अखिल भारतीय काँग्रेस कमिटीच्या ’संघटन सृजन अभियाना’अंतर्गत यवतमाळ जिल्हा काँग्रेस कमिटीच्या अध्यक्षपदी अॅड. सचिन नाईक यांची नव्याने नियुक्ती करण्यात आली आहे. नवनियुक्त जिल्हाध्यक्ष अॅड. सचिन नाईक यांनी आज (दि. 27) ’दैनिक अजिंक्य भारत’च्या यवतमाळ आवृत्ती कार्यालयाला सदिच्छा भेट दिली. याप्रसंगी त्यांच्यासोबत राजीव गांधी पंचायत राज संघटनचे प्रदेशाध्यक्ष संजय ठाकरे, महाराष्ट्र प्रदेश काँग्रेस कमिटीचे उपाध्यक्ष आरीज बेग आणि प्रदेश काँग्रेस कमिटीचे महासचिव प्रा. संजय वानखेडे उपस्थित होते. या सदिच्छा भेटीदरम्यान त्यांनी जिल्ह्याची राजकीय परिस्थिती, पक्षापुढील आव्हाने आणि भविष्यातील रणनीती यावर ’अजिंक्य-संवाद’ या विशेष कार्यक्रमात दिलखुलास संवाद साधला.
याप्रसंगी बोलताना अॅड. नाईक म्हणाले की, सर्वप्रथम मी पक्षाच्या राष्ट्रीय, राज्य आणि जिल्हा पातळीवरील वरिष्ठ नेतृत्वाचे मनापासून आभार मानतो. अखिल भारतीय काँग्रेस कमिटीने देशभरात ’संघटन सृजन अभियान’राबविले. त्याचे पडसाद आपल्या महाराष्ट्रात आणि यवतमाळ जिल्ह्यातही उमटले. पक्षाचे केंद्रीय निरीक्षक संजय कपूर यांनी आपल्या जिल्ह्यात तब्बल 8 ते 10 दिवस मुक्काम ठोकून संपूर्ण दौरा केला. तळागाळातील परिस्थिती समजून घेतल्यानंतर पक्षाने माझ्यावर हा विश्वास टाकला आहे. ’बुडत्याला काठीचा आधार’ म्हणतात, तसे आज जनतेला काँग्रेसकडून मोठ्या अपेक्षा आहेत.
येणार्या काळात काँग्रेस पक्ष यवतमाळ जिल्ह्यात कसा अधिक सर्वसमावेशक होईल, यावर माझा भर असेल. ज्या तरुण-तरुणंीमध्ये सामाजिक समज आणि कर्तृत्व आहे, अशा हिर्यांचा शोध घेऊन त्यांना संघटनेत योग्य स्थान दिले जाईल. यवतमाळ जिल्हा हा प्रामुख्याने एकेकाळचा काँग्रेसचा बालेकिल्ला असून या जिल्ह्यात मागासवर्गीय, आदिवासी, अनुसूचित जाती, विमुक्त व भटक्या जमाती आणि 18 अलुतेदार-बलुतेदारांचा जिल्हा आहे. ’पाचही बोटे सारखी नसतात’, त्यामुळे समाजातल्या या वंचित घटकांना त्यांचे घटनात्मक अधिकार मिळवून देणे हे आमचे कर्तव्य आहे. शासनाच्या ज्या काही वर्तमान योजना आणि कायदे आहेत, त्यांचा थेट लाभ या घटकांपर्यंत पोहोचवून त्यांचे जीवनमान उंचाविण्यासाठी काँग्रेस पक्ष संपूर्ण ताकदीने मैदानात उतरेल.
Related News
अजितदादांनी दिलेला शब्द अधुराच? सयाजी शिंदेंची खंत; ‘40 आमदार, 4 लाख झाडं’ मोहिमेला मिळणार का नवा आधार?
“पनौती” म्हणत हर्षवर्धन सपकाळांची जहरी टीका! 5 मोठे आरोप करत मोदींवर प्रहार
शरद पवार पुन्हा ब्रीच कँडी रुग्णालयात दाखल ; हॉस्पिटलमध्ये 3 महत्त्वाच्या तपासण्या
Pune Congress Crisis : सतेज पाटीलांवर जहरी पोस्टरबाजी, काँग्रेसमधील अंतर्गत संघर्षाचे 7 धक्कादायक पैलू
40 वर्षांपूर्वी मधु दंडवते यांनी घेतला ऐतिहासिक निर्णय; रेल्वे प्रवाशांचे बदलले नशीब
Eknath Shinde : ‘सूर्यावर थुंकण्याचा प्रकार’; मोदींवरील टीकेनंतर शिंदेंचे 7 स्फोटक विधान
5 कारणांमुळे चर्चेत आलेला ‘अशोक खरात’ चित्रपट; दीपाली सय्यद यांच्या वक्तव्याने वाढली उत्सुकता
रोहित पवारांचा खळबळजनक दावा ; “100 कोटींचा घोडेबाजार होऊ शकतो”;
याप्रसंगी अॅड. सचिन नाईक पुढे म्हणाले की, आज ’दोन दगडांवर पाय’ ठेवून चालणार्या सत्ताधार्यांसमोर लोकशाही टिकविणे हेच सर्वांत मोठे आव्हान आहे. राज्यातील आणि केंद्रातील विद्यमान सरकार सातत्याने संविधानाला पायदळी तुडवून केवळ स्वतःच्या सत्तेचे राजकारण करत आहे. हे देशाच्या लोकशाही समोरील मोठे संकट आहे. पण ’थेंबे थेंबे तळे साचे’ या उक्तीप्रमाणे आम्ही नियोजनबद्ध पद्धतीने जनतेची शक्ती एकवटून या संविधानविरोधी प्रवृत्तींना चोख उत्तर देणार आहोत. कार्यकर्त्यांसाठी मूलभूत पायाभूत सुविधा उभारण्यासोबतच, जनतेशी बांधील असणारे एक मजबूत आणि उत्तरदायी संघटन आम्ही उभे करत आहोत. महागाई, बेरोजगारी, शेतकरी आत्महत्या आणि खतांचा तुटवडा यांमुळे जनता होरपळत आहे. मात्र, ’काँग्रेस जनतेच्या प्रश्नांपासून दूर गेली आहे’ असा आरोप नेहमी होतो, यावर तुम्ही काय सांगाल?
या प्रश्नांच्या उत्तरात अॅड. सचिन नाईक यांनी सांगितले की, ’हा केवळ विरोधकांचा अपप्रचार आहे. आज सरकारच्या चुकीच्या धोरणांमुळे शेतकरी, कष्टकरी आणि तरुणांमध्ये तीव्र असंतोष आहे. या घटकांसाठी असणारे घटनात्मक बजेटही हे सरकार देऊ शकलेले नाही. ’लोका सांगे ब्रह्मज्ञान, स्वतः कोरडे पाषाण’ अशी सध्याच्या सरकारची अवस्था आहे. आम्ही या सर्व अन्यायाविरुद्ध थेट जनतेमध्ये जाऊन एक मोठा ’जनआक्रोश’ निर्माण करू. लोकांमध्ये जनजागृती मोहीम राबवून, काँग्रेस पक्ष पीडितांच्या खांद्याला खांदा लावून उभा राहील. येणार्या काळात काँग्रेस हा जनतेचा बुलंद आवाज बनेल.
काँग्रेस विरोधी पक्ष म्हणून आक्रमक आंदोलने करताना दिसत नाही, असा एक सूर आहे. भविष्यात पक्ष आंदोलनात्मक भूमिका घेणार का? यावर बोलताना अॅड. नाईक म्हणाले की,’नक्कीच! ’अति तिथे माती’ या न्यायाने आता सरकारच्या मनमानीविरुद्ध आम्ही रस्त्यावर उतरण्यास सज्ज आहोत. जिल्ह्यात सध्या पीकविम्याचा मोठा प्रश्न आहे. आम्ही सरकारला एका विशिष्ट कालमर्यादेचा इशारा दिला आहे; अन्यथा काँग्रेस शेतकर्यांसह तीव्र आंदोलन छेडेल. आदिवासी आणि दलितांच्या बजेटमध्ये सरकारने मोठी कपात केली आहे, तो निधी तत्काळ मिळवण्यासाठी आम्ही संघर्ष करू. जिल्ह्यातील सिंचन प्रकल्प वर्षानुवर्षे रखडले असून ते केवळ 20-25 टक्के क्षमतेने चालत आहेत. ते 100 टक्के क्षमतेने सुरू करून शेतकर्यांच्या पदरात पाणी पाडणे हे आमचे उद्दिष्ट आहे. शहरांच्या डीपीआरमध्ये सामान्यांचे आरक्षण टिकविणे, या सर्व मुद्यांवर काँग्रेस आता कमालीची सक्रिय होईल. पक्ष संघटनेच्या बळकटीकरणासाठी आणि आगामी स्थानिक स्वराज्य संस्थांच्या निवडणुकांसाठी काय नियोजन आहे? या प्रश्नाच्या उत्तरात ते म्हणाले की, ’आम्ही नव्याने ’संघटन सृजन कार्यक्रम’हाती घेत आहोत.
प्रत्येक तालुक्यामध्ये मुख्य ब्लॉक काँग्रेस अध्यक्षांसोबतच युवक काँग्रेस, एनएसयूआय, महिला काँग्रेस आणि सेवा दल या चारही आघाड्यांचे नवे अध्यक्ष नियुक्त केले जातील. तसेच एससी, एसटी, ओबीसी आणि मायनॉरिटी सेलमध्ये नव्या दमाच्या नियुक्त्या करून एक अत्यंत ऊर्ध्वगामी आणि जिवंत संघटना तयार केली जाईल.
सध्या स्थानिक स्वराज्य संस्थांच्या निवडणुकांसंदर्भात ’एसआयआर’ची प्रक्रिया सुरू आहे. निवडणूक आयोग सरकारच्या इशार्यावर काम करत असल्यासारखे चित्र आहे. त्यांनी 75 टक्के मतदार असल्याचा एक नियम लावला, पण वास्तविक पाहता या जिल्ह्यात 79 टक्के लोकसंख्या ग्रामीण भागात राहते आणि केवळ 21 टक्के शहरी आहे. मग या 79 टक्के ग्रामीण जनतेच्या प्रतिनिधींना स्थानिक स्वराज्य संस्थेत मतदानाचा अधिकार का नाकारला जात आहे? असा प्रश्नही अॅड. नाईक यांनी याप्रसंगी उपस्थित केला. ’घाईचे काम आणि नशिबाचे तीन टक्के’ अशी सरकारची अवस्था झाली आहे. जिल्हा परिषद, पंचायत समितीच्या निवडणुका आधी घेऊन मग ही प्रक्रिया करता आली असती, पण भाजप सरकारला माहीत आहे की ग्रामीण जनता त्यांच्या विरोधात आहे.
हा लोकशाहीचा गळा घोटण्याचा प्रकार आम्ही हाणून पाडू. नव्या पिढीतील तरुणांना काँग्रेसच्या विचारसरणीकडे आकर्षित करण्यासाठी तुमच्याकडे काय ठोस उपाययोजना आहेत? याबाबत नाईक म्हणाले की, ’तरुणांना आकर्षित करण्यासाठी आम्ही ’सर्वोदय संकल्प शिबिर’ आणि ’संविधानाच्या रस्त्याने’(संविधान के रास्ते) यांसारखे छोटे पण प्रभावी कार्यक्रम सुरू करत असल्याचेही अॅड. नाईक यांनी यावेळी सांगितले.
तरुणांमध्ये राजकीय आणि सामाजिक जाणीव निर्माण करण्याचा संकल्प
आजच्या तरुणाईला ’संविधानाचा चष्मा’घालण्याची नितांत गरज आहे. तरुण वर्ग सध्या जात, धर्म आणि तात्पुरत्या प्रलोभनांच्या चुकीच्या प्रभावाखाली येऊन राजकारणाकडे पाहत आहे. यामुळे ’दिशाहीन’व्यवस्था निर्माण होते. तरुणांमध्ये राजकीय आणि सामाजिक जाणीव निर्माण करण्यासाठी जिल्हा काँग्रेस कमिटीने कंबर कसली आहे. येत्या वर्षभरात जिल्ह्यातील किमान 1,000 तरुण-तरुणींना घटनात्मक दृष्टिकोनातून व्यवस्थेकडे पाहण्याचे विशेष प्रशिक्षण देण्याचा आमचा ठाम मानस आहे. ’तरुणांच्या हाताला काम आणि डोक्यात संविधानाचा विचार’हीच आमची खरी शक्ती असेल, असे मतही यावेळी जिल्हाध्यक्ष अॅड. सचिन नाईक यांनी व्यक्त केले.
