30 हजारांची लाच घेताना रंगेहात पकडले; अधिकाऱ्याच्या घरातून 4 कोटींची रोकड जप्त

ओडिशामधील भ्रष्टाचारविरोधी कारवाईत एक धक्कादायक प्रकरण समोर आले आहे. केवळ 30 हजार रुपयांची लाच घेताना रंगेहात पकडलेल्या सरकारी अधिकाऱ्याच्या घरावर छापा टाकल्यानंतर तब्बल कोट्यवधी रुपयांची रोकड जप्त करण्यात आली. या कारवाईमुळे राज्यातील प्रशासकीय वर्तुळात मोठी खळबळ उडाली आहे.

कटक सर्कल माइन्सचे डेप्युटी डायरेक्टर देबब्रत मोहंती यांना ओडिशा विजिलन्सच्या पथकाने ट्रॅप ऑपरेशनमध्ये अटक केली. एका लायसन्सधारक कोळसा विक्रेत्याकडून 30 हजार रुपयांची लाच स्वीकारताना त्यांना पकडण्यात आले. संबंधित व्यावसायिकाने परवानगीसंदर्भातील कामासाठी लाच मागितल्याची तक्रार केल्यानंतर विजिलन्स विभागाने सापळा रचला होता. नियोजनबद्ध कारवाईत मोहंती यांना लाच स्वीकारताना रंगेहात पकडण्यात आले.

भुवनेश्वरमधील फ्लॅटवर धाड

अटकेनंतर ओडिशा विजिलन्स विभागाने तातडीने मोहंती यांच्याशी संबंधित विविध ठिकाणी छापेमारी सुरू केली. भुवनेश्वरमधील पाटिया परिसरातील श्री विहार येथील ‘नेचर्स क्रेस्ट’ अपार्टमेंटमधील त्यांच्या निवासस्थानी छापा टाकण्यात आला. या कारवाईदरम्यान अधिकाऱ्यांना ट्रॉली बॅग, कपाटे आणि घरातील विविध ठिकाणी लपवून ठेवलेली मोठ्या प्रमाणात रोकड सापडली.

प्राथमिक माहितीनुसार, या फ्लॅटमधून तब्बल 4 कोटी रुपयांहून अधिक रक्कम जप्त करण्यात आली आहे. ओडिशा विजिलन्सच्या इतिहासातील ही आतापर्यंतची सर्वात मोठी रोख जप्ती मानली जात आहे. नोटांची बंडलंच बंडलं पाहून तपास अधिकाऱ्यांनाही धक्का बसला.

इतर ठिकाणीही छापे

ओडिशा  लाच प्रकरणाचा तपास अधिक व्यापक करत विजिलन्स अधिकाऱ्यांनी भद्रक जिल्ह्यातील मथासाही येथील वडिलोपार्जित घरावर तसेच कटकमधील कार्यालयीन कक्षावर एकाचवेळी छापेमारी केली. कटक सर्कल माइन्सचे डेप्युटी डायरेक्टर देबब्रत मोहंती यांच्या मालकीच्या विविध ठिकाणांची सखोल झडती घेण्यात आली. या कारवाईदरम्यान कार्यालयातील शेल्फ, कपाटे आणि वैयक्तिक वस्तूंमधून सुमारे 1.20 लाख रुपये अतिरिक्त जप्त करण्यात आले.

याआधी त्यांच्या निवासस्थानातून मोठ्या प्रमाणावर रोकड सापडली होतीच; त्यात या नव्या जप्तीची भर पडल्याने प्रकरणाची व्याप्ती आणखी वाढली आहे. ओडिशा विजिलन्स पथकाने सर्व कागदपत्रे, आर्थिक व्यवहारांची नोंद आणि मालमत्तेचे तपशील तपासण्यासाठी ताब्यात घेतले आहेत. अधिकाऱ्यांकडून मिळालेल्या प्राथमिक माहितीनुसार, उत्पन्नाच्या तुलनेत अधिक मालमत्ता असल्याचा संशय बळावला आहे. या छापेमारीमुळे प्रशासनात खळबळ उडाली असून, पुढील चौकशीत आणखी धक्कादायक माहिती समोर येण्याची शक्यता वर्तवली जात आहे.

तपासादरम्यान मोहंती यांच्याकडे आणखी संपत्ती असल्याची माहिती मिळाल्याने भुवनेश्वरच्या पहला परिसरातील सुमारे 2400 चौरस फुटांचे दोन मजली घरही तपासण्यात आले. त्याठिकाणी सुमारे 130 ग्रॅम सोन्याचे दागिने आढळून आले असल्याची माहिती अधिकाऱ्यांनी दिली आहे.

पैशांची मोजणी सुरू

जप्त केलेल्या नोटांची अधिकृत मोजणी सुरू असून अंतिम आकडा आणखी वाढण्याची शक्यता नाकारता येत नाही. रोख रक्कम व्यतिरिक्त अन्य गुंतवणूक, मालमत्ता आणि बँक खात्यांची माहिती गोळा करण्याचे काम सुरू आहे. अधिकाऱ्यांच्या मते, तपास पुढे गेला तर आणखी ‘ब्लॅक मनी’ किंवा बेकायदेशीर मालमत्ता उघड होऊ शकते.

भ्रष्टाचारविरोधी कारवाईचा मोठा धक्का

भ्रष्टाचारविरोधी यंत्रणांनी अशा प्रकारच्या कारवायांमुळे प्रशासनातील पारदर्शकता वाढवण्याचा निर्धार व्यक्त केला आहे. सामान्य नागरिकांकडून तक्रारी आल्यास तात्काळ कारवाई केली जाईल, असा इशाराही देण्यात आला आहे.

पुढील कायदेशीर प्रक्रिया

मोहंती यांच्याविरुद्ध भ्रष्टाचार प्रतिबंधक कायद्यानुसार गुन्हा दाखल करण्यात आला असून त्यांची मालमत्ता तपासाअंतर्गत ठेवण्यात आली आहे. न्यायालयीन कोठडी आणि पुढील चौकशीदरम्यान अधिक धक्कादायक माहिती समोर येण्याची शक्यता आहे.

या प्रकरणाने पुन्हा एकदा प्रशासनातील भ्रष्टाचाराचा मुद्दा ऐरणीवर आणला आहे. एका लहानशा लाचेच्या तक्रारीतून उघड झालेल्या या कोट्यवधींच्या घबाडामुळे जनतेत संताप व्यक्त होत आहे. विजिलन्स विभागाची ही कारवाई राज्यातील सर्वात मोठ्या कॅश जप्तींपैकी एक ठरली असून, भ्रष्ट अधिकाऱ्यांवर कठोर कारवाई होण्याची अपेक्षा व्यक्त केली जात आहे.

read also:https://ajinkyabharat.com/doan-cinemani-gajwala-jhee-chitragaurav-award-2026/