Strong Room सुरक्षा : राज्यभरात मतपेट्यांचे स्ट्राँग रुम बनले ‘किल्ले’! तीन शिफ्ट पहारा, कार्यकर्त्यांची शेकोट्यांवर रात्र… विरोधकांसह सत्ताधारी पक्षांचाही प्रशासनावर अविश्वास
राज्यात नगरपालिका आणि नगरपरिषदांच्या निवडणुकांचा दुसरा टप्पा २० डिसेंबर रोजी संपला आहे. मतदान प्रक्रिया पूर्ण झाल्यानंतर मतपेट्या आणि ईव्हीएम मशीन स्ट्राँग रुममध्ये ठेवण्यात आल्या असून, निकाल २१ डिसेंबर रोजी जाहीर होणार आहेत. मात्र यंदाचा माहोल पूर्णपणे वेगळा आहे कारण स्ट्राँग रूम बाहेर केवळ सरकारी सुरक्षा नाही, तर सर्वच राजकीय पक्षांचे कार्यकर्ते “जागते रहो” मोडमध्ये उतरले आहेत.
राज्यातील परिस्थिती अशी झाली आहे की सत्ताधारी नेते सुद्धा प्रशासनावर १०० टक्के विश्वास ठेवण्यास तयार नाहीत., विरोधक तर आधीपासूनच सतर्क आहेत. या पार्श्वभूमीवर मतमोजणीपर्यंत स्ट्राँग रूम म्हणजे सुरक्षेचा किल्ला बनला आहे—त्रिस्तरीय पोलिस सुरक्षा, SRPF, CCTV आणि तीन-तीन शिफ्टमध्ये पक्षकार्यकर्त्यांचा पहारा.
प्रशासनावर अविश्वास — सत्ताधारी शिंदे सेना आणि अजित पवार गट देखील पहाऱ्यावर!
या निवडणुकांमध्ये मतचोरी, तांत्रिक घोळ, ईव्हीएममध्ये फेरफार, CCTV बंद होणे अशा अनेक शंका विरोधकांकडून मांडल्या जात आहेत. पण यावेळी खास म्हणजे सत्ताधारी शिंदे सेना आणि अजित पवार यांच्या राष्ट्रवादीचे कार्यकर्तेही स्ट्राँग रूम बाहेर पहारा देत आहेत.
ही परिस्थिती राज्याच्या राजकारणातील अस्वस्थता आणि अविश्वासाची पातळी दाखवते.
धाराशिव : भूम आणि परंडा येथे तगडा तणाव
धाराशिव जिल्ह्यातील भूम नगरपालिका आणि परंडा नगरपालिका याठिकाणी प्रतिष्ठेच्या लढती झाल्या.
भूम नगरपालिका
शिंदे शिवसेनेच्या संयोगिता गाढवे
विरुद्ध भाजप–काँग्रेस–ठाकरे शिवसेना समर्थित सत्वशीला थोरात
या निवडणुकीत आमदार तानाजी सावंत आणि माजी आमदार राहुल मोटे यांची प्रतिष्ठा लागली आहे.
येथे स्ट्राँग रूमभोवती पोलिसांसह शिंदे सेनेचा कडेकोट पहारा पाहायला मिळत आहे.
परंडा नगरपालिका
शिंदे शिवसेनेचे जाकीर सौदागर
विरुद्ध माजी आमदार राहुल मोटे गटाचे विश्वजीत पाटील
शिंदे सेनेसाठी ही अत्यंत प्रतिष्ठेची लढाई असल्याने स्ट्राँग रूमभोवती २४ तास पहारा ठेवण्यात आला आहे.
परभणी : गंगाखेडमध्ये आजी–माजींचा संघर्ष टोकाला; CCTV बसवण्याची वेळ
परभणीतील गंगाखेड येथे वाद अक्षरशः चिघळला आहे.
आमदार रत्नाकर गुट्टे
विरुद्ध माजी आमदार मधुसूदन केंद्रे
या दोघांमधील तुफान आरोप–प्रत्यारोपांमुळे निवडणुकीपूर्वीच तणाव वाढला.
महत्वाचे म्हणजे मधुसूदन केंद्रे यांनी थेट दावा केला : “गंगाखेडचे प्रशासन आमदार गुट्टे यांच्या घरघड्यासारखे वागते, म्हणूनच मला CCTV बसवावे लागले.” यामुळे येथे स्ट्राँग रूमभोवती तणावपूर्ण वातावरण निर्माण झाले आहे.
जिंतूर : राष्ट्रवादीचे २४ तासांचा पहारा — “तंत्रज्ञानाच्या युगात कोणावर विश्वास नाही”
जिंतूर नगरपालिका निवडणुकीत भाजपा–राष्ट्रवादी–काँग्रेस अशी मोठी त्रिकोणी लढत आहे. येथे अजितदादांच्या राष्ट्रवादीचे उमेदवार नाईलाजाने २४ तास पहारा देत आहेत.
त्यांचे म्हणणे “तंत्रज्ञानाचे युग आहे. मशीनवर विश्वास नाही. नेत्यांवर विश्वास नाही. म्हणून आम्ही स्वतःच स्ट्राँग रूम बाहेर बसलोय.” प्रत्येक प्रभागातील प्रतिनिधी वेगवेगळ्या शिफ्टमध्ये पहारा देत आहेत.
गोंदिया : त्रिस्तरीय बंदोबस्त – ३७ SRPF व ३५ पोलिस जवान
गोंदिया जिल्ह्यातील पॉलिटेक्निक कॉलेज येथे स्ट्राँग रूम तयार करण्यात आला आहे.
सुरक्षेचा स्तर सर्वाधिक:
३७ SRPF जवान
३५ पोलिस
२४ तास CCTV
अनधिकृत प्रवेशावर संपूर्ण बंदी
दोन नगरपालिका + दोन नगरपंचायतीचे ईव्हीएम एकाच ठिकाणी
गोंदियातील प्रशासनाची तयारी सर्वाधिक सक्षम दिसून येते.
अमरावती : नांदगाव खंडेश्वरमध्ये “शेकोट्यांचा पहारा” – ठाकरे सेना जागते रहो
अमरावतीत नांदगाव खंडेश्वर येथे ठाकरे सेनेचे पदाधिकारी थंडीच्या रात्री शेकोट्या पेटवून स्ट्राँग रूम बाहेर बसले आहेत.
हे दृश्य सोशल मीडियावरही मोठ्या प्रमाणात व्हायरल झाले आहे.
याठिकाणी तीव्र त्रिकोणी लढत झाली असून, ठाकरे शिवसेना EVM सुरक्षिततेबाबत अत्यंत सतर्क आहे.
बीड : तीन शिफ्टमध्ये सतत पहारा — महाविकास आघाडी एकवटली
बीड नगरपरिषदेच्या निवडणुकांनंतर स्ट्राँग रूमवर महाविकास आघाडीने पंडाल टाकत २४ तास पहारा सुरू केला आहे.
पुरुष आणि महिला कार्यकर्ते ८–८ तासांच्या शिफ्टमध्ये
उमेदवार स्वतः पहारा देत
कार्यकर्त्यांचे म्हणणे :
“अनपेक्षित निकाल लागतात, म्हणून स्वतः पहारा देणे भाग आहे.”
धरणगाव : महिला उमेदवारांचा अनोखा उपक्रम – स्ट्राँग रूमबाहेर खिचडी बनवली
जळगावच्या धरणगाव येथे एक वेगळेच चित्र दिसले महिला उमेदवार आणि कार्यकर्त्यांनी पुरुष कार्यकर्त्यांसाठी खिचडी बनवली, पंगती घातली आणि स्ट्राँग रूमच्या बाहेरच सगळ्यांनी एकत्र जेवण केले.
निवडणूक लढाई, प्रचार यामध्ये जशी एकजूट दिसली, तशीच एकजूट स्ट्राँग रूम पहाऱ्यात देखील दिसून आली.
मुक्ताईनगर : संपूर्ण CCTV निगराणी — पण एरंडोलमध्ये कॅमेरा ‘अडीच तास बंद’
मुक्ताईनगरमध्ये:
२८ ईव्हीएम
SRPF + पोलिस + महसूल अधिकारी
बाहेर CCTV डिस्प्ले
२४ तास निगराणी
परंतु एरंडोलमध्ये गंभीर घटना घडली CCTV डिस्प्ले अडीच तास बंद राहिला! उमेदवारांनी जोरदार आक्षेप घेतला आणि तांत्रिक अडचण दूर केल्यानंतरच स्क्रीन पुन्हा सुरू करण्यात आला.
उमेदवारांनी तहसीलदारांकडे याबाबत लेखी तक्रार दिली आहे.
मोहोळ (सोलापूर) : ठाकरे सेनेला स्ट्राँग रूम बाहेर बसण्याची परवानगी नकार
मोहोळ नगरपरिषदेच्या निवडणुकीत ठाकरे शिवसेनेने स्ट्राँग रूमबाहेर २४ तास बसण्याची परवानगी मागितली होती.
परंतु प्रशासनाने परवानगी स्पष्टपणे नाकारली.
केवळ उमेदवार प्रतिनिधीला ठराविक वेळ देण्याची परवानगी
ठाकरे सेनेचा आरोप :
“भाजप वोट चोर पक्ष आहे, म्हणून आम्ही सतर्क आहोत.”
राज्यभर स्ट्राँग रूम ‘युद्धभूमी’, पहाऱ्याशिवाय राजकारणाचा विश्वास नाही
यावेळी नगरपालिका–नगरपरिषद निवडणुकांमध्ये जे चित्र दिसत आहे, ते अभूतपूर्व आहे. सत्ता–विरोधक दोघेही प्रशासनावर पूर्ण विश्वास ठेवायला तयार नाहीत.
२५ जिल्ह्यांमध्ये, १००हून अधिक स्ट्राँग रूम्समध्ये पोलिस सुरक्षा + SRPF + CCTV + २४ तास पहारा + तीन शिफ्टमध्ये कार्यकर्ते
= निवडणुका ‘युद्ध स्तरावर’ गेल्या आहेत.
यामुळे स्पष्ट होते की, राज्यातील राजकारणात विश्वासाचा अभाव मोठ्या प्रमाणात वाढला आहे. निकालानंतर कोणता राजकीय भूकंप होतो ते पाहणे मनोरंजक ठरणार आहे.
