इस्रायलचे येमेनवर हल्ले; साना अंधारात, तणाव वाढला
जगभरात सुरू असलेल्या अस्थिरतेच्या पार्श्वभूमीवर मध्यपूर्वेतील तणाव आणखी वाढला आहे. इस्रायलने रविवारी सकाळी येमेनची राजधानी साना येथे हौथी बंडखोरांविरोधात जोरदार हल्ला चढवला.
हे हल्ले हाझिझ पॉवर स्टेशनजवळ झाले असून, या वीज केंद्राचे मोठे नुकसान झाले आहे. परिणामी साना शहरातील वीजपुरवठा खंडित झाला आहे.
इस्रायलचे धोरणात्मक हल्ले
स्थानिक सूत्रांच्या माहितीनुसार, इस्रायलने गेल्या दोन वर्षांत हौथी बंडखोरांविरोधात अनेक कारवाया केल्या आहेत.
हिजबुल्लाह व हमासने आपले हल्ले आटोक्यात घेतले असताना, हौथी बंडखोर अद्याप सक्रिय आहेत. त्यामुळेच हा हल्ला करण्यात आला असल्याची चर्चा आहे.
हौथी बंडखोरांचा आरोप
हौथी राजकीय ब्युरोचे सदस्य हाझेम अल-असद यांनी आरोप केला की,
“इस्रायल आमच्या पायाभूत सुविधांना जाणूनबुजून लक्ष्य करत आहे. येमेनी नागरिकांनाही थेट टार्गेट केले जात आहे.”
गाझाच्या समर्थनार्थ हल्ले
येमेनकडून गेल्या काही आठवड्यांपासून लाल समुद्र व अरबी समुद्रातील इस्रायली जहाजांवर हल्ले केले जात आहेत.
हौथी दलाने स्पष्ट केले आहे की, गाझावरील इस्रायली आक्रमण थांबेपर्यंत हे ऑपरेशन्स सुरू राहतील. इस्रायलच्या ताज्या हल्ल्याला त्याचीच प्रतिक्रिया मानली जात आहे.
तणाव वाढण्याची शक्यता
याआधी अमेरिकेसह ब्रिटननेही हौथींवर हल्ले केले होते. आता इस्रायलने पुन्हा कारवाई केल्याने येमेन आणखी कडक पवित्रा घेऊ शकतो.
समुद्रमार्गावरील इस्रायली जहाजांना अडवण्याचे प्रयत्न वाढण्याची शक्यता व्यक्त केली जात आहे.
