खामगाव शहरात घरफोडीच्या घटनांनी पुन्हा एकदा डोके वर काढले असून, सिंधी कॉलनीतील झुलेलाल नगर परिसरात बंद घर फोडून अडीच लाख रुपयांचा सोन्याचा ऐवज लंपास केल्याची घटना समोर आली आहे. या घटनेमुळे परिसरात भीतीचे आणि असुरक्षिततेचे वातावरण निर्माण झाले आहे.
याबाबत खामगाव शहर पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे. रवि राजुमल होतबानी (वय ४५, व्यवसाय – टूर्स अँड ट्रॅव्हल्स, रा. सिंधी कॉलनी, झुलेलाल नगर, खामगाव) यांनी दिलेल्या तक्रारीनुसार ही चोरी उघडकीस आली. फिर्यादींचे काका गेल्या तीन वर्षांपासून पुणे येथे वास्तव्यास असून, त्यांचे खामगाव येथील घर बराच काळ बंद होते. विशेष म्हणजे, या बंद घराच्या अगदी शेजारीच फिर्यादी स्वतः कुटुंबासह राहतात.
तक्रारीनुसार, दिनांक २४ जानेवारी २०२६ रोजी रात्री सुमारे १० वाजता संबंधित घराचे कुलूप सुरक्षित अवस्थेत होते. मात्र दुसऱ्या दिवशी म्हणजेच २५ जानेवारी २०२६ रोजी सकाळी सुमारे ८.३० वाजता घराकडे पाहणी केली असता कुलूप तुटलेले आणि मुख्य दरवाजा उघडा असल्याचे दिसून आले. या प्रकारामुळे संशय बळावल्याने घरात प्रवेश केला असता, कपाटे फोडलेली, कपडे व इतर साहित्य अस्ताव्यस्त पसरलेले दिसून आले.
Related News
मांजाने युवकाचा गळा चिरला; दुचाकीस्वार गंभीर जखमी
चोरट्यांनी घरातील मौल्यवान सोन्याचे दागिने चोरून नेल्याचे स्पष्ट झाले. यात सोन्याची कंगणे, अंगठ्या, चैन, नेकलेस आणि मंगळसूत्र असा एकूण सुमारे २०० ग्रॅम वजनाचा सोन्याचा ऐवज चोरीस गेल्याचे निष्पन्न झाले आहे. चोरीस गेलेल्या दागिन्यांची अंदाजे किंमत सुमारे २ लाख ४ हजार रुपये असल्याचे तक्रारीत नमूद करण्यात आले आहे.
या प्रकरणी अप. क्र. ४९/२०२६ अन्वये भारतीय न्याय संहिता (BNS) कलम ३०५ (अ) व ३३१ (४) अंतर्गत गुन्हा दाखल करण्यात आला आहे. पुढील तपास पोलीस उपनिरीक्षक अमोल पाटे करीत असून, परिसरातील सीसीटीव्ही फुटेज तपासणे तसेच संशयितांची माहिती गोळा करण्याचे काम सुरू आहे.
दरम्यान, अलीकडील काळात खामगाव शहरात घरफोडीच्या घटनांमध्ये वाढ झाल्याने नागरिकांमध्ये तीव्र चिंता व्यक्त केली जात आहे. दीर्घकाळ बंद असलेल्या घरांकडे चोरट्यांचे लक्ष वाढत असल्याचे चित्र असून, पोलिसांनी रात्रीच्या गस्तीत वाढ करावी व नागरिकांनीही सतर्क राहावे, अशी मागणी स्थानिकांकडून करण्यात येत आहे.
