मुंबई: महाराष्ट्रातील मराठा आरक्षणाच्या मुद्द्यावर राज्यात राजकीय वादंग सुरू आहे. छगन भुजबळ यांनी सरकारच्या निर्णयावर प्रश्न उपस्थित करत म्हटले की, “मराठा आरक्षणासंदर्भातील कोणताही जीआर मला दाखवला नाही.”
मराठा समाजाचे नेते मनोज जरांगे यांनी उपोषण करून मराठा आरक्षणाची मागणी केली होती. सरकारने त्यानंतर हैदराबाद गॅझेट जारी करून कुणबी प्रमाणपत्र देण्यास मंजुरी दिली. मात्र, छगन भुजबळ यांनी या प्रक्रियेमध्ये गटांमध्ये मतभेद निर्माण झाल्याचे सांगितले.
आजच्या मंत्रिमंडळ बैठकीत छगन भुजबळ यांनी पत्रकारांशी संवाद साधत म्हटले की, महात्मा फुले समता परिषदेच्या वतीने मुख्यमंत्र्यांना पाठवलेले पत्र सरकारने काळजीपूर्वक वाचले आहे, परंतु कुणबी-मराठा आरक्षणासंदर्भातील ऐतिहासिक माहितीच्या आधारावर हरकत मागवली गेली नाही. “कुणबी आणि मराठा हे दोन समाज वेगळे आहेत. मराठा समाजाला कुणबी दाखले देऊन ओबीसी प्रवर्गात समाविष्ट करणे अन्यायकारक आहे,” असे त्यांनी स्पष्ट केले.
उपमुख्यमंत्री एकनाथ शिंदे यांनी या विधानावर प्रतिक्रिया देत सांगितले की, “नव्या आदेशामुळे कोणत्याही समाजावर अन्याय होणार नाही. हैदराबाद गॅझेट लागू करून फक्त कुणबी प्रमाणपत्र मिळवण्याची प्रक्रिया सोपी करण्यात आली आहे. मुख्यमंत्री देवेंद्र फडणवीस, उपमुख्यमंत्री अजित पवार आणि छगन भुजबळ यांच्यासह चर्चा झाल्यानंतर हा निर्णय घेण्यात आला असून ओबीसी आरक्षणाला कोणताही धक्का बसणार नाही.”
या वादग्रस्त विधानामुळे मराठा आरक्षणाबाबत राजकीय चर्चा पुन्हा सुरु झाली आहे आणि उद्याच्या ओबीसी मंत्र्यांच्या बैठकीकडे सर्वांचे लक्ष लागले आहे.
READ ALSO :https://ajinkyabharat.com/eye-generated-porn-content-molestation-prohibition-prohibited/
