मूर्तिजापूरमध्ये मादी जातीच्या हरणाचा मृत्यू; वनविभागाकडून तपास सुरू

सामाजिक कार्यकर्ते श्री. गजानन चव्हाण व त्यांचा मुलगा श्रेयश चव्हाण हे नेहमीप्रमाणे सकाळच्या वेळी गोयनका नगर येथून तहसील ग्राऊंडकडे धावण्यासाठी जात होते. यावेळी डी.पी. रोडवरील गणेश अ‍ॅग्रो इंजिनिअरिंग यांच्या बाजूच्या नालीमध्ये एक हरीण पडलेले त्यांच्या निदर्शनास आले. प्रथमदर्शनी ते जखमी अवस्थेत असल्याचा अंदाज त्यांनी व्यक्त केला. त्यांनी जवळ जाऊन हरणाला हलवण्याचा प्रयत्न केला असता कोणतीही हालचाल जाणवली नाही. त्यानंतर बारकाईने पाहणी केली असता संबंधित हरणाचा मृत्यू झाल्याचे स्पष्ट झाले.

घटनेची गंभीरता लक्षात घेता श्री. चव्हाण यांनी तत्काळ वनविभागाशी संपर्क साधला. वनपरिक्षेत्र अधिकारी इचे साहेब यांनी परिस्थितीची माहिती मिळताच कर्मचारी नौषादभाई यांना घटनास्थळी पाठवले. वनविभागाच्या पथकाने घटनास्थळी येऊन पंचनामा केला व स्थानिकांच्या मदतीने हरणाला नालीमधून बाहेर काढले. त्यानंतर पुढील वैद्यकीय तपासणी व शवविच्छेदनासाठी हरणाला वाहनाद्वारे उमरी येथील नर्सरीकडे रवाना करण्यात आले.

प्राथमिक माहितीनुसार, मूर्तिजापूर शहरालगतचा परिसर जंगलाला लागून असल्याने अनेकदा जंगली प्राणी अन्न व पाण्याच्या शोधात शहराच्या दिशेने येतात. यापूर्वीही हरीण, रानडुक्कर तसेच इतर वन्य प्राणी शहरात शिरल्याच्या घटना घडल्या आहेत. संबंधित मादी हरणाच्या मृत्यूबाबत प्राथमिक अंदाज व्यक्त करताना वनविभागाच्या सूत्रांनी सांगितले की, भटक्या कुत्र्यांचा पाठलाग लागल्याने हरीण घाबरून धावत असताना नालीमध्ये पडले असावे. पडताना झालेल्या गंभीर दुखापतीमुळे त्याचा मृत्यू झाला असण्याची शक्यता वर्तवली जात आहे. मात्र नेमके कारण शवविच्छेदन अहवालानंतरच स्पष्ट होणार आहे.

घटनास्थळी नागरिकांची मोठी गर्दी जमली होती. शहरात जंगली प्राणी येण्याच्या घटना वाढत असल्याने नागरिकांमध्ये चिंता व्यक्त होत आहे. वाढते शहरीकरण, जंगल क्षेत्रातील घट, तसेच पाण्याची कमतरता यामुळे वन्य प्राणी मानवी वस्तीकडे वळत असल्याचे जाणकारांचे मत आहे. अशा परिस्थितीत वनविभागाने सतर्कता वाढवून शहरालगतच्या भागात नियमित गस्त घालण्याची गरज व्यक्त होत आहे.

वनविभागाकडून पुढील तपास सुरू असून, नागरिकांनी जंगली प्राणी आढळल्यास त्यांना त्रास देऊ नये किंवा घाबरवू नये, तसेच तात्काळ वनविभागाला माहिती द्यावी, असे आवाहन करण्यात आले आहे. तसेच भटक्या कुत्र्यांचा वाढता उपद्रव नियंत्रणात आणण्यासाठी स्थानिक प्रशासनाने ठोस उपाययोजना कराव्यात, अशी मागणीही काही नागरिकांनी केली आहे.

या घटनेमुळे वन्यजीव संरक्षणाचा प्रश्न पुन्हा ऐरणीवर आला आहे. शहर आणि जंगल यांच्यातील वाढती जवळीक, मानवी हस्तक्षेप आणि पर्यावरणीय बदल यांचा वन्य प्राण्यांवर होत असलेला परिणाम याकडे गांभीर्याने पाहण्याची आवश्यकता आहे. मूर्तिजापूरमध्ये घडलेली ही घटना प्रशासनासाठी इशारा ठरत असून, भविष्यात अशा घटना टाळण्यासाठी प्रतिबंधात्मक उपाययोजना राबविणे गरजेचे असल्याचे मत व्यक्त होत आहे.