बेस्ट पतपेढी निवडणुकीत शशांक राव यांचा विजय; भाजपकडून मोठी घोषणा, महापालिका रणधुमाळीला सुरुवात?
मुंबई | 20 ऑगस्ट 2025 – बेस्ट पतपेढीच्या निवडणुकीत शशांक राव यांच्या पॅनलने घवघवीत यश मिळवत 14 जागा जिंकल्या आहेत.
या विजयानंतर भाजपने शशांक राव यांच्यावर मोठी जबाबदारी सोपवली असून, मुंबई महानगरपालिकेच्या
निवडणुकीत राजकीय समीकरणे बदलणार असल्याचे संकेत मिळत आहेत.
🔹 ठाकरे गट–मनसेचा भोपळा
या निवडणुकीत उद्धव ठाकरे गट आणि मनसेने एकत्र येत लढवले होते. मात्र, त्यांच्या गोटातील एकाही उमेदवाराला विजय मिळवता आला नाही.
परिणामी या आघाडीला मोठा धक्का बसला आहे. दरम्यान, प्रसाद लाड–नितेश राणे–किरण पावसकर यांच्या
सहकार समृद्धी पॅनलचे 7 उमेदवार विजयी झाले आहेत.
🔹 भाजपकडून मोठी घोषणा
मुंबई भाजप अध्यक्ष आशिष शेलार यांनी निकालानंतर स्पष्ट केले की, ही निवडणूक कामगारांची होती,
परंतु उद्धव गट आणि मनसेने राजकारण केल्याचा फटका त्यांना बसला.
शेलार म्हणाले –
“0 + 0 हा शून्यच होतो, हे मी आधी सांगितलं होतं. आज मुंबईचा, मराठीचा आणि कामगारांचा विजय झाला.”
याचबरोबर त्यांनी महापालिका निवडणुकीसाठी स्टार प्रचारकांची यादी लवकरच जाहीर होईल असे सांगत, शशांक राव आणि प्रसाद लाड यांची नावे स्टार प्रचारक म्हणून घोषित केली.
🔹 प्रसाद लाड यांचा टोला
विजयानंतर प्रसाद लाड यांनी ठाकरे गटावर निशाणा साधला.“बेस्ट निवडणुकीत ठाकरे ब्रँडची हवा निघाली. भोपळा मिळाला, त्यांच्याकडे ना पत उरली ना पेढी. पराभवानंतर आता कारणं सांगितली जात आहेत,” असा टोला त्यांनी लगावला.
🔹 पराभवानंतरही अभिनंदन
मनसे नेते संदीप देशपांडे यांनी मात्र पराभवानंतर उदारमनाने प्रतिक्रिया दिली.“शशांक राव आणि त्यांच्या पॅनलचे अभिनंदन करतो.
कामगारांना न्याय देण्याची अपेक्षा आहे,” असे ते म्हणाले.
Read also : https://ajinkyabharat.com/aashiya-capori-chinta-vadhali-rinkula-clean-bold-karanara-ha-tarun-angle/
