राजुरा शहरातून ट्रॅफिक पोलिस गायब?
महामार्गाच्या कामामुळे अपघाताची भीती, नागरिकांमध्ये संताप
राजुरा शहर व परिसरातील वाहतूक व्यवस्थेचा प्रश्न दिवसेंदिवस गंभीर होत चालला असून, शहरातून जणू वाहतूक पोलिस गायबच झाले आहेत, असा सवाल आता उघडपणे उपस्थित केला जात आहे. महामार्गाच्या सुरू असलेल्या कामामुळे शहरात अनेक ठिकाणी वाहतूक कोंडी, अपघाताचे वाढते प्रकार आणि नागरिकांच्या जीविताला धोका निर्माण झाला असताना, जबाबदार असलेले वाहतूक पोलिस नेमके कुठे आहेत, याबाबत मोठे प्रश्नचिन्ह उभे राहिले आहे.
राजुरा पोलिस स्टेशन अंतर्गत स्वतंत्र वाहतूक शाखा अस्तित्वात आहे. शहरातील वाहतूक कोंडी रोखणे, वाहनधारकांना मार्गदर्शन करणे, अपघात टाळण्यासाठी संवेदनशील ठिकाणी पोलिसांची तैनाती करणे ही त्यांची प्रमुख जबाबदारी आहे. मात्र प्रत्यक्षात चित्र वेगळेच दिसत असून, गेल्या काही महिन्यांपासून शहरातील एकाही प्रमुख चौकात वाहतूक पोलिस दिसून येत नाहीत, अशी नागरिकांची तक्रार आहे.
Related News
महावितरणतर्फे यशवंतराव चव्हाण यांना अभिवादन
स्मार्टफोन किंमतीत झटका: 16 मार्चपासून OPPO आणि OnePlus चे दर महागणार – ग्राहकांसाठी मोठा फटका
LPG Shortage Maharashtra : युद्धामुळे व्यावसायिक गॅस सिलेंडरचा तुटवडा – 5 मोठे शहर प्रभावित
‘कार्यालयीन कर्तव्यासोबतच स्वतःच्या आरोग्याची जपणूक करा’; महावितरणमध्ये उत्साहात साजरा जागतिक महिला दिन
पालकांची भीती; 12 वर्षांच्या मुलाने रचला अपहरणाचा बनाव, भंडाऱ्यातील पवनीतील धक्कादायक प्रकार
रिक्षा चालकांसाठी महत्त्वाची बातमी! नवीन परवान्यांवर 9 मार्चपासून स्थगिती
सारा अर्जुनच्या नावाचा खोटा पोस्ट व्हायरल; राज अर्जुन म्हणतात – मुलगी कधीच असं म्हणणार नाही
गॅस टंचाईचा उद्योगांना मोठा फटका; संभाजीनगरातील पाच उद्योग बंद पडण्याच्या मार्गावर
Petrol–Diesel दरांवर केंद्राचा मोठा निर्णय, युद्धामुळे वाढ होणार नाही!
घरगुती गॅस सिलिंडर बुकिंगमध्ये बदल – कालावधी आता 25 दिवस, सर्वसामान्यांसाठी मोठा फटका
इराणविरोधात तुर्कीने थेट कारवाई, उत्तर सायप्रसमध्ये एफ-१६ विमाने तैनात
संवेदनशील चौक पोलिसविनाच!
राजुरा शहरातील नाका नंबर ३, पंचायत समिती चौक, सास्ती वळण आणि कर्नल चौक हे परिसर नेहमीच वर्दळीचे मानले जातात. विशेषतः नाका नंबर ३ हा परिसर अत्यंत संवेदनशील असून, येथे वाईन शॉप, बियर बार, बियर शॉपी असल्यामुळे दिवसभर मोठी गर्दी असते. या चौकात चार प्रमुख रस्ते एकत्र येतात. अशा ठिकाणी सतत वाहतूक पोलिसांची उपस्थिती आवश्यक असताना, प्रत्यक्षात मात्र पोलिसांचा कुठलाही मागमूस नाही.
नाका नंबर ३ परिसरात यापूर्वी अनेकदा किरकोळ तसेच गंभीर अपघात घडले आहेत. मद्यधुंद वाहनचालक, वेगाने धावणारी वाहने आणि अचानक होणारी वाहतूक कोंडी यामुळे अपघाताची शक्यता कायम असते. तरीही या ठिकाणी पोलिसांची तैनाती नसल्याने नागरिकांमध्ये तीव्र नाराजी व्यक्त केली जात आहे.
पंचायत समिती चौक – अपघातांचा इतिहास
पंचायत समिती चौक हा राजुरातील सर्वात धोकादायक चौकांपैकी एक म्हणून ओळखला जातो. परराज्यातून येणारी जड वाहतूक याच मार्गाने शहरात प्रवेश करते. ट्रक, कंटेनर, बस आणि खासगी वाहने यांची सतत वर्दळ असल्यामुळे हा परिसर कायम गजबजलेला असतो. याच चौकात यापूर्वी अनेक अपघात झाले असून, त्यात अनेक निष्पाप नागरिकांना आपला जीव गमवावा लागला आहे.
विशेष म्हणजे, पंचायत समिती चौकाच्या दोन्ही बाजूंनी सध्या महामार्गाचे काम सुरू आहे. रस्त्याच्या मध्यभागी खोदकाम करण्यात आले असल्याने वाहतूक आणखी विस्कळीत झाली आहे. अशा परिस्थितीत वाहतूक पोलिसांची उपस्थिती अत्यंत गरजेची असताना, येथेही पोलिस दिसून येत नाहीत. त्यामुळे हा परिसर जणू अपघाताला आमंत्रण देणारा पॉईंट बनला आहे.
महामार्गाचे काम आणि वाढती वाहतूक कोंडी
राजुरा शहरातून जाणाऱ्या महामार्गाचे काम सध्या वेगात सुरू आहे. रस्ते खोदलेले, अवजड यंत्रसामग्री, अर्धवट रस्ते आणि दिशादर्शक फलकांचा अभाव यामुळे वाहनचालक गोंधळात पडत आहेत. परिणामी वाहतूक कोंडी ही नित्याची बाब झाली आहे. सकाळ आणि संध्याकाळच्या वेळी तर परिस्थिती अधिकच गंभीर होते.
अशा वेळी वाहतूक पोलिसांनी पुढाकार घेऊन वाहतूक सुरळीत ठेवणे अपेक्षित असते. मात्र प्रत्यक्षात शहरातील अपघाती व वर्दळीचे ठिकाण सोडून पोलिस शहराबाहेर कुठेतरी शिट्टी वाजवत असल्याचे चित्र दिसत आहे, अशी संतप्त प्रतिक्रिया नागरिक देत आहेत. त्यामुळे पोलिसांच्या कर्तव्यनिष्ठेवरही प्रश्न उपस्थित होत आहेत.
नागरिकांमध्ये रोष, प्रश्नांचा भडिमार
“वाहतूक पोलिस नेमके कुठे असतात?”, “ते शहराबाहेर कोणाची सेवा बजावत आहेत?”, “अपघात झाल्यावरच पोलिस जागे होणार का?” असे एक ना अनेक प्रश्न आता सामान्य नागरिक विचारत आहेत. शहर परिसरात पोलिसांच्या शिट्टीचा आवाज ऐकू येत नसल्याने, पोलिसांची अनुपस्थिती प्रकर्षाने जाणवत आहे.
वाहनधारक, व्यापारी, पादचारी तसेच स्थानिक नागरिक यांच्यात यामुळे मोठा रोष पाहायला मिळत आहे. अपघात झाल्यास त्याची जबाबदारी कोण घेणार, असा सवालही उपस्थित होत आहे. प्रशासनाने वेळेत दखल न घेतल्यास भविष्यात मोठी दुर्घटना घडण्याची भीती व्यक्त केली जात आहे.
प्रशासनाने तातडीने लक्ष देण्याची गरज
मुळात वाहतूक पोलिसांची नेमणूक हीच शहरातील अपघाती व वर्दळीच्या ठिकाणी कर्तव्य बजावण्यासाठी करण्यात आलेली असते. मात्र राजुरा शहरात हे उद्दिष्टच फोल ठरत असल्याचे चित्र आहे. गेल्या काही महिन्यांपासून शहरातील एकाही चौकात वाहतूक पोलिसांची नियमित तैनाती दिसून न येणे ही गंभीर बाब आहे.
महामार्गाचे काम सुरू असताना, अपघातांची शक्यता वाढलेली असताना आणि नागरिकांचा जीव धोक्यात असताना प्रशासनाने याकडे गांभीर्याने पाहणे गरजेचे आहे. अन्यथा “अपघात झाल्यावर उपाय” करण्यापेक्षा “अपघात टाळण्यासाठी उपाय” करणे अधिक महत्त्वाचे आहे, हे प्रशासनाने लक्षात घ्यावे, अशी मागणी नागरिकांकडून होत आहे.
राजुरा शहरातील वाहतूक व्यवस्था सुरळीत व सुरक्षित करण्यासाठी वाहतूक पोलिसांची तातडीने शहरातील संवेदनशील चौकांमध्ये तैनाती करावी, अशी जोरदार मागणी आता सर्व स्तरांतून होत आहे. अन्यथा वाहतूक पोलिसांच्या अनुपस्थितीचा फटका थेट सामान्य नागरिकांच्या जीवाला बसणार, यात शंका नाही.
