Uddhav-Raj Thackeray : मोठी बातमी! NEET पेपरफुटीविरोधात ठाकरे बंधूंचा एल्गार; २६ जुलैला मुंबईतून आंदोलनाची हाक
Uddhav-Raj Thackeray : NEET पेपरफुटी प्रकरण आणि विद्यार्थ्यांवर झालेल्या लाठीचार्जच्या मुद्द्यावरून महाराष्ट्रातील राजकीय वातावरण तापले आहे. दिल्लीतील जंतर-मंतर येथे सुरू असलेल्या विद्यार्थ्यांच्या आंदोलनाला पाठिंबा देण्यासाठी आता ठाकरे बंधू एकत्र मैदानात उतरले आहेत. महाराष्ट्र नवनिर्माण सेनेचे अध्यक्ष राज ठाकरे आणि शिवसेना ठाकरे गटाचे पक्षप्रमुख उद्धव ठाकरे यांनी संयुक्तपणे आंदोलनाची घोषणा केली आहे. येत्या २६ जुलै रोजी, रविवारी मुंबईत भव्य मोर्चा काढण्यात येणार आहे.
NEET पेपरफुटी, विद्यार्थ्यांवरील लाठीचार्ज आणि केंद्रीय शिक्षण मंत्री धर्मेंद्र प्रधान यांच्या राजीनाम्याच्या मागणीसाठी हा मोर्चा काढण्यात येणार आहे. विशेष म्हणजे या आंदोलनात कोणत्याही राजकीय पक्षाचे झेंडे नसतील, असे स्पष्ट करण्यात आले आहे. त्यामुळे हे आंदोलन केवळ विद्यार्थ्यांच्या प्रश्नांसाठी आणि त्यांच्या मागण्यांना पाठिंबा देण्यासाठी असल्याचे ठाकरे बंधूंकडून सांगण्यात आले आहे.
या मोर्चात महाविकास आघाडीतील इतर घटक पक्षांचे नेते आणि कार्यकर्तेही सहभागी होण्याची शक्यता व्यक्त केली जात आहे. त्यामुळे २६ जुलै रोजी मुंबईत होणाऱ्या या आंदोलनाकडे राज्याच्या राजकीय वर्तुळाचे लक्ष लागले आहे.
Related News
Raj Thackeray-Uddhav Thackeray : विद्यार्थ्यांच्या खिशात ‘50 ग्रॅम पावडर’ टाकण्याची धमकी? राज ठाकरेंचा पोलिसांना थेट सवाल
Mumbai Police Suspended : विद्यार्थ्याला ‘५० ग्रॅम पावडर’ची धमकी देणाऱ्या पोलिसाचं निलंबन; राज ठाकरेंच्या सवालानंतर मोठी कारवाई
Raj Thackeray : शरद पवार-मोदी भेटीवर राज ठाकरेंचं ३ शब्दांत भन्नाट उत्तर; म्हणाले, ‘त्यालाच जंतरमंतर म्हणतात’
NEET Paper Leak : विद्यार्थ्यांना मोठा दिलासा की नवा वाद? मोदींच्या फास्ट ट्रॅक निर्णयावर प्रियंका गांधींचं थेट उत्तर
Gold Rate Today : सोन्याने पुन्हा घेतली भरारी! चांदीही महागली, आज 1 तोळा सोन्याचा भाव किती?
Vanchit Maharashtra Bandh : वंचितच्या महाराष्ट्र बंदला कुठे कडकडीत तर कुठे संमिश्र प्रतिसाद; अनेक कार्यकर्ते ताब्यात
CJP Protest : ‘धर्मेंद्र प्रधान यांना राजीनामा द्यावा लागेल’; नरेंद्र मोदींच्या घोषणेनंतर CJPची थेट पोस्ट
Sameer Choughule : ‘मुलांची डोकी फुटताना बघून आनंदाच्या उकळ्या फुटत असतील तर समाज दुर्धर आजारी’; समीर चौघुलेंचा संताप
CJP Protest : ‘जंतरमंतरवरच यावं लागेल, त्यांच्या घरी जाऊन वेळ वाया घालवणार नाही’; आशुतोष रांका आक्रमक
Ashok Kharat : 100 रुपयांचे चिंचोके तब्बल 1 लाखांना विकले? ईडीच्या आरोपपत्रातून भोंदूबाबाचे धक्कादायक कारनामे उघड
Mumbai Protest : पोलिसांनी आंदोलकांना वॅनमध्ये भरलं, एकाने गेट उघडलं अन् सगळे उतरले; VIDEO व्हायरल
Delhi Protest : राजधानीत आंदोलनाचा भडका! 16 मेट्रो स्टेशन पुढील आदेशापर्यंत बंद, जाणून घ्या कोणती?
शिवाजी पार्क ते सिद्धिविनायक मंदिरापर्यंत मोर्चा
राज ठाकरे यांनी पत्रकार परिषदेत आंदोलनाची माहिती देताना सांगितले की, २६ जुलै रोजी रविवारी सकाळी मुंबईत मोर्चा काढण्यात येणार आहे. या मोर्चाची सुरुवात शिवाजी पार्क येथून होईल आणि मोर्चा सिद्धिविनायक मंदिरापर्यंत जाईल.
‘शिवाजी पार्क ते सिद्धिविनायक मंदिरापर्यंत मोर्चा आम्ही २६ तारखेला काढणार आहोत. या मुलांना घेऊन शक्तीप्रदर्शनाचा मोर्चा करायचं आम्ही ठरवलं आहे. मुंबईतही ही सर्व मुलं एकत्र येत आहेत आणि आपला राग, रोष व्यक्त करत आहेत. हा रोष केंद्र सरकारलाही कळणं गरजेचं आहे,’ अशी भूमिका राज ठाकरे यांनी मांडली.
या मोर्चामध्ये नीट पेपरफुटीचा मुद्दा, विद्यार्थ्यांच्या मागण्या, विद्यार्थ्यांवर झालेली पोलिसांची कारवाई आणि शिक्षण व्यवस्थेतील कथित गैरप्रकार यावर आवाज उठवण्यात येणार आहे.
NEET पेपरफुटी प्रकरण : ‘सरकारला सुबुद्धी मिळो’, उद्धव ठाकरे
या NEET पेपरफुटी आंदोलनाच्या सांगतेबाबत बोलताना उद्धव ठाकरे यांनीही महत्त्वाची प्रतिक्रिया दिली. मोर्चाच्या शेवटी सिद्धिविनायक मंदिरात जाऊन सरकारला सुबुद्धी मिळावी, यासाठी प्रार्थना करण्यात येणार असल्याचे उद्धव ठाकरे यांनी सांगितले.
‘देवाला साकडं घालणार आहोत. सरकारला सुबुद्धी मिळो, असं साकडं घालू. तिथे मोर्चाची सांगता होईल,’ असं उद्धव ठाकरे म्हणाले.
त्यामुळे २६ जुलैचा मोर्चा हा केवळ राजकीय शक्तिप्रदर्शन न राहता विद्यार्थ्यांच्या प्रश्नांना केंद्रस्थानी ठेवून काढला जाणार असल्याचे स्पष्ट होत आहे.
‘देशभरात राग आहे’, राज ठाकरेंचा दावा
राज ठाकरे यांनी केंद्र सरकारच्या भूमिकेवरही जोरदार टीका केली. देशभरातील जनतेमध्ये सध्याच्या व्यवस्थेविरोधात रोष असल्याचा दावा त्यांनी केला. शेतकरी आंदोलन आणि मणिपूरच्या प्रश्नाचा संदर्भ देत राज ठाकरे यांनी सरकारवर निशाणा साधला.
‘शेतकरी आंदोलनावेळीही ते भेटायला तयार नव्हते. मणिपूरच्या वेळीही तेच झालं. आताही तेच होतं. ही कोणती सत्ता आणि कोणत्या सत्तेचा माज?’ असा सवाल राज ठाकरे यांनी केला.
NEET परीक्षेची तयारी करणाऱ्या विद्यार्थ्यांना किती त्रास सहन करावा लागतो, हे त्यांच्या पालकांना आणि विद्यार्थ्यांनाच माहीत आहे. या परिस्थितीमुळे देशभरातील पालकांमध्येही नाराजी असल्याचे राज ठाकरे म्हणाले.
‘आज सिस्टिमच्या विरोधातील राग आहे. देशात जे काही सुरू आहे, त्याविरोधातील हा राग आहे. प्रत्येक घरातील ज्या मुलांनी परीक्षा दिली आहे, त्यांच्या आई-वडिलांनाही या परिस्थितीचा त्रास होत आहे,’ असे राज ठाकरे यांनी सांगितले.
‘उद्दामपणा कशासाठी?’ राज ठाकरेंचा सवाल
NEET पेपरफुटीच्या मुद्द्यावरून राज ठाकरे यांनी केंद्र सरकारला अनेक प्रश्न विचारले. मुंबईवरील दहशतवादी हल्ल्यानंतर तत्कालीन परिस्थितीवर केलेल्या वक्तव्याचा संदर्भ देत त्यांनी राजकीय जबाबदारी निश्चित करण्याची गरज व्यक्त केली.
या प्रकरणात सरकारने जबाबदारी स्वीकारली पाहिजे, अशी विद्यार्थ्यांची मागणी आहे. नीट परीक्षेच्या व्यवस्थेबाबत यापूर्वीही प्रश्न उपस्थित झाले होते. केंद्रीय पद्धतीने परीक्षा घेण्याबाबत आम्ही आधीच विरोध व्यक्त केला होता, असा दावा राज ठाकरे यांनी केला.
‘तिसऱ्यांदा पेपर फुटले होते. आम्ही केंद्रीय पद्धतीने परीक्षा घेऊ नका, असं सांगितलं होतं. पण त्यावेळी सत्तेमुळे त्यांची ऐकण्याची तयारी नव्हती. आजही नाही,’ असा आरोप त्यांनी केला.
त्याचबरोबर हा विषय आता केवळ केंद्रीय शिक्षण मंत्री धर्मेंद्र प्रधान यांच्या राजीनाम्यापुरता मर्यादित राहिलेला नसून, तो पंतप्रधान आणि केंद्रीय गृह मंत्रालयापर्यंत पोहोचला असल्याचेही राज ठाकरे म्हणाले.
‘मोदींच्या ट्विटला काही अर्थ नाही’
पंतप्रधान नरेंद्र मोदी यांनी नीट पेपरफुटी प्रकरण फास्ट ट्रॅक कोर्टात चालवण्याबाबत केलेल्या घोषणेवरही राज ठाकरे यांनी प्रतिक्रिया दिली. केवळ सोशल मीडियावर पोस्ट किंवा ट्विट करण्यापेक्षा विद्यार्थ्यांशी थेट संवाद साधण्याची गरज होती, असे त्यांनी म्हटले.
‘मोदींनी आज ट्विट केलं. त्याला काही अर्थ नाही. या मुलांना बोलावून त्यांच्याशी चर्चा केली असती. त्यांचं म्हणणं समजून घेतलं असतं, तर एवढं प्रकरण वाढलं नसतं,’ असे राज ठाकरे म्हणाले.
विद्यार्थ्यांच्या आंदोलनावर पोलिसांनी केलेल्या कारवाईवरही त्यांनी नाराजी व्यक्त केली. विद्यार्थ्यांच्या प्रश्नांवर चर्चा करून मार्ग काढण्याऐवजी आंदोलन दडपण्याचा प्रयत्न का केला जात आहे, असा सवाल त्यांनी उपस्थित केला.
२६ जुलैच्या मोर्चाकडे लक्ष
दरम्यान, ठाकरे बंधूंच्या या संयुक्त आंदोलनामुळे महाराष्ट्राच्या राजकारणात नव्या चर्चेला सुरुवात झाली आहे. राज ठाकरे आणि उद्धव ठाकरे एकत्र येऊन विद्यार्थ्यांच्या प्रश्नासाठी आंदोलन करत असल्याने या मोर्चाला मोठे महत्त्व प्राप्त झाले आहे.
२६ जुलै रोजी मुंबईतील शिवाजी पार्कपासून सिद्धिविनायक मंदिरापर्यंत निघणाऱ्या मोर्चात किती मोठ्या संख्येने विद्यार्थी, पालक आणि नागरिक सहभागी होतात, तसेच महाविकास आघाडीतील इतर पक्ष या आंदोलनात प्रत्यक्ष सहभागी होतात का, याकडे सर्वांचे लक्ष लागले आहे. NEET पेपरफुटी आणि विद्यार्थ्यांच्या आंदोलनाचा मुद्दा आता महाराष्ट्राच्या राजकारणातही केंद्रस्थानी आला असून, २६ जुलैचा मोर्चा आगामी काळातील राजकीय समीकरणांवरही परिणाम करणारा ठरतो का, हे पाहणे महत्त्वाचे ठरणार आहे.
