Nagpur : आयुष्यातील सर्वात भीषण प्रसंग डोळ्यांसमोर घडला आणि एका क्षणात संपूर्ण कुटुंब उद्ध्वस्त झालं. लहान वयात आई गमावलेली आकांक्षा (नाव बदललेले) आधीच दुःखात होती. पण तिच्या आयुष्यात आणखी एक काळरात्र आली आणि त्या घटनेने तिच्या उरलेल्या नात्यांचाही अंत झाला. मात्र, एवढ्या मोठ्या मानसिक धक्क्यानंतरही या मुलीने हार मानली नाही. जिद्दीने अभ्यास करत तिने दहावीच्या परीक्षेत 62 टक्क्यांपेक्षा अधिक गुण मिळवत स्वतःची वेगळी ओळख निर्माण केली आहे.
आकांक्षेची कहाणी सध्या नागपूर शहरात चर्चेचा विषय ठरत असून तिच्या संघर्षाने अनेकांच्या डोळ्यात पाणी आणले आहे. बालगृहातील कर्मचाऱ्यांच्या प्रेमाने, आधाराने आणि योग्य मार्गदर्शनाने ती पुन्हा उभी राहिली. आता तिला आयएएस अधिकारी बनून समाजासाठी काम करण्याचे स्वप्न आहे.
आईच्या मृत्यूनंतर आत्याचा आधार
आकांक्षेच्या लहानपणीच तिच्या आयुष्यात मोठं दुःख आलं होतं. तिच्या वडिलांवर पत्नीच्या हत्येचा आरोप होता आणि त्या प्रकरणात ते कारागृहात शिक्षा भोगत होते. आईच्या निधनानंतर आकांक्षाला तिच्या आत्याने स्वतःच्या मुलीसारखे सांभाळले. आजी, भाऊ आणि आत्याचे कुटुंब यांच्यासोबत ती पुन्हा आनंदाने जगू लागली होती.
Related News
CNG Rate Hike 2026: महाराष्ट्रात CNG दरवाढीचा जबरदस्त धक्का! एका रात्रीत 1.50 रुपयांनी वाढले भाव
पोलीस बंदोबस्तात वृक्षतोड? उपसरपंचाच्या इशाऱ्याने प्रशासन सतर्क
तामिळनाडूच्या राजकारणात राज्यपाल ठरणार गेमचेंजर
20 लाख फॉलोअर्स गायब! Instagram वर रातोरात मोठा बदल!
कल्याणमध्ये कचऱ्याचं साम्राज्य; नाल्यात उतरून क्रिकेट खेळत मनसेचं अनोखं आंदोलन
बीडमध्ये धक्कादायक प्रकार! मृत बाळ 22 तास आईच्या पोटातच; खासगी रुग्णालयावर गंभीर आरोप
इंदोरीकर महाराजांच्या मुलीच्या लग्नात 2.89 लाखांची धक्कादायक चोरी; 48 तासांत पोलिसांची मोठी कारवाई
आत्याने तिला कधीच आईची उणीव भासू दिली नाही. शाळा, अभ्यास, सण-उत्सव सगळं सुरळीत सुरू होतं. आकांक्षाही हळूहळू जुन्या दुःखातून सावरत होती. मात्र, नियतीला काही वेगळंच मान्य होतं.
एका रात्रीत संपलं संपूर्ण कुटुंब
कारागृहातून सुटल्यानंतर आकांक्षेच्या वडिलांनी रागाच्या भरात भीषण पाऊल उचलले. त्यांनी स्वतःची बहीण, मेहुणे, बहिणीची सासू, बहिणीचा मुलगा आणि स्वतःच्या मुलाचाही खून केला. त्या वेळी आकांक्षा घरातील दुसऱ्या खोलीत असल्यामुळे तिचा जीव वाचला.
या रक्तरंजित घटनेने आकांक्षाच्या मनावर प्रचंड मानसिक आघात झाला. बोलकी आणि हसतमुख असलेली मुलगी अचानक अबोल झाली. तिच्या डोळ्यांसमोर घडलेल्या त्या घटनेने तिचं आयुष्यच बदलून टाकलं.
नातेवाईकांनीही फिरवली पाठ
या घटनेनंतर आकांक्षाचा सांभाळ करण्यासाठी कोणतेही नातेवाईक पुढे आले नाहीत. शेवटी पोलिसांच्या मदतीने आणि बालकल्याण समितीच्या आदेशानुसार तिला नागपूरमधील शासकीय बालगृहात दाखल करण्यात आले.
सुरुवातीला आकांक्षा पूर्णपणे शांत आणि घाबरलेली होती. कोणाशी बोलत नव्हती. मात्र, बालगृहातील कर्मचाऱ्यांनी तिला कुटुंबासारखे प्रेम दिले. तिच्या मानसिक स्थितीची काळजी घेतली. अभ्यासात लक्ष घालण्यासाठी तिला प्रोत्साहन दिले.
बालगृह बनलं नवं कुटुंब
बालगृहातील अधीक्षिका कविता गेडाम, जिल्हा महिला व बालविकास अधिकारी सुनील मेसरे, जिल्हा बालकल्याण समितीच्या अध्यक्ष छाया राऊत, जिल्हा परीविक्षा अधिकारी चंद्रकांत बोंडे आणि जिल्हा बालसंरक्षण अधिकारी मुस्ताक पठाण यांच्या मार्गदर्शनाखाली आकांक्षेचा आत्मविश्वास वाढू लागला.
कर्मचाऱ्यांनी तिच्यासाठी अभ्यासाचे नियोजन केले. तिला नियमित मार्गदर्शन दिले. मानसिक आधार देत तिला नव्या आयुष्याची दिशा दाखवली. आकांक्षानेही मनापासून अभ्यास करत दहावीच्या परीक्षेत 62 टक्क्यांहून अधिक गुण मिळवले.
आज ती पुन्हा हसते, बोलते आणि मोठी स्वप्ने बघते. “मला आयएएस अधिकारी बनायचे आहे,” असे ती आत्मविश्वासाने सांगते.
17 मुलांनी मिळवले यश
नागपूरमधील बालगृहातील केवळ आकांक्षाच नाही, तर आणखी 17 मुलांनी यंदाच्या दहावीच्या परीक्षेत यश मिळवले आहे. यात 12 मुली आणि 5 मुलांचा समावेश आहे. कुटुंबाचा आधार नसतानाही या मुलांनी मेहनतीच्या जोरावर उल्लेखनीय यश संपादन केले.
प्रियदर्शिनी महिला वसतिगृहात राहणाऱ्या सरिता (नाव बदललेले) हिने 82 टक्के गुण मिळवत सर्वांचे लक्ष वेधले. या मुलांच्या यशामुळे बालगृहातील कर्मचारी आणि अधिकारीही भावूक झाले आहेत.
समाजासाठी प्रेरणादायी उदाहरण
आकांक्षेची कहाणी ही केवळ एका मुलीच्या यशाची कथा नाही, तर प्रतिकूल परिस्थितीतही हार न मानणाऱ्या जिद्दीची प्रेरणादायी गाथा आहे. आयुष्यात कितीही मोठे संकट आले तरी इच्छाशक्ती, योग्य मार्गदर्शन आणि माणुसकीचा आधार असेल तर कोणतीही व्यक्ती पुन्हा उभी राहू शकते, हे आकांक्षेने दाखवून दिले.
आज अनेक मुलांसाठी ती प्रेरणेचे प्रतीक बनली आहे. तिच्या यशामुळे समाजात बालगृहातील मुलांकडे पाहण्याचा दृष्टिकोनही बदलण्याची गरज अधोरेखित झाली आहे.
