पालघर : महाराष्ट्रातील सर्वात महत्त्वाकांक्षी पायाभूत प्रकल्पांपैकी एक असलेल्या विरार-अलिबाग मल्टिमॉडल कॉरिडॉरच्या पहिल्या टप्प्याला राज्य सरकारने अखेर मंजुरी दिली आहे. जवळपास 126.06 किलोमीटर लांबीचा हा महामार्ग ठाणे, पालघर आणि रायगड जिल्ह्यातील 104 गावांमधून जाणार असून, मुंबई महानगर प्रदेशातील वाहतूक व्यवस्थेमध्ये मोठी क्रांती घडवून आणणार आहे. या प्रकल्पासाठी तब्बल 31,793.47 कोटी रुपयांचा खर्च अपेक्षित आहे.
मुंबई, ठाणे आणि नवी मुंबईतील वाढती वाहतूक कोंडी, अवजड वाहनांची गर्दी आणि प्रवासासाठी लागणारा वाढता वेळ या समस्यांवर हा कॉरिडॉर प्रभावी उपाय मानला जात आहे. विशेष म्हणजे, या मार्गामुळे प्रवासाचा वेळ तब्बल 90 मिनिटांनी कमी होणार असल्याचा दावा करण्यात येत आहे.
6 प्रमुख महामार्गांना मिळणार थेट जोडणी
विरार-अलिबाग कॉरिडॉर हा केवळ एक रस्ता नसून महाराष्ट्राच्या वाहतूक व्यवस्थेचा नवा कणा ठरणार आहे. हा महामार्ग NH-48 (मुंबई-अहमदाबाद), NH-848 (मुंबई-आग्रा), NH-61 (कल्याण-मुरबाड-निर्मल), मुंबई-वडोदरा एक्सप्रेसवे, मुंबई-पुणे एक्सप्रेसवे आणि NH-66 (मुंबई-गोवा महामार्ग) यांना थेट जोडणार आहे.यामुळे राज्यातील उत्तर, पश्चिम आणि दक्षिण भागातील वाहतुकीसाठी मोठा पर्याय उपलब्ध होणार आहे. विशेषतः मुंबईत प्रवेश करणाऱ्या अवजड वाहनांना शहरात न आणता बाह्य वळण मार्गाने वळवता येणार असल्यामुळे मुंबई आणि ठाण्यातील वाहतूक कोंडी कमी होण्यास मदत होईल.
Related News
Mumbai News: मुंबईकरांसाठी दिलासादायक बातमी! ‘गोरेगाव-मुलुंड लिंक रोड’चा पहिला टप्पा जूनपूर्वी सुरू; 12.2 किमी प्रकल्पामुळे ट्रॅफिकमधून मोठी सुटका
धक्कादायक आकडा! महाराष्ट्रात रेल्वे प्रवास सर्वाधिक धोकादायक; NCRB च्या अहवालात 20,519 गुन्ह्यांची नोंद
Navi Mumbai News : वाहतूककोंडीवर मोठा दिलासा, ऐरोली-काटई नाका मार्गामुळे ठाणे-नवी मुंबई प्रवास होणार सुपरफास्ट
4000 KMचा थरारक प्रवास! डहाणूच्या ‘धवललक्ष्मी’ कासवाने उलगडली समुद्रातील मोठी रहस्ये
‘सरके चुनर’ वादानंतर Nora Fatehi ची भावनिक माफी; 100 मुलींसाठी ऐतिहासिक निर्णय
Alert! 6 तासांसाठी उड्डाण ठप्प – मुंबई विमानतळ 7 मे रोजी पूर्णपणे बंद
104 गावांमधून जाणार महामार्ग
हा कॉरिडॉर वसई, भिवंडी, कल्याण, अंबरनाथ, पनवेल, उरण, पेण आणि अलिबाग तालुक्यांमधील 104 गावांमधून उभारला जाणार आहे. या मार्गामुळे अनेक ग्रामीण आणि निमशहरी भाग थेट मोठ्या विकास प्रक्रियेशी जोडले जातील.
रस्त्यालगत औद्योगिक विकास, निवासी प्रकल्प, लॉजिस्टिक्स पार्क, वेअरहाउसिंग आणि व्यावसायिक केंद्रांची निर्मिती होण्याची शक्यता वर्तवली जात आहे. त्यामुळे या भागातील रोजगारनिर्मितीला देखील मोठा वेग मिळू शकतो.
‘मल्टिमॉडल’ का?
या प्रकल्पाला ‘मल्टिमॉडल कॉरिडॉर’ असे नाव देण्यात आले आहे कारण हा केवळ वाहनांसाठीचा महामार्ग नसणार आहे. 99 मीटर रुंदीच्या या मार्गावर 8 ते 14 पदरी रस्ता तयार करण्यात येणार आहे. वाहनांना ताशी 120 किलोमीटर वेगाने प्रवास करता येईल, अशी रचना करण्यात येणार आहे.
याशिवाय स्वतंत्र बस मार्गिका, सायकल ट्रॅक, पादचारी पदपथ यांचाही समावेश असेल. विशेष म्हणजे, या मार्गाखाली गॅस पाइपलाइन, पाणीपुरवठा व्यवस्था आणि ऑप्टिकल फायबर केबल टाकण्याचीही सुविधा तयार केली जाणार आहे. त्यामुळे भविष्यातील नागरी विकास लक्षात घेऊन हा मार्ग डिझाइन करण्यात आला आहे.
पहिला टप्पा अधिक महत्त्वाचा
कॉरिडॉरचा पहिला टप्पा वसई तालुक्यातील नावघर ते पेण तालुक्यातील बलवलीपर्यंत उभारला जाणार आहे. या टप्प्याची लांबी 96.41 किलोमीटर असेल. महाराष्ट्र राज्य रस्ते विकास महामंडळ (MSRDC) या प्रकल्पाचे बांधकाम करणार आहे.पहिल्या टप्प्यात भिवंडी, कल्याण आणि पनवेल या वेगाने विकसित होणाऱ्या शहरांमधील प्रवास मोठ्या प्रमाणात सुलभ होईल. दुसरा टप्पा बलवली ते अलिबाग दरम्यान 29.9 किलोमीटरचा असेल.
भूसंपादनावर मोठा खर्च
या प्रकल्पासाठी मोठ्या प्रमाणात भूसंपादन करावे लागणार आहे. पहिल्या टप्प्यातील बांधकामासाठी जवळपास 39,793 कोटी रुपये खर्च अपेक्षित असून, त्यापैकी 22 हजार कोटी रुपयांपेक्षा अधिक निधी केवळ भूसंपादनासाठी खर्च होणार आहे.सध्या संबंधित भागांमध्ये भूसंपादनाची प्रक्रिया सुरू असून, अनेक गावांमध्ये प्रशासनाने प्राथमिक सर्वेक्षण देखील पूर्ण केले आहे.
2030 पर्यंत प्रकल्प पूर्ण होण्याची शक्यता
राज्य सरकारने या प्रकल्पासाठी तीन वर्षांचा कालावधी निश्चित केला आहे. त्यामुळे 2029 च्या अखेरीस किंवा 2030 च्या सुरुवातीपर्यंत हा महामार्ग वाहतुकीसाठी खुला होण्याची शक्यता आहे.प्रकल्प पूर्ण झाल्यानंतर विरार ते अलिबाग हे अंतर मोठ्या प्रमाणात कमी होईल. तसेच नवी मुंबई आंतरराष्ट्रीय विमानतळ, अटल सेतू आणि जेएनपीटी बंदराशी थेट संपर्क मिळाल्यामुळे उद्योग आणि व्यापार क्षेत्रालाही मोठा फायदा होईल.
‘तिसऱ्या मुंबई’चा कणा ठरणार
रायगड परिसरात विकसित होणाऱ्या ‘तिसऱ्या मुंबई’साठी हा कॉरिडॉर अत्यंत महत्त्वाचा मानला जात आहे. मुंबई आणि नवी मुंबईनंतर रायगड परिसराला नवे आर्थिक आणि निवासी केंद्र म्हणून विकसित करण्याचा सरकारचा प्रयत्न आहे. विरार-अलिबाग कॉरिडॉर हा या नव्या शहर विकासाचा मुख्य आधार ठरेल.
वाहतूक, उद्योग, लॉजिस्टिक्स आणि नागरी सुविधा यांचे एकत्रीकरण झाल्यास मुंबई महानगर प्रदेशाच्या विकासाला नवे परिमाण मिळण्याची शक्यता तज्ज्ञांकडून व्यक्त केली जात आहे.
