जुळ्या लेकींची हत्या : पती-पत्नीतील वादानंतर वडिलांनीच केली दोन चिमुकल्यांची निर्घृण हत्या, महाराष्ट्र हादरला
बुलढाणा जिल्ह्यातील अंढेरा पोलीस ठाण्याच्या हद्दीत एक अत्यंत हृदयद्रावक आणि हादरवून टाकणारी घटना घडली आहे. पती-पत्नीतील वाद इतका टोकाला पोहोचला की एका रागाच्या भरात वडिलांनी स्वतःच्या अडीच वर्षांच्या दोन जुळ्या मुलींचा गळा कापून खून केला. या घटनेने संपूर्ण महाराष्ट्राला हादरवून सोडले आहे.
मिळालेल्या माहितीनुसार, वाशिम जिल्ह्यातील रुई गावचा रहिवासी राहुल चव्हाण हा पुण्यातील एका खासगी कंपनीत नोकरी करतो. काही दिवसांपूर्वी तो आपल्या पत्नी आणि दोन मुलींना घेऊन घरच्या दिशेने कारने प्रवास करत होता. प्रवासादरम्यान पती-पत्नीमध्ये काही कारणावरून वाद झाला. या वादामुळे पत्नीने संतापून माहेरी जाण्याचा निर्णय घेतला, तर राहुल आपल्या मुलींसह पुढे निघाला.
परंतु रागाच्या भरात राहुलने अंढेरा फाटा (खामगाव-जालना मार्ग) जवळील जंगल परिसरात थांबून अत्यंत निर्घृणपणे आपल्या दोन निरागस जुळ्या मुलींची हत्या केली. मुलींच्या गळ्यावर धारदार शस्त्राने वार केल्याने त्यांचा जागीच मृत्यू झाला. या घटनेनंतर काही वेळातच राहुलने स्वतः वाशिम शहर पोलीस ठाण्यात जाऊन गुन्ह्याची कबुली दिली.
वाशिम पोलिसांनी तात्काळ अंढेरा पोलिसांना माहिती दिल्यानंतर घटनास्थळी पोलीस पथक दाखल झाले आणि मृत चिमुकल्यांचे मृतदेह ताब्यात घेतले. या दुर्दैवी घटनेने परिसरात हळहळ आणि संतापाचे वातावरण निर्माण झाले आहे. आरोपी राहुल चव्हाणला पोलिसांनी अटक केली असून पुढील चौकशी सुरू आहे.
या घटनेने पुन्हा एकदा प्रश्न निर्माण केला आहे की कौटुंबिक वाद आणि मानसिक तणावामुळे किती निर्दोष जीवांचे बळी जात आहेत. समाजाने आणि प्रशासनाने अशा घटनांवर आळा घालण्यासाठी तातडीने उपाययोजना करण्याची गरज आहे.जुळ्या लेकींची हत्या
