अभिजीत दिपके यांच्या घरी मंत्री संजय शिरसाट यांची भेट; म्हणाले, “अगोदरच यायचं होतं पण राजकीय पडसाद उमटले असते”
CJP अध्यक्ष अभिजीत दिपके यांच्या कुटुंबाशी साधला संवाद; महाराष्ट्रात परतल्यानंतर सुरक्षेची मागणी करणार असल्याचे संजय शिरसाट यांचे संकेत
नीट पेपरफुटी प्रकरणावरून देशभरात चर्चेत आलेल्या कॉक्रोच जनता पार्टीचे (CJP) अध्यक्ष अभिजीत दिपके यांच्या घरी राज्याचे मंत्री संजय शिरसाट यांनी भेट दिली. या भेटीदरम्यान त्यांनी अभिजीत दिपके यांच्या कुटुंबीयांशी संवाद साधला. बराच वेळ दिपके यांच्या घरी थांबून त्यांनी कुटुंबाची विचारपूस केली. या भेटीनंतर राजकीय वर्तुळात चर्चांना उधाण आले आहे.
नीट परीक्षेतील कथित पेपरफुटीच्या मुद्द्यावरून दिल्लीतील जंतर-मंतर येथे गेल्या काही काळापासून आंदोलन सुरू होते. या आंदोलनाचे नेतृत्व अभिजीत दिपके यांच्या कॉक्रोच जनता पार्टीकडून करण्यात आले होते. केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी या आंदोलनातून करण्यात आली होती.
नीट पेपरफुटी आंदोलनाला मिळाले मोठे यश
नीट पेपरफुटी प्रकरणात विद्यार्थ्यांच्या मागण्यांसाठी सुरू झालेल्या आंदोलनाने देशभरात लक्ष वेधले होते. आंदोलनाच्या काळात CJPच्या शिष्टमंडळाने सरकारसोबत चर्चा केली होती. सरकारकडून अनेकदा चर्चेसाठी प्रस्ताव देण्यात आले होते, मात्र आंदोलकांनी आपल्या मागण्यांवर ठाम भूमिका घेतली होती.
Related News
अभिजीत दिपके यांचा फोटो पाहून विद्यार्थी चिंतेत; डोळे बंद, हाताला सलाईन… प्रकृतीबाबत मोठी अपडेट
37 दिवसांच्या आंदोलनानंतर अभिजीत दीपके भावूक; जंतर-मंतरवरील समर्थकांची मागितली माफी
‘आमचा अजेंडा खुर्ची नव्हे, तर…’; एकनाथ शिंदेंचा विरोधकांना थेट इशारा, म्हणाले ‘आम्ही फेस टू फेस वाले’
लाडकी बहिण योजनेबाबत मोठी बातमी! ई-केवायसीसाठी मिळणार 6 महिन्यांची मुदत
अखेर CJPच्या शिष्टमंडळाची सरकारसोबत बैठक झाली. या बैठकीत आंदोलकांनी तीन प्रमुख मागण्या सरकारसमोर ठेवल्या होत्या. त्यापैकी दोन मागण्या तातडीने मान्य करण्यात आल्या. मात्र सर्वात महत्त्वाची मागणी म्हणजे केंद्रीय शिक्षणमंत्री धर्मेंद्र प्रधान यांच्या राजीनाम्याबाबत सरकारने वेळ मागितला होता.
मात्र त्यानंतर काही काळातच धर्मेंद्र प्रधान यांनी केंद्रीय शिक्षणमंत्री पदाचा राजीनामा दिला. या घटनेनंतर जंतर-मंतरवर आंदोलकांनी मोठा जल्लोष केला. अभिजीत दिपके यांनी या विजयाचे श्रेय देशातील तरुणाईला दिले. विशेषतः जेन-झी पिढीने दाखवलेल्या एकजुटीमुळे हा विजय मिळाल्याचे त्यांनी म्हटले होते.
अभिजीत दिपके यांना भेटण्यासाठी आधीच येणार होतो – संजय शिरसाट
दरम्यान, मंत्री संजय शिरसाट यांनी अभिजीत दिपके यांच्या घरी भेट दिल्यानंतर माध्यमांशी संवाद साधला. यावेळी त्यांनी सांगितले की, अभिजीतला भेटण्यासाठी यापूर्वीच येण्याची इच्छा होती. मात्र त्या वेळी भेट घेतली असती तर त्याचे राजकीय परिणाम उमटले असते, त्यामुळे भेट टाळण्यात आली.
“अभिजीत दिपके आता मोठे यश मिळवून आला आहे. तो माझ्या मतदारसंघातील तरुण आहे. माझ्या मतदारसंघातील एखादा युवक देशपातळीवर मोठे काम करतो, त्यावेळी त्याला भेटणे हे माझे कर्तव्य आहे,” असे संजय शिरसाट यांनी सांगितले.
“सरकारने सकारात्मक भूमिका घेतली”
संजय शिरसाट यांनी पुढे सांगितले की, अभिजीत दिपके यांच्या मागण्यांबाबत सरकारने सकारात्मक भूमिका घेतली. त्यामुळे या आंदोलनाला यश मिळाले.
“अभिजीतच्या माध्यमातून अनेक राजकीय नेत्यांनी आणि पक्षांनी आपापल्या राजकीय फायद्यासाठी प्रयत्न केले असतील, मात्र त्याचे आंदोलन आणि त्याची भूमिका वेगळी होती,” असेही शिरसाट म्हणाले.
त्यांनी अभिजीत दिपके यांच्या कुटुंबीयांशी संवाद साधताना त्यांच्या संघर्षाचे कौतुक केले.
महाराष्ट्रात परतल्यानंतर सुरक्षेची मागणी करणार
अभिजीत दिपके सध्या आंदोलनानंतर चर्चेच्या केंद्रस्थानी आहेत. ते पुढील काही दिवसांत महाराष्ट्रात परतणार असल्याची माहिती संजय शिरसाट यांनी दिली.
“अभिजीत महाराष्ट्रात आल्यानंतर त्याच्या जीविताला कोणताही धोका निर्माण होऊ नये, यासाठी मुख्यमंत्र्यांकडे त्याला सुरक्षा देण्याची मागणी करणार आहे,” असे शिरसाट यांनी स्पष्ट केले.
अभिजीत दिपके यांच्या आंदोलनानंतर तरुणाईमध्ये मोठी चर्चा सुरू झाली आहे. त्यांच्या नेतृत्वाखाली झालेल्या आंदोलनामुळे केंद्र सरकारच्या निर्णय प्रक्रियेवर परिणाम झाल्याचा दावा समर्थकांकडून केला जात आहे. दुसरीकडे, या संपूर्ण घडामोडींकडे राजकीय पक्षही लक्ष ठेवून आहेत.
अभिजीत दिपके यांच्या पुढील भूमिकेकडे लक्ष
धर्मेंद्र प्रधान यांच्या राजीनाम्यानंतर अभिजीत दिपके आणि CJPची पुढील भूमिका काय असेल, याकडे सर्वांचे लक्ष लागले आहे. आंदोलनापुरती भूमिका मर्यादित राहणार की भविष्यात सामाजिक आणि राजकीय क्षेत्रात सक्रिय सहभाग घेतला जाणार, याबाबतही चर्चा सुरू आहे.
सध्या अभिजीत दिपके यांची लोकप्रियता तरुणांमध्ये वाढताना दिसत असून, त्यांच्या पुढील निर्णयाकडे राजकीय वर्तुळाचे लक्ष लागले आहे.
