US–Iran Tension : टार्गेट सेट! स्पेशल कमांडो युनिट्स कुठून घुसणार? युद्ध पेटल्यास अमेरिकेचा पहिला हल्ला इराणमधील ‘या’ पाच ठिकाणांवरच का होणार
मध्यपूर्वेत पुन्हा एकदा युद्धाचे ढग गडद झाले आहेत. अमेरिका आणि इराण यांच्यातील तणाव आता केवळ शब्दांपुरता मर्यादित राहिलेला नाही, तर प्रत्यक्ष युद्धाच्या उंबरठ्यावर येऊन ठेपला आहे. अमेरिकेकडून सातत्याने इराणला धमक्या दिल्या जात असून, अमेरिकेने आपल्या अत्याधुनिक विमानवाहू युद्धनौका, फायटर जेट्स आणि मिसाइल सिस्टिम्स इराणच्या जवळच्या समुद्रात तैनात केल्या आहेत. त्यामुळे “उद्या युद्धाला सुरुवात झाली, तर पहिला हल्ला नेमका कुठे होईल?” हा प्रश्न संपूर्ण जग विचारत आहे.
आता या प्रश्नाचं उत्तर मिळू लागलं आहे. अमेरिकेने इराणवर हल्ल्यासाठी टार्गेट सेट केल्याची माहिती समोर आली आहे. अमेरिकेचा उद्देश केवळ लष्करी कारवाई करण्याचा नसून, इराणची सध्याची सत्ता इतकी कमकुवत करणे आहे की, तिथे लोकशाहीसाठी मार्ग खुला व्हावा, असा अमेरिकेचा दीर्घकालीन डाव असल्याचं सांगितलं जात आहे.
CIA चा धक्कादायक रिपोर्ट आणि युद्धाची तयारी
CIA ने नुकताच राष्ट्रपती डोनाल्ड ट्रम्प यांना सादर केलेल्या गोपनीय अहवालात इराणचं सरकार सध्या अत्यंत कमकुवत स्थितीत असल्याचा दावा करण्यात आला आहे. आर्थिक निर्बंध, अंतर्गत असंतोष, लोकांचा वाढता रोष आणि आंतरराष्ट्रीय दबाव यामुळे इराणची सत्ता डगमगत असल्याचं या अहवालात नमूद करण्यात आलं आहे.
या CIA रिपोर्टनंतरच अमेरिकेच्या संरक्षण विभागाने युद्धाची रणनीती अधिक वेगाने आखण्यास सुरुवात केली. न्यूयॉर्क टाइम्सच्या रिपोर्टनुसार, पेंटॅगॉनच्या वरिष्ठ अधिकाऱ्यांनी राष्ट्रपती ट्रम्प यांना हल्ल्यासाठी 6 महत्त्वाचे सल्ले दिले आहेत. त्यातील पहिला आणि सर्वात महत्त्वाचा सल्ला म्हणजे “इराणमधील त्या ठिकाणांवर पहिला हल्ला करा, जिथून संपूर्ण शासन आणि लष्करी कारभार चालतो.”
अमेरिकेची युद्धनौका, फायटर जेट्स आणि कमांडो युनिट्स सज्ज
सध्या अमेरिका पर्शियन गल्फ, ओमानचा आखात आणि रेड सी परिसरात आपल्या विमानवाहू युद्धनौका तैनात करून आहे. अत्याधुनिक फायटर जेट्स, ड्रोन आणि मिसाइल डिफेन्स सिस्टिम्स पूर्णपणे अॅक्टिव्ह करण्यात आल्या आहेत. विशेष म्हणजे, अमेरिकेच्या स्पेशल फोर्सेसच्या कमांडो युनिट्सनाही इराणच्या आसपासच्या देशांमध्ये गुप्तपणे तैनात करण्यात आल्याची माहिती सूत्रांनी दिली आहे. युद्ध झाल्यास हवाई हल्ल्यांसोबतच ग्राउंड लेव्हलवरून कमांडो ऑपरेशन्स होण्याचीही दाट शक्यता आहे.
युद्ध पेटल्यास अमेरिकेचा पहिला हल्ला इराणमधील ‘या’ पाच ठिकाणांवरच का?
1) खतम अल-अनबिया – इराणच्या सैन्याचं मेंदू केंद्र
इराणमधील संपूर्ण लष्करी कारभार खतम अल-अनबिया येथून संचालित केला जातो. हे ठिकाण म्हणजे इराणच्या सैन्याचं ‘ब्रेन सेंटर’ मानलं जातं. जून 2025 मध्ये इस्त्रायलने सर्वप्रथम याच ठिकाणावर हल्ला केला होता. त्या हल्ल्यामुळे इराणला आपली लष्करी ऑपरेशन्स सुरू करण्यासाठी बराच वेळ लागला होता.
याच कारणामुळे अमेरिकेच्या रडारवर सर्वप्रथम खतम अल-अनबिया आहे. येथे हल्ला केल्यास इराणच्या सैन्याचं कमांड आणि कंट्रोल सिस्टिम पूर्णपणे कोलमडू शकतं, असा अमेरिकेचा अंदाज आहे.
2) IRGC मुख्यालय – सत्ता हादरवण्याची किल्ली
अमेरिकेला हे स्पष्टपणे माहित आहे की, IRGC (Islamic Revolutionary Guard Corps) चं पतन केल्याशिवाय इराणमधील सरकार पाडणं अशक्य आहे. त्यामुळे अमेरिकेच्या रडारवर IRGC चं मुख्यालय हे अत्यंत महत्त्वाचं टार्गेट आहे.
तेहरानमध्ये असलेल्या या मुख्यालयाला थारुल्लाह हेडक्वार्टर असं म्हटलं जातं. जगातील तब्बल 34 देशांनी IRGC वर निर्बंध लादले आहेत. इराणमधील अंतर्गत सुरक्षा, परदेशातील ऑपरेशन्स आणि सरकारच्या संरक्षणाची जबाबदारी IRGC कडेच आहे. त्यामुळे येथे हल्ला झाल्यास इराणच्या सत्तेला जबर धक्का बसू शकतो.
3) कर्मनशाह – इराणच्या मिसाइल शक्तीचं केंद्र
तेहरानपासून काही अंतरावर असलेलं कर्मनशाह हे अमेरिकेसाठी अत्यंत संवेदनशील टार्गेट आहे. येथे IRGC ने मोठा मिसाइल बेस उभारलेला आहे. इराणच्या बहुतांश घातक आणि लांब पल्ल्याच्या मिसाइल्स इथेच साठवण्यात आल्या आहेत.
अमेरिकेचा अंदाज आहे की, येथे हल्ला करून इराणची मिसाइल क्षमता मोठ्या प्रमाणात नष्ट करता येईल. त्यामुळे युद्ध झाल्यास इराणची प्रतिहल्ला करण्याची ताकद लक्षणीयरीत्या कमी होईल.
4) सुप्रीम लीडरचं केंद्र – सत्तेचा कणा मोडण्याचा प्रयत्न
इराणमध्ये खरी सत्ता सुप्रीम लीडरकडे असते. त्यामुळे शासन संपवायचं असेल, तर सुप्रीम लीडरला लक्ष्य करणं अत्यंत महत्त्वाचं ठरतं. सध्याच्या धोक्याच्या पार्श्वभूमीवर अयातुल्ला अली खामेनेई अंडरग्राऊंड झाल्याची माहिती आहे.
खामेनेई यांच्या कार्यालयातील दैनंदिन कामकाज सध्या त्यांचा लहान मुलगा पाहत असल्याचंही सांगितलं जात आहे. अमेरिकेचा अंदाज आहे की, सुप्रीम लीडरच्या कार्यालयावर किंवा त्यांच्याशी संबंधित ठिकाणांवर हल्ला केल्यास इराणमधील सत्ताकेंद्रच हादरेल.
5) अणवस्त्र प्रकल्प – अमेरिकेचं अंतिम लक्ष्य
ब्रिटनच्या टेलीग्राफच्या रिपोर्टनुसार, अमेरिकेचा पहिला आणि सर्वात मोठा प्रयत्न इराणच्या अणवस्त्र प्रकल्पांवर हल्ला करण्याचा असेल. इराण अण्वस्त्र बनवण्याच्या दिशेने पुढे जात असल्याचा अमेरिकेचा ठाम संशय आहे.
यासाठी अमेरिकेने अजरबैजानमध्ये दोन स्पेशल कमांडो टीम्स तैनात केल्याची माहिती आहे. याआधीही इस्त्रायलने अजरबैजान मार्गे इराणवर हल्ला केला होता. त्यामुळे हा मार्ग अमेरिकेसाठी रणनीतिकदृष्ट्या अत्यंत महत्त्वाचा मानला जातो.
युद्ध झाल्यास परिणाम काय?
जर अमेरिका आणि इराणमध्ये थेट युद्ध पेटलं, तर त्याचे परिणाम केवळ मध्यपूर्वेपुरते मर्यादित राहणार नाहीत. तेलाच्या किमती गगनाला भिडतील, जागतिक अर्थव्यवस्था हादरेल आणि अनेक देश थेट किंवा अप्रत्यक्षपणे या संघर्षात ओढले जातील. इराणने आधीच इशारा दिला आहे की, “आमच्यावर हल्ला झाला, तर त्याचं उत्तर फक्त अमेरिकेलाच नव्हे, तर तिच्या मित्रदेशांनाही द्यावं लागेल.”
एकूण काय?
अमेरिका आणि इराण यांच्यातील हा तणाव आता निर्णायक टप्प्यावर पोहोचला आहे. टार्गेट सेट झाले आहेत, सैन्य सज्ज आहे आणि जगाची नजर मध्यपूर्वेकडे लागली आहे. युद्ध कधीही भडकू शकतं… आणि भडकलं, तर त्याची सुरुवात इराणमधील या पाच ठिकाणांपासूनच होण्याची दाट शक्यता आहे.
