वैद्यकीय शिक्षणाचे स्वप्न पाहणाऱ्या लाखो विद्यार्थ्यांसाठी ३ मे रोजी झालेली NEET UG 2026 परीक्षा म्हणजे आयुष्याचा अत्यंत महत्त्वाचा टप्पा होता. दोन-दोन वर्षे दिवस-रात्र अभ्यास करून, घरापासून दूर राहून, प्रचंड मानसिक दबाव सहन करत विद्यार्थ्यांनी ही परीक्षा दिली होती. मात्र, पेपरफुटी आणि गैरप्रकारांच्या संशयामुळे राष्ट्रीय स्तरावरील ही परीक्षा रद्द करण्यात आल्यानंतर राज्यभरातून संतापाची लाट उसळली आहे.
छत्रपती संभाजीनगर, लातूर, नांदेड, पुणे आणि मुंबईसारख्या महत्त्वाच्या NEET तयारी केंद्रांमध्ये विद्यार्थी आणि पालकांमध्ये मोठी नाराजी व्यक्त होत आहे. “यंत्रणेच्या चुकीची शिक्षा आमच्या मुलांना का?” असा थेट सवाल पालकांनी उपस्थित केला आहे.
दोन वर्षांची मेहनत एका निर्णयाने वाया?
NEET परीक्षा ही देशातील सर्वात कठीण आणि स्पर्धात्मक परीक्षांपैकी एक मानली जाते. दरवर्षी लाखो विद्यार्थी डॉक्टर होण्याच्या स्वप्नासाठी या परीक्षेला सामोरे जातात. महाराष्ट्रात विशेषतः लातूर पॅटर्न प्रसिद्ध असल्याने राज्यातील विविध भागांतून विद्यार्थी कोचिंगसाठी स्थलांतर करतात.
Related News
NEET UG 2026 परीक्षा रद्द; विद्यार्थ्यांना दिलासा! पुन्हा फी-फॉर्म भरावा लागणार नाही, NTAचा मोठा निर्णय
मोठा धक्का! NEET UG 2026 परीक्षा रद्द; पेपरफुटीच्या आरोपांनंतर CBI चौकशीचे आदेश
4 दिवसांचा मानसिक छळ! SSC Result 2026 मध्ये मोठा गोंधळ; शेकडो विद्यार्थी तणावाखाली, बोर्डाकडे उत्तरच नाही
नांदेडमध्ये पोलिसांची मोठी कामगिरी; 4,796 घातक शस्त्रांसह आरोपी जेरबंद
NEET UG 2026 पेपर रिव्ह्यू: मध्यम कठीणतेचा प्रश्नपत्रिका अनुभव
NEET UG 2026 : एक छोटीशी चूक अन् थेट परीक्षा बाहेर! जाणून घ्या 7 ‘गोल्डन रूल्स’
Maharashtra HSC Result 2026 : बारावीचा निकाल जाहीर, कोकण अव्वल – लातूर सर्वात मागे
अनेक विद्यार्थ्यांनी दोन ते तीन वर्षे मोबाईल, सोशल मीडिया, मनोरंजन यापासून दूर राहून केवळ अभ्यासावर लक्ष केंद्रित केले होते. परीक्षा झाल्यानंतर त्यांना काहीसा मानसिक दिलासा मिळाला होता. काही विद्यार्थी गावी परतले, तर काहीजण कुटुंबासोबत पर्यटनासाठी गेले होते. मात्र, अचानक परीक्षा रद्द झाल्याची बातमी समोर आल्यानंतर विद्यार्थी अक्षरशः हादरून गेले.
“पेपर चांगला गेला होता, आता पुन्हा ताण”
लातूरमध्ये तयारी करणारी विद्यार्थिनी अस्मिता पांडवकर म्हणाली, “दोन वर्षांपासून आम्ही प्रामाणिकपणे अभ्यास केला. पेपरही चांगला गेला होता. चांगले गुण मिळतील अशी खात्री होती. पण आता परीक्षा रद्द झाल्याने मानसिक धक्का बसला आहे. पुन्हा त्याच मानसिकतेत जाणे कठीण आहे.”
पुण्याहून लातूरला NEET तयारीसाठी आलेली भाग्यश्री काळे सांगते, “दोन वर्षे घरापासून दूर राहून अभ्यास केला. परीक्षा झाल्यावर मन शांत झाले होते. पण आता पुन्हा अभ्यासाच्या ट्रॅकवर येणे खूप कठीण वाटत आहे.”
विद्यार्थ्यांच्या मते, ज्यांचा पेपर चांगला गेला होता त्यांचे सर्वाधिक नुकसान झाले आहे. कारण आता फेरपरीक्षेत त्याच पातळीची कामगिरी होईलच याची शाश्वती नाही.
पालकांचा यंत्रणेवर संताप
या संपूर्ण प्रकरणामुळे पालकांमध्येही तीव्र संताप दिसून येत आहे. अनेक पालकांनी परीक्षा प्रक्रियेतील निष्काळजीपणावर प्रश्नचिन्ह उपस्थित केले आहे.
रामदास दोडके या पालकांनी संतप्त प्रतिक्रिया देताना म्हटले, “माझ्या मुलाचा पेपर खूप चांगला गेला होता. उत्तरसूचीवरून त्याला चांगले गुण मिळतील याची खात्री होती. पण अचानक परीक्षा रद्द झाली. तुमच्या यंत्रणेतील चुका आमच्या मुलांच्या माथी का मारता?”
योगेश काळे या पालकांनीही तीव्र नाराजी व्यक्त केली. “ठराविक लोकांच्या चुकीमुळे देशभरातील २५ लाख विद्यार्थी आणि पालकांना शिक्षा झाली आहे. हे पूर्णपणे यंत्रणेचे अपयश आहे,” असे ते म्हणाले.
महाराष्ट्रातील NEET हब पुन्हा अॅक्टिव्ह
फेरपरीक्षा होणार असल्याने राज्यातील नामांकित कोचिंग संस्था आणि महाविद्यालयांनी पुन्हा सराव वर्ग सुरू करण्याची तयारी सुरू केली आहे. लातूर, नांदेड आणि छत्रपती संभाजीनगरमध्ये ऑफलाइन आणि ऑनलाइन बॅचेसच्या वेळापत्रकांवर काम सुरू झाले आहे.
शाहू महाविद्यालयाचे सुरेश तांबडे म्हणाले, “दोन वर्षे मेहनत घेणाऱ्या विद्यार्थ्यांना या प्रकारामुळे मोठा मानसिक धक्का बसला आहे. परीक्षा झाल्यावर अनेक विद्यार्थी गावी परतले होते. आता फेरपरीक्षेसाठी पुन्हा सराव वर्ग सुरू करावे लागणार आहेत.”शिक्षकांच्या मते, विद्यार्थ्यांचा आत्मविश्वास टिकवून ठेवणे हे सध्या सर्वात मोठे आव्हान आहे.
फेरपरीक्षेच्या तारखांबाबत संभ्रम
NEET फेरपरीक्षा नेमकी कधी होणार, किती दिवसांचा वेळ मिळणार, हॉलतिकीट आणि नोंदणी प्रक्रिया कशी असेल, याबाबत अद्याप स्पष्टता नाही. त्यामुळे विद्यार्थ्यांमध्ये संभ्रमाचे वातावरण आहे.अनेक विद्यार्थ्यांनी मानसिक थकवा आणि ताण वाढल्याची कबुली दिली आहे. “पुन्हा अभ्यास सुरू करायचा कसा?” हा प्रश्न अनेकांना सतावत आहे.
मानसिक आरोग्यावर परिणाम
मानसोपचार तज्ज्ञ डॉ. अमोल देशमुख यांनी विद्यार्थ्यांना शांत राहण्याचा सल्ला दिला आहे. “अशा घटना विद्यार्थ्यांच्या नियंत्रणाबाहेर असतात. त्यामुळे स्वतःला दोष देऊ नये. अभ्यास आधीच झालेला आहे. आता केवळ पुनरावृत्ती आणि नियोजन आवश्यक आहे,” असे त्यांनी सांगितले.त्यांच्या मते, पालकांनीही मुलांवर अतिरिक्त दबाव टाकू नये. विद्यार्थ्यांना भावनिक आधार देणे अत्यंत आवश्यक आहे.
शिक्षण व्यवस्थेवर पुन्हा प्रश्नचिन्ह
देशातील सर्वात महत्त्वाच्या परीक्षांपैकी एक असलेल्या NEET मध्ये गैरप्रकार झाल्याच्या आरोपांमुळे शिक्षण व्यवस्थेच्या विश्वासार्हतेवर पुन्हा प्रश्नचिन्ह उपस्थित झाले आहे.विद्यार्थी आणि पालकांचा एकच सवाल आहे — “जर परीक्षा सुरक्षितपणे घेता येत नसेल, तर लाखो विद्यार्थ्यांच्या भविष्याची जबाबदारी कोण घेणार?”फेरपरीक्षेच्या निर्णयामुळे निर्माण झालेला गोंधळ, मानसिक ताण आणि भवितव्याबाबतची अनिश्चितता यामुळे महाराष्ट्रातील लाखो विद्यार्थी सध्या प्रचंड दबावाखाली आहेत. आता NTA आणि केंद्र सरकार या परिस्थितीवर कशाप्रकारे नियंत्रण मिळवतात, याकडे संपूर्ण देशाचे लक्ष लागले आहे.
read also : https://ajinkyabharat.com/da-hike-2026-big-consolation-for-railway-employees-dearness-allowance/
