१२ सप्टेंबर रोजी प्रदर्शित झालेल्या सुबोध खानोलकर दिग्दर्शित ‘दशावतार’ सिनेमाने सहा दिवसांत 9.45 कोटींची कमाई केली आहे. बॉक्स ऑफिसवर सिनेमाची जोरदार कमाई सुरू असताना, ऑनलाईन लिक होणे चित्रपट टीमसाठी चिंतेचे कारण बनले आहे.
सिनेमात महत्त्वाची भूमिका साकारणारी अभिनेत्री प्रियदर्शिनी इंदलकरने चाहत्यांना विनंती केली आहे की, चित्रपटाची चोरुन काढलेली प्रत फोनवर डाऊनलोड करून पाहू नये. तिने सांगितले, “आपल्या ‘दशावतार’ चित्रपटाला रसिक प्रेक्षकांचा उदंड प्रतिसाद मिळतोय, पण काही लोक चित्रपटाची पायरेटेड प्रत पाहत आहेत. मराठी माणसांनी अशा चोरटेपणाला थारा देऊ नये. सिनेमाचा अनुभव चित्रपटगृहात जाऊन घ्यावा. स्वतःही पायरेटेड प्रिंट पाहू नये आणि इतरांनाही रोखावे.”
‘दशावतार’ सिनेमात दिलीप प्रभावळकर, महेश मांजरेकर, भरत जाधव, विजय केंकरे, सिद्धार्थ मेनन आणि प्रियदर्शिनी यांचा सहभाग आहे. सिनेमाचे शोज थिएटरमध्ये हाऊसफुल्ल सुरू असून प्रेक्षकांची उत्सुकता उंचावलेली आहे.
मराठी चित्रपटांच्या टिकाव आणि प्रगतीसाठी टीमने हा संदेश देत, प्रेक्षकांना सिनेमा थिएटरमध्ये अनुभवण्याचे आवाहन केले आहे.
