नवी दिल्ली : हरियाणातील भाजपच्या विजयी हॅट्‌ट्रीकनंतर स्थापन होणाऱ्या नव्या सरकारसाठी केंद्रीय निरीक्षक म्हणून खुद्द केंद्रीय गृहमंत्री अमित शहा यांनी आपल्या हाती सूत्रे घेतल्याने दिल्लीत जोरदार चर्चा सुरू झाली आहे. हरियाणात कथितरित्या वाट पाहायला लावलेल्या भाजप नेत्यांची महत्त्वाकांक्षा जागृत झाल्याने हे घडत असल्याची चर्चा आहे. शहा यांच्यासोबत मघ्य प्रदेशचे मुख्यमंत्री मोहन यादव हेसुद्धा निरीक्षक म्हणून हरियाणात जातील.

राज्यात भाजपची सत्ता आल्यास वर्तमान मुख्यमंत्री नायबसिंह सैनी यांचीच या पदावर फेरनियुक्ती होईल, असे पक्षाने वारंवार जाहीर करूनही शहा यांनी हरियाणामध्ये सरकार स्थापनेआधीच्या भाजप विधिमंडळ पक्ष बैठकीसाठी स्वतः चंडीगडला जाण्याचा निर्णय घेणे हे सैनी यांच्या संभाव्य मुख्यमंत्रिपदाच्या अनिश्चिततेला जन्म देणारे ठरत असल्याचे जाणकार मानतात. सैनी यांच्याच नेतृत्वाखाली भाजपने हरियाणा विधानसभा निवडणूक लढवली होती.

राष्ट्रीय सरचिटणीस अरुण सिंह यांनी सांगितल्यानुसार, शहा व यादव यांच्यावर विधिमंडळ पक्षाच्या नेत्याची निवड करण्याची जबाबदारी असेल. भाजपच्या मागील दशकातील परंपरेनुसार एखाद्या राज्यात सत्ता आली तर संरक्षणमंत्री राजनाथसिंह किंवा दिल्लीतील एखादे ज्येष्ठ मंत्री व त्या राज्याचे निवडणूक प्रभारी यांनाच नव्या सरकारसाठी केंद्रीय निरीक्षक म्हणून त्या राज्यात पाठवले जाते. पंतप्रधान नरेंद्र मोदी व प्रसंगी अमित शहा थेट शपथविधीला जातात.यादव यांना भाजपने पहिल्यांदाच एखाद्या राज्याचे केंद्रीय निरीक्षक बनवले आहे. मध्य प्रदेश भाजपमध्येही सध्या प्रचंड अस्वस्थता असल्याची पार्श्वभूमी याला असल्याचे मानले जाते.अनिल विज आणि राव इंदरजितसिंह यांची दावेदारीहरियाणाचे पुढील मुख्यमंत्री नायबसिंह सैनी हेच राहतील, असे भाजपनेच नव्हे तर शहा यांनीही जाहीर केले असतानाच त्यांच्यासारख्या बड्या नेत्याला निरीक्षक म्हणून राज्यात पुन्हा का जावे लागते, अशी चर्चा आहे. विधानसभा निवडणुकीदरम्यान राज्याचे माजी गृहमंत्री व अंबाला कँटचे आमदार अनिल विज यांनी मुख्यमंत्रिपदासाठी जाहीरपणे दावा केला होता. खासदार आणि पक्षाचे ज्येष्ठ नेते राव इंद्रजित सिंह यांच्या समर्थकांनीही त्यांना मुख्यमंत्रिपदाचे दावेदार मानले. विज यांनी रविवारी भाजपचे राष्ट्रीय अध्यक्ष जे. पी. नड्डा यांची दिल्लीत भेट घेतली. राज्यातील विधिमंडळ पक्ष बैठकीच्या तोंडावर विज यांना नड्डा यांची भेट घेण्यास सांगितले गेले होते.