केंद्र सरकारच्या पेट्रोलियम मंत्रालयाने घरगुती एलपीजी (LPG) ग्राहकांसाठी ई-केवायसी (e-KYC) प्रक्रिया अनिवार्य केली आहे. या प्रक्रियेचे उद्दिष्ट म्हणजे सबसिडीचा लाभ योग्य लाभार्थ्यांपर्यंत पोहोचवणे आणि गॅस वितरण व्यवस्थेत पारदर्शकता वाढवणे. त्यामुळे देशभरातील Indane, Bharat Gas आणि HP Gas या कंपन्यांच्या सर्व ग्राहकांना ही प्रक्रिया पूर्ण करणे आवश्यक ठरणार आहे.
मंत्रालयाने स्पष्ट केले आहे की, ई-केवायसी प्रक्रिया पूर्ण न केल्यास ग्राहकांना गॅस सबसिडी मिळण्यात अडचणी येऊ शकतात, तसेच काही प्रकरणांमध्ये गॅस बुकिंग किंवा सिलेंडर वितरणावरही परिणाम होऊ शकतो. त्यामुळे ग्राहकांनी शक्य तितक्या लवकर ही प्रक्रिया पूर्ण करण्याचे आवाहन करण्यात आले आहे.
सरकारने या प्रक्रियेला अत्यंत सोपी आणि जलद बनवले आहे. विशेष म्हणजे, गॅस एजन्सीमध्ये प्रत्यक्ष जाण्याची गरज नाही. ग्राहकांना घरबसल्या मोबाईलच्या मदतीने काही मिनिटांत ही प्रक्रिया पूर्ण करता येणार आहे.
Related News
LPG Subsidy Status Online: घरबसल्या LPG सबसिडी आली की नाही तपासा, जाणून घ्या सोपी ऑनलाईन प्रोसेस
मोबाईलवरून घरबसल्या e-KYC कशी करावी?
घरगुती गॅस ग्राहकांना ई-केवायसी पूर्ण करण्यासाठी खालील सोप्या स्टेप्स फॉलो कराव्या लागतील –
अधिकृत ॲप डाउनलोड करा
सर्वप्रथम तुमच्या गॅस कंपनीचे अधिकृत मोबाइल ॲप डाउनलोड करा. Indane, Bharat Gas किंवा HP Gas या कंपन्यांचे ॲप Google Play Store किंवा Apple App Store वर उपलब्ध आहेत. तसेच UMANG ॲपद्वारेही ही प्रक्रिया करता येते.मोबाईल नंबरद्वारे लॉगिन करा
ॲप इंस्टॉल केल्यानंतर तुमचा नोंदणीकृत मोबाईल नंबर टाकून लॉगिन करा. OTP द्वारे तुमची ओळख पडताळली जाईल.e-KYC किंवा आधार प्रमाणीकरण पर्याय निवडा
ॲपमध्ये “e-KYC” किंवा “Aadhaar Authentication” असा पर्याय दिसेल. त्यावर क्लिक करा.चेहरा स्कॅन करून पडताळणी करा
त्यानंतर Aadhaar FaceRD ॲप वापरून तुमचा चेहरा स्कॅन केला जाईल. या फेस ऑथेंटिकेशन प्रक्रियेमुळे आधारशी तुमची ओळख पडताळली जाईल.प्रक्रिया पूर्ण
चेहरा पडताळणी यशस्वी झाल्यानंतर तुमची ई-केवायसी प्रक्रिया पूर्ण होईल. ही संपूर्ण प्रक्रिया पूर्णपणे मोफत आहे.
जर कोणाला मोबाईलद्वारे प्रक्रिया पूर्ण करता आली नाही, तर गॅस एजन्सीमध्ये जाऊन केवायसी फॉर्म भरूनही ही प्रक्रिया पूर्ण करता येते.
e-KYC न केल्यास काय होऊ शकते?
सरकारच्या सूचनेनुसार जर ग्राहकांनी ई-केवायसी प्रक्रिया पूर्ण केली नाही तर त्यांना काही अडचणींना सामोरे जावे लागू शकते.
गॅस सबसिडी खात्यात जमा होण्यात अडथळे येऊ शकतात
सिलेंडर बुकिंग प्रक्रिया थांबवली जाऊ शकते
गॅस डिलिव्हरी तात्पुरती रद्द होण्याची शक्यता
काही प्रकरणांमध्ये गॅस कनेक्शन ब्लॉक किंवा निलंबित केले जाऊ शकते
यामुळे ग्राहकांना सिलेंडर खरेदी करताना ₹300 ते ₹400 पर्यंतचा सबसिडीचा फायदा गमवावा लागू शकतो. त्यामुळे सर्व ग्राहकांनी लवकरात लवकर ई-केवायसी पूर्ण करण्याचा सल्ला देण्यात आला आहे.
सायबर फसवणुकीपासून सावध राहा
दरम्यान, गॅस संबंधित सेवांच्या नावाखाली सायबर फसवणुकीचे प्रकार वाढत असल्याची माहिती समोर आली आहे. काही सायबर गुन्हेगार स्वतःला गॅस कंपनीचे प्रतिनिधी असल्याचे सांगून नागरिकांना फोन करतात.
हे लोक ग्राहकांना सांगतात की त्यांचे गॅस बिल बाकी आहे किंवा केवायसी पूर्ण झालेले नाही. त्यानंतर ते व्हॉट्सअॅपवर APK फाइल किंवा संशयास्पद लिंक पाठवतात आणि ती डाउनलोड करण्यास सांगतात.
लिंक उघडल्यानंतर काही क्षणांतच नागरिकांच्या बँक खात्यातील पैसे काढले जात असल्याच्या तक्रारी समोर आल्या आहेत. काही प्रकरणांमध्ये लोकांनी लाखो रुपयांची फसवणूक झाल्याची माहिती दिली आहे. त्यामुळे नागरिकांनी कोणत्याही अनोळखी व्यक्तीच्या कॉलवर किंवा मेसेजवर विश्वास ठेवू नये, असे आवाहन पोलिसांनी केले आहे.
राज्यात एलपीजीचा तुटवडा नसल्याचे सरकारचे स्पष्टीकरण
दरम्यान, महाराष्ट्रात एलपीजीचा तुटवडा असल्याच्या अफवांबाबत राज्य सरकारने स्पष्टीकरण दिले आहे. अधिकाऱ्यांच्या माहितीनुसार, राज्यात दररोज सुमारे 9000 मेट्रिक टन एलपीजीची मागणी असते. ही मागणी पूर्ण करण्यासाठी रिफायनरीमधील उत्पादन वाढवण्यात आले असून सध्या उत्पादन 11,000 मेट्रिक टनांपर्यंत वाढवण्यात आले आहे.
सरकारने स्पष्ट केले आहे की, घरगुती गॅसचा पुरेसा साठा उपलब्ध असून नागरिकांनी घाबरून जाण्याचे कारण नाही. व्यावसायिक एलपीजीसाठी केंद्र सरकारच्या मार्गदर्शक सूचनांनुसार प्राधान्यक्रम ठरवण्यात आला आहे.रुग्णालये, शाळांमधील मध्यान्ह भोजन योजना, आश्रमशाळा, सामुदायिक स्वयंपाकगृहे आणि शासकीय मेस यांसारख्या अत्यावश्यक सेवांना प्रथम प्राधान्य दिले जात आहे.
तसेच राज्यात पाइप्ड नॅचरल गॅस (PNG), पेट्रोल आणि डिझेलचा सुद्धा पुरेसा साठा उपलब्ध असल्याचे सांगण्यात आले आहे. नागरिकांनी अफवांवर विश्वास न ठेवता अधिकृत माहितीवरच भरोसा ठेवावा, असेही प्रशासनाने स्पष्ट केले आहे.
