आयुष उर्फ गोविंद कोमकरच्या हत्येने पुणे हादरले आहे. या हत्येपूर्वी काय घडले याचा तपशील आयुषच्या आई कल्याणी कोमकर यांनी उघड केला. मुलाच्या मृत्यूच्या क्षणाचे वर्णन करताना कल्याणी ढसाढसा रडल्या.कल्याणी कोमकरच्या म्हणण्यानुसार, हत्येच्या मागे त्यांचे वडील आणि आयुषचे आजोबा बंडू आंदेकर असल्याचा आरोप आहे. “पोलिसांनी अंबेगावमध्ये मिळालेल्या टिपीवरही तत्पर कारवाई का केली नाही?” असा प्रश्न त्यांनी उपस्थित केला.गणेशोत्सवाच्या पार्श्वभूमीवर, शुक्रवारी आयुष लहान भावाला क्लासला सोडून, डॉक्टरांकडे गेला आणि घरी येताना आईशी फोनवर संवाद साधला. त्यानंतर तो बिल्डींगच्या पार्किंगमध्ये पोहोचला, गाडी पार्क केली आणि मागे वळल्यावर हल्लेखोरांनी गोळ्या झाडल्या. पहिली गोळी थेट मानेत लागली आणि त्याचा लहान भाऊ हा दृश्य पाहत होता.कल्याणी कोमकर म्हणाल्या, “मुलगा मदतीसाठी ओरडत होता, पण कोणी पुढे आलं नाही. पाऊण तासांनी पोलीस आले आणि त्याला हॉस्पिटलमध्ये नेलं, जिथे मृत घोषित करण्यात आलं.”त्यानंतर कल्याणी यांनी पोलिसांवर गंभीर आरोप केला, “आमच्या तक्रारीनुसार फिर्याद नोंदवली, पण पोलीस टाळाटाळ करत आहेत. माझ्या मुलाला न्याय द्या. बाकी मुलांच्या जीवाला धोका आहे. आम्ही जीव मुठीत घेवून जगत आहोत.”कल्याणी कोमकर यांनी हत्येतील मुख्य आरोपींचा तपशीलही दिला आणि न्यायासाठी तसेच पोलिसांकडून कठोर कारवाईची मागणी केली आहे.ही घटना पुण्यातील नागरिकांसाठी धक्का ठरली असून, पोलिस आणि प्रशासनाकडून त्वरीत कारवाईची अपेक्षा व्यक्त केली जात आहे.