गेल्या काही दिवसांपासून महाराष्ट्रात परतीच्या पावसाने धुमाकूळ घातला आहे. जळगाव, जालना, सोलापूर आणि नाशिक जिल्ह्यांमध्ये अतिवृष्टीमुळे शेतकऱ्यांचे प्रचंड नुकसान झाले असून जनजीवन विस्कळीत झाले आहे. हजारो हेक्टरवरील पिके पाण्याखाली गेली आहेत, तर काही ठिकाणी जनावरांचेही बळी गेले आहेत.

जळगाव : ७ हजार हेक्टर पिकांचे नुकसान

मुक्ताईनगर तालुक्यात अचानक झालेल्या मुसळधार पावसामुळे केळी, कापूस, सोयाबीन आणि मका पिके पाण्याखाली गेली. सुमारे ७ हजार हेक्टर शेतीचे नुकसान झाले असून ३५ गावे बाधित झाली आहेत. सरासरी ६७ मि.मी. पावसाची नोंद झाली आहे. आमदार चंद्रकांत पाटील यांनी मुख्यमंत्र्यांना नुकसानीची माहिती देऊन तातडीने पंचनाम्याचे आदेश दिले आहेत.

जालना : ९४ हजार हेक्टर क्षेत्रावर फटका

जिल्ह्यातील कपाशी, सोयाबीन आणि तूर पिकांचे सर्वाधिक नुकसान झाले आहे. तब्बल ९४ हजार हेक्टर क्षेत्र अतिवृष्टीमुळे बाधित झाले आहे. याशिवाय वीज पडून ५ जनावरे दगावली आहेत. पालकमंत्री पंकजा मुंडे यांनी नुकसानग्रस्त भागाची पाहणी करून तातडीने मदतकार्य सुरू करण्याचे आदेश दिले आहेत.

सोलापूर : चांदनी नदीला महापूर

बार्शी तालुक्याच्या उत्तर भागातील चांदनी नदीला आलेल्या महापुरामुळे मांडेगाव, कांदलगाव, देवगावसह ८ गावातील पिके पाण्याखाली गेली. दक्षिण सोलापुरातही उडीद, तूर, सोयाबीन आणि मूग ही पिके पाण्यात सडू लागली आहेत. शेतकऱ्यांचे अतोनात नुकसान झाल्याने पंचनामे करून भरपाईची मागणी होत आहे.

नाशिक : स्मार्ट सिटीच्या कामाचा फज्जा

अवघ्या काही मिनिटांच्या पावसामुळे वाघाडी नाल्यातून आलेल्या पाण्याने बाजारात उभ्या केलेल्या शेतकऱ्यांचे साहित्य वाहून गेले. त्यामुळे स्मार्ट सिटीच्या कामाच्या गुणवत्तेवर प्रश्नचिन्ह उपस्थित झाले आहे. अनेक शेतकरी अजूनही आपले साहित्य शोधत आहेत.

महाराष्ट्रातील या जिल्ह्यांमध्ये परतीच्या पावसामुळे शेतकरी मोठ्या संकटात सापडले आहेत. हातातोंडाशी आलेले खरीप पीक वाहून गेल्याने शेतकऱ्यांची चिंता वाढली आहे. प्रशासनाने तातडीने मदत व भरपाई द्यावी, अशी मागणी होत आहे.

read also :https://ajinkyabharat.com/shahrukh-khanchi-honari-soon/