छत्रपती संभाजीनगर महापौरपदाची लढत रंगात; भाजपकडून सर्व्हेची चर्चा, तुफान लॉबिंग आणि सत्ताकेंद्रातील हालचालींना वेग
छत्रपती संभाजीनगर महापालिकेतील सत्तासमीकरणे बदलल्यानंतर आता शहराचं लक्ष पूर्णपणे 23 व्या महापौरपदाकडे लागलं आहे. नुकत्याच झालेल्या निवडणुकीत दोन्ही राष्ट्रवादी काँग्रेस आणि दोन्ही शिवसेनांचा धुव्वा उडवत भारतीय जनता पार्टीने स्पष्ट बहुमत मिळवलं आहे. भाजप 57 जागांसह सर्वात मोठा पक्ष ठरला असून, त्यानंतर एमआयएम दुसऱ्या क्रमांकाचा पक्ष म्हणून पुढे आला आहे. या पार्श्वभूमीवर महापौरपद भाजपच्याच ताब्यात जाणार, हे जवळपास निश्चित मानलं जात असताना, भाजपमध्येच महापौरपदासाठी जोरदार लॉबिंग, फिल्डिंग आणि अंतर्गत हालचालींना वेग आला आहे.
महापौरपद खुल्या प्रवर्गासाठी आरक्षित
यंदा छत्रपती संभाजीनगर महापालिकेचं महापौरपद खुल्या प्रवर्गासाठी आरक्षित आहे. त्यामुळे पक्षांतर्गत इच्छुकांची संख्या मोठ्या प्रमाणात वाढली आहे. महापौरपद हे केवळ शहराचा प्रथम नागरिक म्हणूनच नव्हे, तर राज्याच्या राजकारणात महत्त्वाची भूमिका बजावणारं पद मानलं जातं. आगामी विधानसभा, लोकसभा आणि स्थानिक स्वराज्य संस्थांच्या राजकारणावरही या निवडीचा प्रभाव राहणार आहे. त्यामुळे भाजप नेतृत्व ही निवड अत्यंत काटेकोरपणे करत असल्याचं सांगितलं जात आहे.
भाजपकडून सर्व्हे सुरू असल्याचा दावा
छत्रपती संभाजीनगरमध्ये सध्या सर्वाधिक चर्चा आहे ती म्हणजे, भाजपकडून महापौरपदासाठी सर्व्हे सुरू असल्याची. कार्यकर्त्यांमध्ये, नगरसेवकांमध्ये आणि राजकीय वर्तुळात ही चर्चा जोर धरत आहे. महापौरपदासाठी इच्छुक असलेल्या नेत्यांच्या कामगिरीचा, जनसंपर्काचा, संघटन कौशल्याचा आणि पक्षाशी निष्ठेचा आढावा घेतला जात असल्याचा दावा केला जात आहे. कार्यकर्त्यांच्या अपेक्षेनुसार महापौर असावा, यासाठी सर्वेक्षणातून मत घेतलं जात असल्याची चर्चा आहे.
प्रदेशाध्यक्ष रवींद्र चव्हाण यांची शहरात उपस्थिती
या सर्व चर्चांना अधिकच बळ मिळालं आहे ते म्हणजे भाजप प्रदेशाध्यक्ष रवींद्र चव्हाण यांच्या छत्रपती संभाजीनगर दौऱ्यामुळे. रवींद्र चव्हाण सध्या शहरात असून जिल्हा परिषद आणि पंचायत समितीच्या निवडणुकांचा आढावा घेत आहेत. मात्र, याच दौऱ्यात महापालिकेतील महत्त्वाच्या पदांबाबतही शिक्कामोर्तब होणार असल्याचा दावा केला जात आहे. महापौर, उपमहापौर, सभापती आणि स्थायी समिती अध्यक्षपदासाठी नावांवर चर्चा सुरू असल्याचं सांगितलं जात आहे.
महापौरपदासाठी कोण-कोण इच्छुक?
भाजपकडून महापौरपदासाठी अनेक दिग्गज नगरसेवकांची नावं चर्चेत आहेत. यामध्ये राजू वैद्य, समीर राजूरकर, सुरेंद्र कुलकर्णी, सविता कुलकर्णी, माधुरी अदवंत, महेश माळवतकर, विजय औताडे, अप्पासाहेब हिवाळे, शिवाजी दांडगे, राज वानखेडे, रामेश्वर भादवे, अनिल मकरिये अशा अनेक नावांचा समावेश आहे. प्रत्येक इच्छुकाकडून पक्ष नेतृत्वापर्यंत पोहोचण्यासाठी प्रयत्न सुरू असल्याचं दिसून येत आहे. काही जण संघटनात्मक कामगिरीवर भर देत आहेत, तर काही जण जनसंपर्क आणि विकासकामांचा दाखला देत आहेत.
भाजपमधील अंतर्गत रणनीती
भाजपसाठी छत्रपती संभाजीनगर हे राजकीयदृष्ट्या अत्यंत महत्त्वाचं शहर आहे. त्यामुळे केवळ लोकप्रियतेवर नव्हे, तर प्रशासन हाताळण्याची क्षमता, विरोधकांना सामोरं जाण्याची ताकद आणि पक्षाला दीर्घकालीन फायदा होईल, असा चेहरा शोधण्याचा प्रयत्न सुरू आहे. महापौरपदाची निवड ही केवळ एका व्यक्तीपुरती मर्यादित नसून, संपूर्ण शहराच्या राजकारणाची दिशा ठरवणारी असल्याने नेतृत्व कोणताही धोका घ्यायला तयार नाही.
दानवेंचा भाजपला टोला
या सर्व घडामोडींवर विरोधकांकडूनही प्रतिक्रिया येत आहेत. उद्धव ठाकरे गटाचे नेते आणि विधानपरिषदेचे विरोधी पक्षनेते अंबादास दानवे यांनी भाजपवर चिमटा काढला आहे. भाजपकडून महापौरपदासाठी सर्व्हे सुरू असल्याच्या चर्चेवर प्रतिक्रिया देताना दानवे म्हणाले, “भाजपकडे आपल्या कार्यकर्त्यांची संपूर्ण माहिती असते. कोण काय काम करतं, त्याची क्षमता काय आहे, हे नेतृत्वाला माहीत असतं. असं असताना सर्व्हे करण्याची गरज का भासते, हा प्रश्न आहे. जनतेपर्यंत पोहोचण्याची क्षमता, महापालिकेची माहिती आणि प्रशासन हाताळण्याचे गुण महापौराला आवश्यक असतात. मात्र, सर्व्हे का केला जातो, हे भाजपलाच माहीत.”
भाजपकडून सर्व्हेच्या दाव्यांचा इन्कार
दरम्यान, भाजप शहर जिल्हाध्यक्ष किशोर शितोळे यांनी सर्व्हेच्या चर्चांना पूर्णविराम देण्याचा प्रयत्न केला आहे. त्यांनी स्पष्ट शब्दांत सांगितलं की, महापौरपदासाठी कोणताही सर्व्हे करण्यात येत नाही. “पक्षाकडे प्रत्येक कार्यकर्त्याची सविस्तर माहिती आहे. कोण कुठे काम करतं, त्याची ताकद काय आहे, हे विचारण्यासाठी सर्व्हे करण्याची गरज नाही. भाजपची यंत्रणा अत्यंत सक्षम आहे. कोअर टीम योग्य निर्णय घेईल आणि तो प्रदेशाध्यक्षांकडे पाठवण्यात येईल,” असं शितोळे यांनी स्पष्ट केलं.
दोन दिवसांत गट स्थापन होणार?
भाजप शहर नेतृत्वाकडून येत्या दोन दिवसांत महापालिकेतील गट स्थापना करण्यात येईल, असा दावाही करण्यात आला आहे. गट स्थापनेनंतर महापौर आणि उपमहापौरपदाचा मार्ग मोकळा होणार आहे. त्यामुळे येणारे काही दिवस छत्रपती संभाजीनगरच्या राजकारणासाठी अत्यंत निर्णायक ठरणार आहेत.
एमआयएमची भूमिका काय?
भाजपनंतर एमआयएम दुसरा मोठा पक्ष ठरला असला, तरी संख्याबळाच्या जोरावर भाजपला एमआयएमच्या पाठिंब्याची आवश्यकता नाही. मात्र, सभागृहातील राजकारणात एमआयएम आक्रमक भूमिका घेण्याची शक्यता नाकारता येत नाही. महापालिकेतील प्रत्येक निर्णयात एमआयएमकडून सत्ताधाऱ्यांना जाब विचारला जाण्याची शक्यता आहे.
शहराच्या विकासावर परिणाम करणारी निवड
महापौर कोण होणार, यावर शहराच्या विकासाचा वेग, प्रशासनाची दिशा आणि महापालिकेची कार्यशैली अवलंबून असणार आहे. पाणीपुरवठा, रस्ते, स्वच्छता, वाहतूक, स्मार्ट सिटी प्रकल्प आणि औद्योगिक विकास अशा अनेक मुद्द्यांवर पुढील निर्णय घेतले जाणार आहेत. त्यामुळे महापौरपदाची निवड ही केवळ राजकीय नाही, तर प्रशासकीयदृष्ट्याही महत्त्वाची ठरणार आहे.
कुणाला लागणार महापौरपदाची ‘लॉटरी’?
भाजपकडे बहुमत असलं तरी अंतिम निर्णय पक्षश्रेष्ठींच्याच हाती आहे. संघटनात्मक कामगिरी, निष्ठा, जनाधार आणि भविष्यातील राजकीय समीकरणे पाहूनच नावावर शिक्कामोर्तब होणार आहे. त्यामुळे महापौरपदाची ‘लॉटरी’ नेमकी कुणाला लागणार, याकडे संपूर्ण शहराचं लक्ष लागलं आहे.
छत्रपती संभाजीनगरच्या राजकारणात सध्या कमालीची उत्सुकता आणि तणावाचं वातावरण आहे. येत्या काही दिवसांत महापौरपदाचा निर्णय जाहीर होणार असून, त्यानंतर शहराच्या राजकारणाची नवी दिशा ठरणार आहे.
