नागपूर : विज्ञान आणि तंत्रज्ञानाच्या युगात देश वेगाने पुढे जात असताना समाजातील अंधश्रद्धा अजूनही किती खोलवर रुजलेली आहे, याचं अस्वस्थ करणारं उदाहरण नागपुरात समोर आलं आहे. इलेक्ट्रॉनिक्स अँड टेलिकम्युनिकेशनमध्ये इंजिनिअर असलेल्या 28 वर्षीय रिया गंधेवार या तरुणीच्या मृत्यूनंतर तिच्या आईने केलेल्या गंभीर आरोपांमुळे संपूर्ण नागपूर हादरलं आहे.
रिया गंधेवार हिचं लग्न 20 नोव्हेंबर 2021 रोजी गडचिरोली जिल्ह्यातील सुमित गंधेवार याच्याशी झालं होतं. सुमित हा सुशिक्षित असून कंत्राटदार म्हणून काम करतो. त्याचे वडील पोलीस विभागातून सेवानिवृत्त अधिकारी असल्याची माहिती समोर आली आहे. उच्चशिक्षित आणि प्रतिष्ठित कुटुंब असूनही रियावर अंधश्रद्धेच्या नावाखाली मानसिक दबाव आणला जात होता, असा गंभीर आरोप तिच्या माहेरच्यांनी केला आहे.
डिप्रेशनवर डॉक्टर नाही, ‘महाराज’ उपचार?
लग्नानंतर काही काळातच रियाला डिप्रेशनचा त्रास सुरू झाला होता. सामान्यतः अशा परिस्थितीत मानसोपचार तज्ज्ञ किंवा डॉक्टरांचा सल्ला घेतला जातो. मात्र, रियाच्या आईच्या म्हणण्यानुसार, सासरच्या मंडळींनी वैद्यकीय उपचारांऐवजी एका तथाकथित महाराजांचा आधार घेतला.
Related News
“हे सर्व खोटं आहे”; रेल्वे आंदोलन प्रकरणात राज ठाकरे यांचा कोर्टात दावा
एकनाथ शिंदेंचा मोठा निर्णय; मंत्र्यांना ताफा कमी करण्याचे निर्देश, EV वापर अनिवार्य?
थरारक VIDEO! पर्यटकांच्या गाडीसमोर सिंहीणीची LIVE शिकार, 5 मिनिटांत गाय संपवली
नांदेड हादरलं! मेव्हण्याच्या लग्नात पत्नीची हत्या करून पतीची आत्महत्या; 3 चिमुकली मुलं झाली पोरकी
प्रादेशिक वन विभागाच्या जंगलातील दुहेरी मृत्यूचे गूढ अखेर उलगडले.
NEET Paper Leak 2026 : CBIचा मोठा स्फोटक खुलासा! अहिल्यानगरातून आणखी 1 संशयित ताब्यात
26°C वर मिळू शकते 20% पर्यंत वीज बचत; तज्ज्ञांनी सांगितला Powerful फॉर्म्युला AC सोबत Fan चालवावा की नाही?
इरशाळवाडीत ट्रेकिंगदरम्यान डोंबिवलीतील 20 वर्षीय तरुणाचा दुर्दैवी मृत्यू;
नाशिकच्या नामांकित आयटी कंपनीवर गंभीर आरोप; स्टॉकिंग, बुलिंग आणि धार्मिक दबावाचा दावा
गडचिरोली जिल्ह्यातील चामोर्शी तालुक्याजवळील हरणघाट येथील कार्तिक स्वामी महाराजांकडे रियाला वारंवार नेलं जात होतं. तिला आठ ते दहा दिवस मंदिरात राहण्यास भाग पाडलं जात असल्याचा आरोप आहे. या गोष्टीला रियाने विरोध केला असता तिच्यावर मानसिक दबाव आणण्यात येत होता, असा दावा कुटुंबीयांनी केला आहे.
जेवणात टाकली जात होती विभूती?
या प्रकरणातील सर्वात धक्कादायक बाब म्हणजे रियाच्या जेवणात चोरून विभूती मिसळली जात होती, असा आरोप तिच्या आईने केला आहे. रियाच्या सासरच्या मंडळींचा असा समज होता की लग्न करताना कुंडली जुळवली गेली नाही आणि त्यामुळे भविष्यात होणारी मुले अपंग किंवा गंभीर आजारांनी ग्रस्त जन्माला येतील.
हा विचार त्या तथाकथित महाराजांनीच त्यांच्या मनात भरवला होता, असा आरोप करण्यात आला आहे. त्यामुळे रियाला सतत भीती, मानसिक तणाव आणि अपराधीपणाची भावना दिली जात होती.एका उच्चशिक्षित इंजिनिअर तरुणीला अशा अंधश्रद्धाळू वातावरणात राहावं लागणं, ही बाब अनेकांना अस्वस्थ करणारी ठरत आहे.
मानसिक छळामुळे माहेरी परतली?
रियाच्या आईच्या माहितीनुसार, सततच्या मानसिक त्रासामुळे आणि संशयास्पद धार्मिक दबावामुळे रियाला अखेर सासर सोडून माहेरी यावं लागलं होतं.रियाने तिच्या जवळच्या लोकांकडे अनेकदा मानसिक तणावाबद्दल बोलून दाखवलं होतं. मात्र, संसार टिकावा आणि परिस्थिती सुधारेल या आशेने ती सर्व सहन करत राहिली, असं सांगितलं जात आहे.
व्हायरल व्हिडिओंनी वाढवल्या शंका
रियाच्या मृत्यूनंतर सोशल मीडियावर काही व्हिडिओ व्हायरल झाले आहेत. या व्हिडिओंमध्ये रिया अत्यंत भावनिक अवस्थेत रडताना दिसत आहे. ती आपल्या पतीला फोन उचलण्याची आणि घरी येण्याची विनंती करताना ऐकू येते.हे व्हिडिओ पाहिल्यानंतर अनेकांनी सोशल मीडियावर संताप व्यक्त केला आहे. “एक शिक्षित मुलगी इतकी हतबल का झाली?”, “तिच्या मानसिक स्थितीसाठी जबाबदार कोण?” असे प्रश्न आता उपस्थित होत आहेत.
मेंदू ज्वराने मृत्यू, पण प्रश्न कायम
रिया गंधेवार हिचा 10 एप्रिल 2026 रोजी नागपुरात मेंदू ज्वरामुळे मृत्यू झाल्याची माहिती समोर आली आहे. मात्र, तिच्या मृत्यूनंतर समोर आलेले आरोप, व्हिडिओ आणि कुटुंबीयांची भूमिका यामुळे या प्रकरणाला वेगळंच वळण मिळालं आहे.तिच्या आईने सासरच्या मंडळींवर मानसिक छळ आणि अंधश्रद्धेच्या माध्यमातून दबाव टाकल्याचा गंभीर आरोप केला आहे. त्यामुळे या संपूर्ण प्रकरणाची चौकशी व्हावी, अशी मागणी आता जोर धरू लागली आहे.
सुशिक्षित समाजातील अंधश्रद्धेचं भयावह वास्तव
ही घटना केवळ एका कुटुंबापुरती मर्यादित नाही. विज्ञान, शिक्षण आणि आधुनिकतेच्या गप्पा मारणाऱ्या समाजात आजही अंधश्रद्धेच्या नावाखाली महिलांवर मानसिक दबाव आणला जात असल्याचं हे उदाहरण मानलं जात आहे.मानसिक आरोग्याचा प्रश्न असताना वैद्यकीय उपचारांऐवजी तथाकथित बाबांवर विश्वास ठेवला जाणं, ही चिंतेची बाब असल्याचं मत तज्ज्ञ व्यक्त करत आहेत.समाजात आजही कुंडली, ग्रहदोष, चमत्कार, विभूती आणि तथाकथित महाराज यांच्या नावावर अनेक कुटुंबांचे निर्णय घेतले जातात. त्याचा सर्वाधिक फटका महिलांना बसत असल्याचं अनेक सामाजिक कार्यकर्त्यांचं म्हणणं आहे.
चौकशीची मागणी
रिया गंधेवार प्रकरणानंतर नागपूर आणि गडचिरोली परिसरात मोठी चर्चा सुरू झाली आहे. सोशल मीडियावर अनेकांनी या घटनेची निष्पक्ष चौकशी करण्याची मागणी केली आहे.दरम्यान, पोलिसांकडून या प्रकरणात अधिकृत माहिती समोर आलेली नसली तरी रियाच्या कुटुंबीयांनी केलेले आरोप अत्यंत गंभीर मानले जात आहेत.या घटनेमुळे पुन्हा एकदा अंधश्रद्धा निर्मूलन, मानसिक आरोग्य जागरूकता आणि महिलांच्या सुरक्षिततेचा प्रश्न ऐरणीवर आला आहे.
