साताऱ्यात अवकाळी पावसाचा भीषण कहर; 40 घरे उद्ध्वस्त, नागरिक भयभीत
राज्यातील हवामानात गेल्या काही दिवसांपासून मोठा बदल होताना दिसत आहे. एका बाजूला कडाक्याचे ऊन आणि उष्णतेची लाट तर दुसऱ्या बाजूला अवकाळी पावसाचा तडाखा अशी विचित्र परिस्थिती निर्माण झाली आहे. भारतीय हवामान विभागाने राज्यातील काही भागांसाठी यलो अलर्ट जारी केला असतानाच सातारा जिल्ह्यात अवघ्या एका तासाच्या मुसळधार पावसाने अक्षरशः हाहाकार उडवला. वादळी वाऱ्यासह झालेल्या या पावसामुळे अनेक घरांचे मोठे नुकसान झाले असून नागरिकांमध्ये भीतीचे वातावरण निर्माण झाले आहे.
साताऱ्यात 40 घरांचे मोठे नुकसान
सातारा शहरातील सदर बाजार, लक्ष्मी टेकडी आणि परिसरात सायंकाळच्या सुमारास अचानक जोरदार वादळी वाऱ्यासह मुसळधार पाऊस सुरू झाला. अवघ्या काही मिनिटांत परिस्थिती हाताबाहेर गेली. अनेक ठिकाणी झाडे उन्मळून पडली तर काही भागात विद्युत खांब कोसळल्याने वीजपुरवठा खंडित झाला.
या नैसर्गिक आपत्तीत तब्बल 40 घरांचे मोठ्या प्रमाणात नुकसान झाल्याची माहिती समोर आली आहे. अनेक घरांची पत्रे उडाली, भिंती कोसळल्या तर काही कुटुंबांना अख्खी रात्र पावसात भिजत काढावी लागली. स्थानिक नागरिकांनी प्रशासनाकडे तातडीने मदत आणि नुकसान भरपाईची मागणी केली आहे.
Related News
68 व्या वर्षी डॉ. आनंद नाडकर्णी काळाच्या पडद्याआड; ठाण्यासह महाराष्ट्रात शोककळा
‘राजा शिवाजी’ची बॉक्स ऑफिसवर दणदणीत कमाई!100 कोटींपासून फक्त 23 कोटी दूर
मिरची झोंबणार, टोमॅटो रडवणार! MMR मध्ये भाजीपाल्यांचे भाव गगनाला
साखर निर्यातीवर केंद्राची मोठी बंदी; महागाई रोखण्यासाठी सरकारचा निर्णायक मास्टरस्ट्रोक
रिक्षा-टॅक्सी अन् बस प्रवास महागणार? मुंबईत CNG दरात ₹2 वाढ, लाखो प्रवाशांच्या खिशाला फटका
कर्जमाफीची तारीख जवळ! ‘Agristack’ KYC नाही केली तर अडकू शकतो लाभ;
कोयना धरणातील भीषण बोट दुर्घटना! वादळी वाऱ्यामुळे बोट उलटली, बोटचालक बेपत्ता; मुंबईच्या पर्यटकांचा थरारक बचाव
4 धडाकेबाज निर्णयांचा वर्षाव! राज्य मंत्रिमंडळाच्या बैठकीत मोठे बदल; शेतकरी, कर्मचारी, शिक्षक, विद्यार्थ्यांना नेमका काय फायदा?
सरकारी कर्मचाऱ्यांसाठी मोठी खुशखबर! 8 व्या वेतन आयोगामुळे पगारात जबरदस्त वाढ
2019 पासून घोड्यावरून ऑफिसला; संभाजीनगरच्या युसूफ यांचा भन्नाट जुगाड चर्चेत
Jalgaon News : लसीकरणानंतर अडीच महिन्यांच्या चिमुकलीचा दुर्दैवी मृत्यू; शवागृहाने नकार दिल्याने आजोबांनी मांडीवर घेत काढली रात्र, 7 धक्कादायक बाबी समोर
रात्रीच प्रशासनाची धाव
घटनेची माहिती मिळताच सातारा नगरपालिकेचे नगराध्यक्ष अमोल मोहिते यांनी आपत्ती व्यवस्थापन विभाग आणि पालिकेच्या अधिकाऱ्यांसह घटनास्थळी भेट दिली. रात्री उशिरापर्यंत नुकसानीची पाहणी करण्यात आली. प्रशासनाने तातडीने पंचनामे सुरू केले असून नुकसानग्रस्तांना मदत देण्याची प्रक्रिया लवकरच सुरू होणार असल्याचे सांगण्यात आले.
वादळी पावसामुळे नागरिकांमध्ये प्रचंड भीतीचे वातावरण निर्माण झाले आहे. अनेकांनी सुरक्षित ठिकाणी आसरा घेतला. काही भागात झाडे रस्त्यावर कोसळल्याने वाहतूकही विस्कळीत झाली.
शिवसागर जलाशयात बोट दुर्घटना
दरम्यान, साताऱ्यातील बामनोली परिसरात आणखी एक धक्कादायक घटना घडली. वादळी वाऱ्यासह सुरू असलेल्या पावसात शिवसागर जलाशयात पर्यटकांना घेऊन जाणारी एक बोट अचानक बुडाली. या घटनेत दोन पर्यटकांनी प्रसंगावधान राखत पोहत किनारा गाठला आणि आपला जीव वाचवला.
मात्र, बोटीचा चालक रुपेश धोंडीबा तांबे बेपत्ता झाला असून त्याचा शोध सुरू आहे. या घटनेमुळे परिसरात मोठी खळबळ उडाली आहे. बचाव पथकाकडून जलाशयात शोधमोहीम सुरू करण्यात आली आहे.
परभणी आणि पुण्यातही अवकाळी पावसाचा फटका
साताऱ्यासह राज्यातील इतर जिल्ह्यांनाही अवकाळी पावसाचा मोठा फटका बसला आहे. परभणी जिल्ह्यात वादळी वाऱ्यासह जोरदार पाऊस झाला. अचानक आलेल्या वाऱ्यामुळे अनेक झाडे उन्मळून पडली. जिंतूर ते छत्रपती संभाजीनगर महामार्गावर मोठमोठी झाडे कोसळल्याने वाहतूक ठप्प झाली.
शिरूर तालुक्यातील शिंदोडी गावातही वादळी पावसाने कहर केला. रांजणगाव औद्योगिक वसाहतीला पाणीपुरवठा करणाऱ्या एक्सप्रेस फिडरच्या तारांवर मोठे झाड कोसळले. त्यामुळे वीजपुरवठा विस्कळीत झाला. तुटलेल्या तारांमुळे जवळ उभ्या असलेल्या ट्रॅक्टरचेही नुकसान झाले. सुदैवाने या दुर्घटनेत कोणतीही जीवितहानी झाली नाही.
पुणे जिल्ह्यात विजांच्या कडकडाटासह मुसळधार पाऊस
पुणे जिल्ह्यातील अनेक भागांमध्ये विजांच्या कडकडाटासह मुसळधार पावसाने हजेरी लावली. दौंड तालुक्यातील केडगाव परिसरात जोरदार वारे आणि मुसळधार पावसामुळे नागरिकांची मोठी तारांबळ उडाली. काही ठिकाणी पाणी साचल्याने वाहतुकीवर परिणाम झाला.
हवामान विभागाने पुढील काही दिवस राज्यातील विविध भागांत अवकाळी पावसाचा इशारा दिला आहे. विशेषतः मराठवाडा, पश्चिम महाराष्ट्र आणि विदर्भातील काही भागांमध्ये मेघगर्जनेसह पावसाची शक्यता व्यक्त करण्यात आली आहे.
हवामान विभागाचा इशारा
भारतीय हवामान विभागाने नागरिकांना सतर्क राहण्याचे आवाहन केले आहे. जोरदार वारे, विजांचा कडकडाट आणि अवकाळी पावसामुळे शेतकऱ्यांचेही मोठे नुकसान होण्याची भीती व्यक्त केली जात आहे. उभ्या पिकांवर या बदलत्या हवामानाचा परिणाम होत असून शेतकरी चिंतेत आहेत.
तज्ज्ञांच्या मते, हवामानातील अचानक बदल आणि वाढते तापमान यामुळे अवकाळी पावसाच्या घटना वाढत आहेत. त्यामुळे नागरिकांनी अनावश्यक प्रवास टाळावा आणि सुरक्षित ठिकाणी राहावे, असे आवाहन करण्यात आले आहे.
