीट असूनही सीट न मिळाल्यास प्रवाशांना मिळणार 10 पट भरपाई
102 रुग्णवाहिका न मिळाल्याने गर्भातील बाळाचा मृत्यू ; डॉक्टर म्हणाले “अर्धा तास आधी आला असता तर बाळ वाचलं असतं!”
भोरच्या भाटघर धरणातून पुन्हा प्रकटले ‘कांबरेश्वर’ मंदिर; 98 वर्षांनंतरही वास्तू ताठ उभी
पुणे Ring Road Project 2028: सिंहगडजवळ 5.87 किमी बोगदा, खडकवासल्यावर पूल; पश्चिम बायपासमुळे प्रवासात मोठी बचत
मुंबईत ५१ कोटींच्या MD ड्रग्ज रॅकेटचा धक्कादायक पर्दाफाश; हायप्रोफाइल टॉवरमध्ये सुरू होता काळा उद्योग
विकासकामांचा घेतला आढावा
संग्रहालयाच्या विविध दालनांची पाहणी करताना मंत्री राठोड यांनी बणजारा विरासत संग्रहालयाच्या उभारणीसाठी आणि विकासासाठी करण्यात आलेल्या कामांची माहिती घेतली. संग्रहालयात जतन करण्यात आलेल्या ऐतिहासिक वस्तू, पारंपरिक पोशाख, सांस्कृतिक वारसा, बंजारा समाजाच्या इतिहासाशी संबंधित दस्तावेज आणि प्रदर्शन व्यवस्थेची त्यांनी पाहणी केली.
यावेळी त्यांनी संबंधित अधिकाऱ्यांशी चर्चा करून पर्यटकांना अधिक चांगल्या सुविधा उपलब्ध करून देण्यासाठी आवश्यक उपाययोजनांबाबत मार्गदर्शन केले. परिसरातील पायाभूत सुविधा, स्वच्छता, पार्किंग, प्रकाश व्यवस्था, पिण्याच्या पाण्याची सुविधा, माहिती केंद्र तसेच पर्यटन विकासासाठी आवश्यक असलेल्या विविध बाबींचा आढावा घेण्यात आला.
पर्यटनाला चालना देण्यावर भर
पोहरादेवी हे बंजारा समाजाचे श्रद्धास्थान मानले जाते. दरवर्षी येथे लाखो भाविक आणि पर्यटक भेट देतात. त्यामुळे ‘बणजारा विरासत’ संग्रहालय हे केवळ सांस्कृतिक केंद्र न राहता पर्यटनाच्या दृष्टीनेही एक महत्त्वाचे आकर्षण ठरू शकते, असे मत यावेळी व्यक्त करण्यात आले.
मंत्री राठोड यांनी संग्रहालय परिसराच्या सर्वांगीण विकासासाठी नियोजनबद्ध पद्धतीने काम करण्याच्या सूचना दिल्या. आधुनिक तंत्रज्ञानाचा वापर करून संग्रहालय अधिक आकर्षक आणि माहितीपूर्ण करण्यावर भर देण्यात यावा, असेही त्यांनी सांगितले.
विजय दर्डा यांनी उलगडला नाईक यांचा विकासदृष्टिकोन
यावेळी बोलताना लोकमत मीडिया समूहाचे अध्यक्ष विजय दर्डा यांनी महाराष्ट्राचे माजी मुख्यमंत्री स्वर्गीय वसंतराव नाईक आणि स्वर्गीय सुधाकरराव नाईक यांच्या कार्याचा गौरवपूर्ण उल्लेख केला.
ते म्हणाले की, वसंतराव नाईक यांनी महाराष्ट्राच्या विकासाला नवी दिशा दिली. कृषी, ग्रामीण विकास आणि सर्वसामान्य नागरिकांच्या कल्याणासाठी त्यांनी घेतलेल्या निर्णयांमुळे राज्याच्या प्रगतीचा मजबूत पाया रचला गेला. त्यांच्या दूरदृष्टीमुळे महाराष्ट्राच्या विकासाची वाट अधिक व्यापक झाली.
तसेच सुधाकरराव नाईक यांनीही ग्रामीण भागाच्या विकासासाठी आणि प्रशासनात पारदर्शकता आणण्यासाठी महत्त्वपूर्ण योगदान दिल्याचे त्यांनी नमूद केले.
बंजारा संस्कृतीच्या जतनासाठी महत्त्वपूर्ण उपक्रम
लोकमत मीडिया समूहाचे अध्यक्ष विजय दर्डा यांनी ‘बणजारा विरासत’ संग्रहालयाचे कौतुक करताना सांगितले की, हे संग्रहालय केवळ ऐतिहासिक वस्तूंचे प्रदर्शन नसून बंजारा समाजाच्या वैभवशाली इतिहासाचे, समृद्ध संस्कृतीचे आणि गौरवशाली परंपरांचे जिवंत दस्तावेज आहे. समाजातील थोर संत, समाजसुधारक, नेते आणि विविध क्षेत्रांत उल्लेखनीय योगदान देणाऱ्या व्यक्तिमत्त्वांची माहिती या माध्यमातून नव्या पिढीपर्यंत पोहोचत आहे. जागतिकीकरणाच्या युगात आपल्या सांस्कृतिक मुळांशी जोडून ठेवण्याचे महत्त्वाचे कार्य हे संग्रहालय करत आहे. बंजारा समाजाच्या जीवनशैली, लोककला, रूढी-परंपरा आणि संघर्षमय इतिहासाचे जतन करून त्याचा अभिमान पुढील पिढ्यांमध्ये निर्माण करण्यासाठी हा उपक्रम अत्यंत प्रेरणादायी आहे. अशा संग्रहालयांमुळे सामाजिक एकात्मता वाढण्यासह सांस्कृतिक वारशाचे संवर्धन आणि पर्यटन विकासालाही मोठी चालना मिळत असल्याचे त्यांनी नमूद केले.
सांस्कृतिक वारशाचे जतन ही काळाची गरज
बदलत्या काळात अनेक पारंपरिक संस्कृती आणि लोकपरंपरा लोप पावत आहेत. अशा परिस्थितीत समाजाचा सांस्कृतिक वारसा जतन करणारी संग्रहालये अत्यंत महत्त्वाची भूमिका बजावतात. ‘बणजारा विरासत’ संग्रहालय हे बंजारा समाजाच्या वैभवशाली इतिहासाचे दस्तावेजीकरण करणारे एक प्रेरणादायी केंद्र बनत असल्याची भावना उपस्थितांनी व्यक्त केली.
पोहरादेवीतील हे संग्रहालय भविष्यात संशोधक, विद्यार्थी, पर्यटक आणि इतिहास अभ्यासकांसाठी ज्ञानाचा महत्त्वपूर्ण स्रोत ठरणार असल्याचेही यावेळी सांगण्यात आले. संग्रहालयाच्या माध्यमातून बंजारा समाजाच्या जीवनशैली, लोककला, परंपरा आणि सामाजिक योगदानाची माहिती जगभरातील पर्यटकांपर्यंत पोहोचण्यास मदत होणार आहे.
