तालुक्यातील सोनाळा गावातील क्रांतीसुर्य महात्मा ज्योतिबा फुले चौकात १४ जानेवारी रोजी मकर संक्रांतीच्या दिवशी सायंकाळी साडेतीन वाजेच्या सुमारास एक ढोक गिधाड पक्षी आढळल्याचे पाहून नागरिकांच्या उत्सुकतेने गर्दी केली. स्थानिकांना हा दुर्मिळ पक्षी पाहण्याची संधी मिळाल्याने परिसरात मोठ्या प्रमाणावर गर्दी झाली होती.
घडलेल्या घटनेवर तत्काळ वनविभागाने लक्ष केंद्रीत केले. वन्यजीव विभागाच्या तज्ञांच्या मार्गदर्शनाखाली पक्ष्याचे रेस्क्यू करण्यात आले. पशुवैद्यकीय तपासणीसाठी गिधाड सोनाळा येथे आणण्यात आला, जिथे त्याची संपूर्ण वैद्यकीय तपासणी झाली. तपासणीत पक्ष्याची टॅगिंग नंबर E96 व M89 असल्याचे आढळले. पशुवैद्यकीय अधिकारी यांनी सांगितले की पक्षी सध्या स्वस्थ असून त्याचे आरोग्य योग्य स्थितीत आहे.
रेस्क्यू प्रक्रियेत डॉ. प्रमोद जाधव (पशुवैद्यकीय अधिकारी, सोनाळा), अजय बावणे (वन परिक्षेत्र अधिकारी, सोनाळा), राहुलसिंह तोलिया (DYCF, अकोट वन्यजीव विभाग) व गणेश टेकाडे (स. व. स., अकोट) यांनी मार्गदर्शन केले. याशिवाय, कपिल मोरे (वनरक्षक, सालवन बिट), पी. ए. जगरवाल (वनरक्षक, पिंगळी बिट), एन. वाय. पळसपगार (सोनाळा परीक्षेत्र) तसेच चेतन वर्मा, सुनिल सखाराम खिराळे, आरिफ केदार आणि सुमित भास्कर या वनसेवकांनी सहभाग घेतला.
सोनाळा येथून पक्ष्याला सुरक्षितपणे गिधाड संशोधन केंद्र, सोमठाणा येथे नेण्यात आले, जिथे त्यावर पुढील वैज्ञानिक निरीक्षण सुरू राहणार आहे. वन्यजीव तज्ञांनी नागरिकांना सांगितले की या दुर्मिळ पक्ष्याचे संरक्षण करण्यासाठी जागरूकता निर्माण करणे महत्त्वाचे आहे आणि कधीही पक्ष्यांजवळ हस्तक्षेप न करण्याचे आवाहन केले आहे.
