मोदींना तो सल्ला दिला अन्… शरद पवार आणि मोदी भेटीत नेमकं काय घडलं? पवारांनी सांगितली ‘आतली’ बातमी
नीट परीक्षेतील कथित पेपरफुटीच्या मुद्द्यावरून देशभरात सुरू असलेल्या आंदोलनाला अखेर मोठं यश मिळालं आहे. केंद्रीय शिक्षणमंत्री धर्मेंद्र प्रधान यांनी आपल्या पदाचा राजीनामा दिल्यानंतर या निर्णयावर राजकीय वर्तुळातून प्रतिक्रिया उमटत आहेत. विद्यार्थ्यांकडून धर्मेंद्र प्रधान यांच्या राजीनाम्याची मागणी करण्यात येत होती. दिल्लीतील जंतर मंतरवर गेल्या महिन्यापेक्षा अधिक काळापासून सुरू असलेल्या आंदोलनानंतर २० जुलै रोजी संसदेच्या दिशेने मोर्चा काढण्यात आला होता. या आंदोलनादरम्यान पोलिसांकडून आंदोलकांवर लाठीचार्ज आणि अश्रूधुराचा वापर करण्यात आल्याचा मुद्दाही चर्चेत आला होता.
दरम्यान, धर्मेंद्र प्रधान यांच्या राजीनाम्यानंतर राष्ट्रवादी काँग्रेसचे ज्येष्ठ नेते शरद पवार यांनी या संपूर्ण आंदोलनाबाबत महत्त्वाची माहिती दिली आहे. काही दिवसांपूर्वी शरद पवार यांनी आंदोलनाचे नेतृत्व करणारे अभिजीत दिपके आणि त्यांच्या सहकाऱ्यांची भेट घेतली होती. त्यानंतर त्यांनी पंतप्रधान नरेंद्र मोदी यांचीही भेट घेतली होती. या भेटीत नेमकी काय चर्चा झाली, याबाबत राजकीय वर्तुळात उत्सुकता होती. आता शरद पवार यांनी स्वतः या भेटीतील चर्चेचा तपशील सांगितला आहे.
शरद पवार यांनी पत्रकार परिषदेत बोलताना स्पष्ट केलं की, आपण पंतप्रधान नरेंद्र मोदी यांच्यासोबत धर्मेंद्र प्रधान यांच्या राजीनाम्याच्या मुद्द्यावर चर्चा केली होती. विद्यार्थ्यांच्या आंदोलनाचा मुद्दा गंभीर असून सरकारने आंदोलकांशी संवाद साधला पाहिजे, असा सल्ला आपण पंतप्रधानांना दिला होता, असं पवार यांनी सांगितलं.
Related News
धर्मेंद्र प्रधान यांच्या राजीनाम्याचं श्रेय कोणाला? शरद पवारांनी थेट नाव घेतलं; म्हणाले, ‘हा युवा शक्तीचा विजय’
धर्मेंद्र प्रधानांच्या राजीनाम्यानंतर महाराष्ट्रातील ‘या’ बड्या नेत्याचं नाव चर्चेत; संजय राऊतांचा मोठा दावा
धर्मेंद्र प्रधानांच्या राजीनाम्यानंतर सोनम वांगचुक यांचं मोठं विधान; म्हणाले, ‘हा तर लोकशाहीचा विजय!’
धर्मेंद्र प्रधानांनी राजीनामा दिला अन् संजय राऊत म्हणाले, ‘12 वर्षांनंतर असं आंदोलन झालं’
धर्मेंद्र प्रधानांच्या राजीनाम्यावर शरद पवारांची पहिली प्रतिक्रिया; म्हणाले, ‘लोकशाहीने कात टाकली’
मोठी बातमी! धर्मेंद्र प्रधानांचा अखेर राजीनामा? फडणवीस तातडीने दिल्लीला रवाना; अमित शाहांसोबत बैठकीची चर्चा
Dharmendra Pradhan यांचा अखेर राजीनामा? CJPच्या आंदोलनाला मोठं यश; विद्यार्थ्यांचा विजय!
सोनं दणकन आपटलं! भावात तब्बल 1,500 रुपयांची घसरण, जाणून घ्या आजचा नवा दर
घर घेण्यासाठी संपूर्ण बचत खर्च करावी का? आधी घर की गुंतवणूक? तज्ज्ञांचा महत्त्वाचा सल्ला
बटाट्यांपासून बनवा झटपट आणि पौष्टिक सॅलड; जाणून घ्या 4 भन्नाट रेसिपी
सरकारचं टेन्शन वाढलं! CJP, शेतकऱ्यांनंतर आता E20 पेट्रोलविरोधात टॅक्सी चालकांचा संसदेला घेराव
‘मी पंतप्रधानांना विनंती केली…’
शरद पवार म्हणाले की, पेपरफुटीच्या घटनांचा थेट परिणाम अनेक विद्यार्थ्यांच्या आयुष्यावर होतो. त्यामुळे विद्यार्थ्यांच्या भावना समजून घेणं गरजेचं आहे. आनंदाची बाब म्हणजे युवा पिढीने संयमाने आणि शांततेने आपल्या भावना देशाच्या नेतृत्वासमोर मांडल्या आणि अखेर त्यांच्या आंदोलनाला यश मिळालं.
या संपूर्ण प्रकरणात चर्चेच्या दोन-तीन फेऱ्या झाल्या होत्या. आपण स्वतः पंतप्रधान नरेंद्र मोदी यांची भेट घेतली होती. त्यावेळी लोकशाहीमध्ये संवाद ठेवण्याची आवश्यकता असल्याचं आपण त्यांना सांगितलं. सरकार आणि आंदोलकांमध्ये संवाद नसेल तर त्याचे गंभीर परिणाम होऊ शकतात. त्यामुळे सरकारने संवाद सुरू ठेवला पाहिजे, असं आपण पंतप्रधानांना सांगितल्याचं शरद पवार यांनी स्पष्ट केलं.
‘एक तर राजीनामा घ्या किंवा आंदोलकांशी संवाद सुरू करून त्यांचं म्हणणं ऐका,’ अशी भूमिका आपण पंतप्रधानांसमोर मांडली होती, असंही पवार यांनी सांगितलं.
मोदींना दिला हा सल्ला
पंतप्रधान नरेंद्र मोदी यांच्यासोबत झालेल्या चर्चेबाबत शरद पवार यांनी पुढे सांगितलं की, सरकारने केंद्रीय मंत्रिमंडळातील एक-दोन ज्येष्ठ मंत्र्यांना आंदोलकांशी चर्चा करण्यासाठी पाठवावं, अशी विनंती आपण केली होती. अभिजीत दिपके आणि त्यांच्या सहकाऱ्यांशी सरकारने संवाद साधणं आवश्यक आहे, असंही आपण मोदींना सांगितलं होतं.
त्याचवेळी अभिजीत दिपके यांच्याशीही आपण चर्चा केली होती. सरकार संवाद साधण्यासाठी तयार असेल, तर आपण चर्चेला नकार देऊ नये, असा सल्ला आपण त्यांना दिला होता. सरकारशी बोलायचंच नाही, असा हट्ट न धरता चर्चेच्या माध्यमातून प्रश्न सोडवण्याचा प्रयत्न करावा, असं आपण अभिजीत दिपके आणि त्यांच्या सहकाऱ्यांना सांगितल्याचं पवार यांनी स्पष्ट केलं.
सुदैवाने आंदोलकांनीही चर्चेसाठी तयारी दाखवली. त्यानंतर केंद्र सरकारने वरिष्ठ सहकाऱ्यांना आंदोलकांशी चर्चा करण्यासाठी नियुक्त केलं. या चर्चेच्या दोन फेऱ्या झाल्या. मात्र, आंदोलकांच्या काही प्रमुख मागण्या केंद्र सरकारने तात्काळ मान्य केल्या नव्हत्या, अशी माहिती शरद पवार यांनी दिली.
‘त्याचा परिणाम मला दिसला’
पंतप्रधान मोदींसोबत झालेल्या चर्चेचा परिणाम आपल्याला नंतरच्या घडामोडींमध्ये दिसून आला, असंही शरद पवार यांनी म्हटलं. केंद्र सरकारने वरिष्ठ नेत्यांना आंदोलकांशी चर्चा करण्यासाठी पुढे केलं. त्यानंतर चर्चेच्या माध्यमातून या आंदोलनावर तोडगा काढण्याचा प्रयत्न झाला.
दुसऱ्या फेरीतील चर्चेनंतर केंद्र सरकारने या विषयावर विचार करण्याची भूमिका घेतली. मात्र, आंदोलन करणाऱ्या युवा पिढीचा प्रमुख आग्रह हा शिक्षणमंत्री धर्मेंद्र प्रधान यांच्या राजीनाम्याचा होता. अखेर हा आग्रह शिक्षणमंत्री आणि पंतप्रधानांकडून स्वीकारण्यात आला, असं शरद पवार यांनी सांगितलं.
‘मी युवा पिढीचं अभिनंदन करतो’
धर्मेंद्र प्रधान यांच्या राजीनाम्यानंतर शरद पवार यांनी युवा पिढीचं अभिनंदन केलं. शांततेच्या मार्गाने आणि संयमाने आंदोलन करणाऱ्या विद्यार्थ्यांनी आपली मागणी सरकारसमोर मांडली आणि अखेर त्यांच्या मागणीला यश मिळालं, असं पवार म्हणाले.
मात्र, या संपूर्ण आंदोलनादरम्यान पोलिसांकडून करण्यात आलेल्या कारवाईवरही त्यांनी नाराजी व्यक्त केली. नव्या पिढीशी संवाद साधताना लाठीचार्ज आणि अश्रूधुराचा वापर करण्याची गरज नव्हती. हे प्रकार टाळले असते तर सरकारची भूमिका अधिक सकारात्मक दिसली असती, असं शरद पवार यांनी म्हटलं.
दरम्यान, धर्मेंद्र प्रधान यांच्या राजीनाम्यानंतर आता केंद्र सरकारकडून शिक्षण मंत्रालयाची जबाबदारी कोणाकडे सोपवली जाणार, याकडे सर्वांचं लक्ष लागलं आहे. त्याचवेळी नीट पेपरफुटी आणि विद्यार्थ्यांच्या मागण्यांवर सरकार पुढे कोणती पावलं उचलणार, हेही पाहणं महत्त्वाचं ठरणार आहे.
शरद पवार यांच्या वक्तव्यामुळे पंतप्रधान नरेंद्र मोदी आणि त्यांच्यात झालेल्या भेटीमागील चर्चेचा तपशील समोर आला आहे. विद्यार्थ्यांच्या आंदोलनावर तोडगा काढण्यासाठी संवाद साधण्याचा सल्ला आपण पंतप्रधानांना दिला होता आणि त्यानंतर केंद्र सरकारने आंदोलकांशी चर्चा सुरू केली, असा दावा शरद पवार यांनी केला आहे. त्यामुळे धर्मेंद्र प्रधान यांच्या राजीनाम्यानंतर आता या संपूर्ण आंदोलनाच्या राजकीय आणि सामाजिक परिणामांवरही चर्चा सुरू झाली आहे.
