CM Devendra Fadnavis : ‘शत्रूला भारताची ताकद माहिती आहे, म्हणून तरुणांना व्यसनाधीन करण्याचं षडयंत्र’; फडणवीसांचा गंभीर दावा
‘नशामुक्त मुंबई’ अभियानाचा शुभारंभ; ड्रग्जविरोधात सामूहिक लढ्याचं आवाहन, विद्यार्थ्यांना दिली ड्रग्समुक्त समाजाची शपथ
महाराष्ट्र शासनाच्या वतीने राबविण्यात येणाऱ्या ‘नशामुक्त मुंबई‘ अभियानाचा शुभारंभ मुख्यमंत्री देवेंद्र फडणवीस यांच्या हस्ते वरळी येथील सरदार वल्लभभाई पटेल स्टेडियम डोममध्ये करण्यात आला. यावेळी हजारो शालेय विद्यार्थ्यांच्या उपस्थितीत मुख्यमंत्री फडणवीस यांनी ड्रग्जमुक्त समाजाची शपथ दिली. या कार्यक्रमात बोलताना त्यांनी व्यसनाधीनतेविरोधात कठोर भूमिका मांडत, भारताची वाढती ताकद पाहून देशातील तरुणांना व्यसनाधीन करण्याचा प्रयत्न सुरू असल्याचा गंभीर दावा केला.
मुख्यमंत्री फडणवीस म्हणाले की, भारत आज जगातील चौथी सर्वात मोठी अर्थव्यवस्था बनत आहे. अवकाश संशोधन, कृत्रिम बुद्धिमत्ता (AI), संरक्षण क्षेत्र आणि आधुनिक तंत्रज्ञानात देशाने मोठी झेप घेतली आहे. अशा परिस्थितीत भारताची प्रगती रोखण्यासाठी देशातील तरुण पिढीला लक्ष्य करण्याचा प्रयत्न होत असल्याचे त्यांनी सांगितले.
’21-22 वर्षांपर्यंत व्यसनांपासून दूर राहिलात तर आयुष्यभर सुरक्षित राहाल’
विद्यार्थ्यांशी थेट संवाद साधताना मुख्यमंत्री फडणवीस यांनी व्यसनांपासून दूर राहण्याचे महत्त्व पटवून दिले. ते म्हणाले, “21 ते 22 वर्षांपर्यंत जर आपण कोणत्याही प्रकारच्या व्यसनांपासून दूर राहिलो, तर पुढे आयुष्यात त्या गोष्टींकडे वळण्याची शक्यता अत्यंत कमी असते. त्यामुळे कोणताही मित्र किंवा व्यक्ती कितीही आमिष दाखवत असेल तरी ठामपणे ‘नाही’ म्हणायला शिका.”
Related News
ठाकरे बंधू अन् CM फडणवीस यांच्यात बंद दाराआड काय शिजलं? गुलाबराव पाटलांनी एका वाक्यात सांगितलं!
लाडक्या बहिणींसाठी दिवाळी गिफ्ट! 81 लाख महिलांना मिळणार 1500 रुपये? फडणवीसांचे मोठे आश्वासन
नवनाथ बन यांचा रविंद्र धंगेकरांवर संतापजनक हल्लाबोल ; 12 पक्ष फिरलेला माकडछाप!
FD मध्ये गुंतवणूक करणाऱ्यांसाठी मोठी बातमी! 5 बँकांमध्ये मिळतेय 7.5% पर्यंत व्याज
2029 पर्यंत फडणवीस मुख्यमंत्री राहणार? संजय राऊतांनी सांगितला एप्रिल-मेचा राजकीय प्लॅन!
अमेरिकेत हवेतच दोन हेलिकॉप्टरची समोरासमोर धडक! तिघांचा जागीच मृत्यू, भीषण अपघाताने खळबळ
दिवाळीपूर्वी FDA ॲक्शन मोडमध्ये! 1,057 आस्थापनांची तपासणी, 94 परवाने निलंबित
ठाण्यात प्रदीप पूर्णेकर हत्या प्रकरणाचा भडका! राजन विचारे संतप्त, पोलिसांना विचारले ५ थेट सवाल
33 हजार मतांचा दावा, नितेश कराळे मास्तरांनी स्पष्ट केली पुढची राजकीय भूमिका ; भाजपला मोठा धक्का!
5 पैकी 3 जागांवर विजय हर्षदा देशमुखांचा बोगस मतदानाबाबत गंभीर आरोप
नागपूरमध्ये काँग्रेसचा ऐतिहासिक विजय! हर्षवर्धन सपकाळांचा भाजपवर 5 मोठे आरोप
प्री-वेडिंग शूटदरम्यान फुग्यांसोबत हवेत उडाली नवरी; 1 फोटोशूट आणि जीवघेणा थरार!
ते पुढे म्हणाले, “कोणी ड्रग्जमध्ये मजा आहे असे सांगत असेल, तर त्याला स्पष्ट सांगा की ती मजा नसून ती सजा आहे. व्यसन आयुष्य उद्ध्वस्त करते. त्यामुळे स्वतःही दूर राहा आणि इतरांनाही त्यापासून वाचवा.”
मुख्यमंत्र्यांनी विद्यार्थ्यांनी घेतलेली ड्रग्जविरोधी शपथ ही केवळ औपचारिकता नसून ती आयुष्यभर पाळण्याची जबाबदारी असल्याचेही स्पष्ट केले.
‘नशामुक्त भारत’ संकल्प पूर्ण करण्यासाठी महाराष्ट्राची भूमिका महत्त्वाची
पंतप्रधान नरेंद्र मोदी यांनी दिलेल्या ‘नशामुक्त भारत’ या संकल्पाचा उल्लेख करत मुख्यमंत्री फडणवीस म्हणाले की, महाराष्ट्रानेही या अभियानात अग्रभागी राहणे आवश्यक आहे.
“मुंबई आणि महाराष्ट्र ड्रग्जमुक्त झाले तर त्याचा मोठा सकारात्मक संदेश संपूर्ण देशात जाईल. सरकार, पोलीस, शैक्षणिक संस्था आणि समाज यांनी एकत्र येऊन हे अभियान यशस्वी करणे गरजेचे आहे,” असे ते म्हणाले.
‘भारताची प्रगती रोखण्यासाठी तरुणांना लक्ष्य केलं जात आहे’
भारताच्या वाढत्या जागतिक प्रभावाचा उल्लेख करत मुख्यमंत्री फडणवीस म्हणाले की, आज भारत विज्ञान, तंत्रज्ञान, AI, संरक्षण आणि अवकाश संशोधनात मोठी कामगिरी करत आहे. चंद्राच्या दक्षिण ध्रुवावर यशस्वीरीत्या पोहोचणाऱ्या मोजक्या देशांमध्ये भारताचा समावेश झाला आहे.
ते म्हणाले, “ऑपरेशन सिंदूरसारख्या कारवायांमधूनही भारताने आपली ताकद जगाला दाखवून दिली आहे. हा जुना भारत नाही, तर नवा आणि सक्षम भारत आहे. भारतावर थेट हल्ला करणे सोपे नाही, हे आपल्या शत्रूंनाही माहिती आहे.”
‘भारताला आतून पोकळ करण्याचं छुपं युद्ध सुरू’
मुख्यमंत्री फडणवीस यांनी यावेळी गंभीर दावा करत सांगितले की, भारताची तरुणाई ही देशाची सर्वात मोठी ताकद आहे आणि त्याच ताकदीला कमकुवत करण्यासाठी ड्रग्जचा वापर केला जात आहे.
“भारताला थेट पराभूत करणे शक्य नसल्याचे शत्रूंना समजले आहे. त्यामुळे आता देशाला आतून पोकळ करण्याचे षडयंत्र सुरू आहे. ज्या तरुणांच्या जोरावर भारत महासत्ता बनू शकतो, त्याच तरुणांना व्यसनाधीन करून त्यांची ऊर्जा आणि क्षमता नष्ट करण्याचा प्रयत्न सुरू आहे. हे एक छुपे युद्ध आहे,” असा दावा त्यांनी केला.
त्यांनी सांगितले की, ड्रग्ज हे केवळ अमली पदार्थ नसून भविष्यातील पिढी उद्ध्वस्त करण्याचे शस्त्र बनले आहे. त्यामुळे या संकटाकडे केवळ कायदा-सुव्यवस्थेचा प्रश्न म्हणून न पाहता सामाजिक चळवळ म्हणून पाहणे आवश्यक आहे.
‘ड्रग्जविरोधात सामूहिक युद्ध छेडावे लागेल’
ड्रग्जमुक्त समाजासाठी प्रत्येक नागरिकाने पुढे येण्याचे आवाहन करत मुख्यमंत्री फडणवीस म्हणाले की, ही केवळ सरकार किंवा पोलिसांची लढाई नाही.
“विद्यार्थी, पालक, शिक्षक, शाळा, महाविद्यालये, स्वयंसेवी संस्था आणि समाजातील प्रत्येक घटकाने एकत्र येऊन ड्रग्जविरोधात सामूहिक युद्ध छेडले पाहिजे. काही लोक पैशांच्या मोहापोटी या रॅकेटमध्ये सहभागी होत आहेत. अशा शक्तींना समाजानेही साथ देऊ नये,” असे त्यांनी सांगितले.
त्यांच्या मते, व्यसनमुक्तीची लढाई यशस्वी करण्यासाठी जनजागृती आणि कठोर कायदेशीर कारवाई या दोन्ही गोष्टी समान महत्त्वाच्या आहेत.
शाळा आणि महाविद्यालयांभोवती विशेष कारवाईचे निर्देश
मुख्यमंत्री फडणवीस यांनी यावेळी पोलिसांच्या भूमिकेवरही भाष्य केले. ड्रग्जची विक्री आणि पुरवठा रोखण्यासाठी राज्यभर कठोर कारवाई सुरू असल्याचे त्यांनी सांगितले.
“शाळा आणि महाविद्यालयांच्या परिसरात ड्रग्जची विक्री करणाऱ्यांना शोधून काढून त्यांच्यावर कठोर कारवाई केली जाईल. अशा आरोपींना थेट तुरुंगात पाठविणे आवश्यक आहे. पोलिस, अन्न व औषध प्रशासन आणि इतर संबंधित विभाग समन्वयाने काम करत आहेत,” असे त्यांनी स्पष्ट केले.
‘दोन ते तीन वर्षांत ड्रग्जमुक्त महाराष्ट्राचे लक्ष्य’
आपल्या भाषणाच्या शेवटी मुख्यमंत्री फडणवीस यांनी ड्रग्जमुक्त महाराष्ट्राचे लक्ष्य निश्चित केले. समाजाने सहकार्य केल्यास पुढील दोन ते तीन वर्षांत राज्याला मोठ्या प्रमाणात ड्रग्जमुक्त करण्यात यश मिळू शकते, असा विश्वास त्यांनी व्यक्त केला.
“विद्यार्थ्यांनी जर ठामपणे ‘नो ड्रग्स’चा संकल्प केला, तर ड्रग्ज विकणाऱ्यांची हिंमत होणार नाही. समाज आणि प्रशासनाने एकत्रित प्रयत्न केल्यास पुढील दोन ते तीन वर्षांत ड्रग्जमुक्त मुंबई आणि महाराष्ट्र घडविण्याचे उद्दिष्ट आपण निश्चितच साध्य करू,” असे मुख्यमंत्री देवेंद्र फडणवीस यांनी सांगितले.
‘नशामुक्त मुंबई’ अभियानाच्या माध्यमातून राज्य सरकारने व्यसनमुक्त समाज घडविण्यासाठी व्यापक जनजागृती, प्रतिबंधात्मक उपाययोजना आणि कठोर अंमलबजावणीचा निर्धार व्यक्त केला असून, या अभियानात विद्यार्थी आणि पालकांची भूमिका सर्वात महत्त्वाची असल्याचा संदेशही मुख्यमंत्री फडणवीस यांनी दिला.
