Vanchit Maharashtra Bandh : वंचितच्या महाराष्ट्र बंदला कुठे कडकडीत तर कुठे संमिश्र प्रतिसाद; अनेक ठिकाणी कार्यकर्ते ताब्यात, जाणून घ्या राज्यातील स्थिती
Vanchit Maharashtra Bandh : दिल्लीतील जंतर-मंतर येथे विद्यार्थ्यांवर झालेल्या लाठीचार्जच्या निषेधार्थ वंचित बहुजन आघाडीचे नेते प्रकाश आंबेडकर यांनी आज Maharashtra Bandh ची हाक दिली आहे. या बंदला डाव्या आघाड्यांनीही पाठिंबा दिला आहे. दिल्लीतील विद्यार्थ्यांच्या आंदोलनाला समर्थन देण्यासाठी आणि त्यांच्या मागण्यांकडे केंद्र सरकारचे लक्ष वेधण्यासाठी हा बंद पुकारण्यात आला आहे. राज्यातील विविध जिल्ह्यांमध्ये या बंदला संमिश्र प्रतिसाद मिळत असून, काही ठिकाणी दुकाने बंद ठेवण्यात आली आहेत, तर काही भागांत वंचितचे कार्यकर्ते रस्त्यावर उतरून आंदोलन करत आहेत.
वंचित बहुजन आघाडीच्या Maharashtra Bandh च्या पार्श्वभूमीवर राज्यातील अनेक शहरांमध्ये पोलिसांनी खबरदारी म्हणून कडक बंदोबस्त तैनात केला आहे. काही ठिकाणी आंदोलन करण्याचा प्रयत्न करणाऱ्या कार्यकर्त्यांना पोलिसांनी ताब्यात घेतले आहे. त्यामुळे काही भागांत आंदोलक आणि पोलिसांमध्ये तणावाचे वातावरण निर्माण झाले आहे.
ठाण्यात वंचितचे कार्यकर्ते आक्रमक
ठाण्यातील इंदिरानगर परिसरात वंचित बहुजन आघाडीचे कार्यकर्ते आक्रमक झाल्याचे पाहायला मिळाले. महाराष्ट्र बंदच्या समर्थनार्थ कार्यकर्त्यांनी आंदोलन करण्याचा प्रयत्न केला. यावेळी पोलिसांनी हस्तक्षेप करत काही कार्यकर्त्यांना ताब्यात घेतले. पोलिसांच्या या कारवाईमुळे कार्यकर्त्यांनी नाराजी व्यक्त केली.
Related News
Gold Rate Today : सोन्याने पुन्हा घेतली भरारी! चांदीही महागली, आज 1 तोळा सोन्याचा भाव किती?
CJP Protest : ‘धर्मेंद्र प्रधान यांना राजीनामा द्यावा लागेल’; नरेंद्र मोदींच्या घोषणेनंतर CJPची थेट पोस्ट
Sameer Choughule : ‘मुलांची डोकी फुटताना बघून आनंदाच्या उकळ्या फुटत असतील तर समाज दुर्धर आजारी’; समीर चौघुलेंचा संताप
CJP Protest : ‘जंतरमंतरवरच यावं लागेल, त्यांच्या घरी जाऊन वेळ वाया घालवणार नाही’; आशुतोष रांका आक्रमक
Ashok Kharat : 100 रुपयांचे चिंचोके तब्बल 1 लाखांना विकले? ईडीच्या आरोपपत्रातून भोंदूबाबाचे धक्कादायक कारनामे उघड
Mumbai Protest : पोलिसांनी आंदोलकांना वॅनमध्ये भरलं, एकाने गेट उघडलं अन् सगळे उतरले; VIDEO व्हायरल
Delhi Protest : राजधानीत आंदोलनाचा भडका! 16 मेट्रो स्टेशन पुढील आदेशापर्यंत बंद, जाणून घ्या कोणती?
Maharashtra Bandh : दिल्लीतील लाठीचार्जचे महाराष्ट्रात पडसाद; प्रकाश आंबेडकरांची ‘महाराष्ट्र बंद’ची हाक
NEET Paper Leak : नीट पेपरफुटीवर मोदी सरकारचा मोठा निर्णय; दोषींना कठोर शिक्षा, फास्ट-ट्रॅक कोर्टची घोषणा
Maharashtra Rains : महाराष्ट्रात धो-धो पाऊस! पालघरमध्ये पूरस्थिती, 16 गावांचा संपर्क तुटला; शाळांना सुट्टी
CJP Protest : विद्यार्थ्यांवरील लाठीचार्ज प्रकरणी दिल्ली पोलिसांना हाय कोर्टाची नोटीस; CCTV फुटेज जतन करण्याचे आदेश
वंचितच्या कार्यकर्त्यांकडून दिल्लीतील विद्यार्थ्यांवर झालेल्या लाठीचार्जचा निषेध करण्यात आला. विद्यार्थ्यांच्या मागण्यांकडे केंद्र सरकारने गांभीर्याने पाहावे आणि त्यांच्यावर झालेल्या कारवाईची चौकशी करावी, अशी मागणी आंदोलकांकडून करण्यात येत आहे.
छत्रपती संभाजीनगरमध्ये पोलिसांचा कडक बंदोबस्त
छत्रपती संभाजीनगरमध्ये Maharashtra Bandh च्या पार्श्वभूमीवर पोलिसांनी शहरातील प्रमुख चौकांमध्ये बंदोबस्त वाढवला आहे. क्रांती चौक परिसरात मोठ्या प्रमाणात पोलिस तैनात करण्यात आले आहेत. वंचित बहुजन आघाडीच्या आंदोलनाला शहरात पोलिसांनी परवानगी दिलेली नसल्याची माहिती समोर आली आहे.
दरम्यान, वंचित बहुजन आघाडीचे पदाधिकारी आणि कार्यकर्ते रस्त्यावर उतरून नागरिकांना बंदमध्ये सहभागी होण्याचे आवाहन करणार असल्याचे सांगण्यात आले आहे. त्यामुळे शहरातील परिस्थितीवर पोलिसांकडून बारकाईने लक्ष ठेवले जात आहे.
विरार-वसईमध्ये कार्यकर्ते पोलिसांच्या ताब्यात
पालघर जिल्ह्यातील विरार आणि वसई भागातही बंदच्या पार्श्वभूमीवर पोलिसांनी कारवाई केली आहे. वंचित बहुजन आघाडीच्या महिला आघाडी जिल्हाध्यक्ष गीता जाधव यांच्यासह अनेक कार्यकर्त्यांना पोलिसांनी ताब्यात घेतले आहे.
विरार पूर्व रेल्वे स्थानक परिसरात आंदोलन करण्याचा प्रयत्न करणाऱ्या वंचितच्या कार्यकर्त्यांना पोलिसांनी तात्काळ ताब्यात घेतले. त्यांना विरार पोलीस ठाण्यात नेण्यात आले आहे. यावेळी आंदोलकांनी पोलिसांकडे आम्हाला आंदोलन करू द्या, आम्हाला ताब्यात घेऊ नका, अशी मागणी केली. मात्र, पोलिसांनी कार्यकर्त्यांना ताब्यात घेतल्याने वंचितच्या कार्यकर्त्यांमध्ये संतापाचे वातावरण निर्माण झाले.
दरम्यान, मुंबई प्रदेश अध्यक्ष चेतन अहिरे यांनाही विक्रोळी पोलिसांनी ताब्यात घेतल्याची माहिती समोर आली आहे. आंदोलन मोडीत काढण्यासाठी पोलिसांकडून कार्यकर्त्यांवर कारवाई केली जात असल्याचा आरोप वंचितच्या पदाधिकाऱ्यांकडून करण्यात आला आहे.
धाराशिवमध्ये चक्काजाम आंदोलन
धाराशिव जिल्ह्यातील कळंब तालुक्यातील मसा खंडेश्वरी येथे वंचित बहुजन आघाडीच्या कार्यकर्त्यांनी चक्काजाम आंदोलन केले. दिल्लीतील विद्यार्थ्यांच्या आंदोलनाला समर्थन देण्यासाठी आणि महाराष्ट्र बंदला पाठिंबा देण्यासाठी कार्यकर्ते येरमाळा-कळंब मार्गावर उतरले.
या चक्काजाम आंदोलनामुळे येरमाळा-कळंब मार्गावरील वाहतूक काही काळ विस्कळीत झाली. आंदोलनस्थळी कार्यकर्त्यांनी जोरदार घोषणाबाजी केली. विद्यार्थ्यांच्या मागण्यांना आपला पूर्ण पाठिंबा असल्याचे आंदोलकांनी सांगितले. तसेच दिल्लीतील विद्यार्थ्यांवर झालेल्या लाठीचार्जचा निषेध करण्यात आला.
कोल्हापुरात दुकानं बंद करण्याचं आवाहन
कोल्हापुरातही वंचित बहुजन आघाडी आणि डाव्या आघाडीकडून महाराष्ट्र बंदमध्ये सहभागी होण्याचे आवाहन करण्यात येत आहे. मध्यवर्ती बस स्थानक परिसरात कार्यकर्ते दुकानदारांना दुकानं बंद ठेवण्याचे आवाहन करताना दिसून आले.
शहरातील विविध भागांमध्ये बंदला कितपत प्रतिसाद मिळतो, याकडे सर्वांचे लक्ष लागले आहे. बंदच्या पार्श्वभूमीवर पोलिसांकडूनही परिस्थितीवर लक्ष ठेवले जात आहे.
अमरावतीत बंदला संमिश्र प्रतिसाद
अमरावती जिल्ह्यात महाराष्ट्र बंदला संमिश्र प्रतिसाद मिळत असल्याचे चित्र आहे. दिल्लीतील जंतर-मंतर येथे नीट पेपरफुटीच्या आरोपांप्रकरणी शांततापूर्ण आंदोलन करणाऱ्या विद्यार्थ्यांवर झालेल्या लाठीचार्जच्या निषेधार्थ हा बंद पुकारण्यात आला आहे.
अमरावती शहरात पोलिसांचा कडक बंदोबस्त तैनात करण्यात आला आहे. शहरातील काही भागांमध्ये दुकाने सुरू असल्याचे दिसत असले, तरी ग्रामीण भागातील तिवसा आणि दर्यापूर शहरात सकाळपासून बंदला चांगला प्रतिसाद मिळत आहे. या दोन्ही शहरांमधील अनेक दुकाने सकाळपासून बंद ठेवण्यात आली आहेत.
दरम्यान, अमरावती जिल्हाधिकारी कार्यालयावर दुपारी १२ वाजता भव्य मोर्चाचे आयोजन करण्यात आले आहे. या मोर्चासाठी वंचित बहुजन आघाडी आणि समर्थक मोठ्या संख्येने सहभागी होण्याची शक्यता आहे. त्यामुळे मोर्चाच्या पार्श्वभूमीवर प्रशासनाकडून विशेष खबरदारी घेतली जात आहे.
Maharashtra Bandh : राज्यभरात पोलिसांचा बंदोबस्त
वंचित बहुजन आघाडीच्या महाराष्ट्र बंदच्या पार्श्वभूमीवर राज्यातील संवेदनशील भागांमध्ये पोलिसांचा अतिरिक्त बंदोबस्त तैनात करण्यात आला आहे. आंदोलकांकडून शांततेत आंदोलन करण्याचे आवाहन करण्यात आले असले तरी, कायदा आणि सुव्यवस्था बिघडू नये यासाठी पोलिसांकडून खबरदारी घेतली जात आहे.
दरम्यान, या Maharashtra Bandh ला राज्यातील काही भागांत चांगला प्रतिसाद मिळत असला तरी अनेक शहरांमध्ये परिस्थिती संमिश्र आहे. काही ठिकाणी दुकाने बंद आहेत, तर काही भागांत नेहमीप्रमाणे व्यवहार सुरू आहेत. आंदोलनादरम्यान काही कार्यकर्त्यांना पोलिसांनी ताब्यात घेतल्याने राजकीय वातावरणही तापले आहे. आता दिवसभरात महाराष्ट्र बंदला राज्यातील विविध जिल्ह्यांमध्ये कसा प्रतिसाद मिळतो आणि आंदोलनाची तीव्रता किती वाढते, याकडे सर्वांचे लक्ष लागले आहे.
