‘I Love Mohammad’ प्रकरणातील दाखल खटले मागे घेण्याची व अपमानास्पद वक्तव्यांवर कठोर कारवाई करण्याची मागणी
पातूर : शहरातील मुस्लिम समाजाने सामूहिकरित्या तहसीलदार मार्फत माननीय राष्ट्रपती श्रीमती द्रौपदी मुर्मू यांच्याकडे निवेदन सादर करून कानपूर येथे घडलेल्या “I Love Mohammad” पोस्टर प्रकरणातील दाखल खटले मागे घेण्याची मागणी केली आहे. यासोबतच पैगंबर मोहम्मद साहेब व इस्लाम धर्माविरोधात अपमानास्पद वक्तव्य करणाऱ्यांवर कठोर कारवाई करण्यात यावी, अशी मागणी करण्यात आली.
निवेदनातील मुख्य मुद्दे
निवेदनात नमूद करण्यात आलं की –
कानपूर येथे ईद मिलादुन्नबी निमित्त लावण्यात आलेले “I Love Mohammad” लिहिलेले पोस्टर/बॅनर हे पूर्णपणे धार्मिक श्रद्धा आणि आस्थेचं प्रतीक होतं.
या पोस्टरमागे कुणालाही दुखावण्याचा किंवा कायदा-सुव्यवस्था बिघडवण्याचा हेतू नव्हता.
या घटनेत कुठलीही जीवितहानी, तोडफोड किंवा हिंसाचार झालेला नाही.
तरीदेखील या प्रकरणात खटले दाखल करण्यात आले, ज्यामुळे अनेक निरपराध युवकांचं शैक्षणिक, सामाजिक व कौटुंबिक भविष्य धोक्यात येऊ शकतं.
भारताच्या संविधानाने प्रत्येक नागरिकाला धर्मस्वातंत्र्य व अभिव्यक्ती स्वातंत्र्य दिलं आहे. त्यामुळे “I Love Mohammad” म्हणणं हा गुन्हा मानला जाऊ नये.
अपमानास्पद वक्तव्यांवर कारवाईची मागणी
निवेदनात असंही नमूद करण्यात आलं की, काही असामाजिक प्रवृत्तींकडून पैगंबर मोहम्मद साहेब आणि इस्लाम धर्माविरोधात वारंवार अपमानास्पद वक्तव्यं केली जातात. त्यामुळे धार्मिक सौहार्द बिघडत असून समाजात तणाव निर्माण होतो. अशा वक्तव्य करणाऱ्यांविरोधात सरकारने कठोर कायदेशीर कारवाई करावी, अशी मागणी मुस्लिम समाजाने केली आहे.
निवेदन देताना उपस्थित
निवेदन देताना हाफिज मोहम्मद नसीब, हिदायत खान (इद्दू पहलवान), हाफिज आरिफ रजा, सैय्यद मुशब्बर, अनिक पटेल, मोहम्मद मेहताब, मोहम्मद दानियल, मोहम्मद आसिम, फरदीन खान, राहील इकबाल, सय्यद शाहबाज, सैय्यद अबूजर, मोहम्मद अशरान, अनस खान, सैय्यद जावेद यांच्यासह इत्तेहाद असोसिएशन पातूरचे अनेक युवक मोठ्या संख्येने उपस्थित होते.
मुस्लिम समाजाची भूमिका
मुस्लिम समाजाने निवेदनाद्वारे केंद्र सरकार व माननीय राष्ट्रपतींकडे हे प्रकरण संवेदनशीलतेने हाताळून, निर्दोषांवरील खटले मागे घेऊन आणि धर्माचा अपमान करणाऱ्यांवर कठोर कारवाई करून धार्मिक सौहार्द जपण्याचं आवाहन केलं आहे.
read also : https://ajinkyabharat.com/mig-21-retired/
