बुलढाण्यात हृदयद्रावक घटना! कन्यादान करतानाच वधूपित्याचा मृत्यू; आनंदी लग्नसोहळ्यावर शोककळा
बुलढाणा : सनई-चौघड्यांचे सूर, मंगलाष्टकांचे स्वर, डीजेच्या तालावर थिरकणारे वऱ्हाडी आणि आनंदाने उजळलेलं घर… लेकीच्या लग्नासाठी प्रत्येक बाप ज्या क्षणाची स्वप्नं पाहतो, तोच क्षण बुलढाणा जिल्ह्यातील एका कुटुंबासाठी आयुष्यभराची वेदना ठरला. कन्यादानाचा विधी सुरू असतानाच वधूपित्याचा हृदयविकाराच्या झटक्याने मृत्यू झाल्याने संपूर्ण लग्नमंडपात शोककळा पसरली. ही अत्यंत दुर्दैवी घटना सिंदखेड राजा तालुक्यातील वरदडी बुद्रुक येथे घडली.
कुरुमदास पुंडलिक भुतेकर (वय 50) असे मृत वधूपित्याचे नाव असून, त्यांच्या निधनाने संपूर्ण गाव हळहळ व्यक्त करत आहे. मुलगी नंदिनी हिचा विवाह जालना जिल्ह्यातील मंठा तालुक्यातील आर्डा (तोलाजी) येथील प्रदीप महादेव नानोटे यांच्यासोबत निश्चित झाला होता. अनेक दिवसांपासून भुतेकर कुटुंबात लग्नाची लगबग सुरू होती. आपल्या लाडक्या लेकीचं लग्न अविस्मरणीय व्हावं यासाठी कुरुमदास भुतेकर स्वतः प्रत्येक तयारीत पुढाकार घेत होते.
घराघरात जाऊन दिलं होतं निमंत्रण
मुलीच्या लग्नासाठी त्यांनी नातेवाईक, मित्रपरिवार आणि गावकऱ्यांना स्वतः घरी जाऊन आग्रहाचं निमंत्रण दिलं होतं. लग्नाच्या दिवशी सकाळपासून घरात उत्साहाचं वातावरण होतं. वऱ्हाडी मंडळी, नातेवाईक, मित्रपरिवार यांच्या उपस्थितीत विवाहसोहळा अत्यंत आनंदात पार पडला. मंगलाष्टकांच्या गजरात नवदाम्पत्य विवाहबंधनात अडकले आणि उपस्थितांनी टाळ्यांच्या गजरात शुभेच्छांचा वर्षाव केला.
Related News
साखर निर्यातीवर केंद्राची मोठी बंदी; महागाई रोखण्यासाठी सरकारचा निर्णायक मास्टरस्ट्रोक
रिक्षा-टॅक्सी अन् बस प्रवास महागणार? मुंबईत CNG दरात ₹2 वाढ, लाखो प्रवाशांच्या खिशाला फटका
महागाईचा स्फोट! एप्रिलमध्ये WPI 8.30% वर, पेट्रोल-भाजीपाल्याच्या दरवाढीचा मोठा इशारा
मोदींनी तातडीने सर्वपक्षीय बैठक बोलवावी; राहुल गांधींबाबत मुख्यमंत्र्यांची भाषा अयोग्य, शरद पवारांचा जोरदार हल्लाबोल
Cannes 2026 : मराठी अभिनेता पुष्कर जोगचा कान्सच्या रेड कार्पेटवर दमदार जलवा; ‘महाराष्ट्राचं प्रतिनिधित्व करणं अभिमानाची भावना’
कर्जमाफीची तारीख जवळ! ‘Agristack’ KYC नाही केली तर अडकू शकतो लाभ;
मर्सिडिझ-मेबॅक ते लँड क्रुझर; पंतप्रधान मोदींच्या ताफ्यातील 24 गाड्यांचं अभेद्य सुरक्षा कवच
कोयना धरणातील भीषण बोट दुर्घटना! वादळी वाऱ्यामुळे बोट उलटली, बोटचालक बेपत्ता; मुंबईच्या पर्यटकांचा थरारक बचाव
शहनाज गिल-देवदत्त पडिक्कल डेटिंग चर्चा; व्हायरल व्हिडिओमुळे सोशल मीडियावर खळबळ
71 वर्षीय अशोक बहार पुन्हा NEET परीक्षेला सज्ज; पेपरफुटीनंतरही डॉक्टर होण्याचं प्रेरणादायी स्वप्न कायम
बालेन शाहांचा भारताला आणखी एक धक्का! सीमावर्ती व्यापारावर मोठं संकट
दुपारपर्यंत सर्व कार्यक्रम सुरळीत पार पडले. मात्र सायंकाळी पाच वाजेच्या सुमारास वधूची पाठवणी करण्यापूर्वीचा सर्वात भावनिक क्षण असलेला कन्यादान विधी सुरू झाला आणि याच वेळी काळाने घाला घातला.
कन्यादान करताना अचानक कोसळले
कन्यादान विधी सुरू असताना कुरुमदास भुतेकर यांच्या छातीत अचानक तीव्र वेदना सुरू झाल्या. काही क्षणातच ते जागीच कोसळले. सुरुवातीला उपस्थितांना काय घडलं हे समजलं नाही. मात्र काही क्षणांतच त्यांना हृदयविकाराचा झटका आल्याचं स्पष्ट झालं. उपस्थितांनी तातडीने मदतीचा प्रयत्न केला, मात्र तोपर्यंत उशीर झाला होता.
क्षणात आनंदाचं वातावरण दुःखात बदललं. नववधू नंदिनी, वर आणि दोन्ही कुटुंबीयांवर दुःखाचा डोंगर कोसळला. लग्नमंडपात काही वेळापूर्वी सुरू असलेला आनंद अचानक शांततेत बदलला.
चार महिन्यांपूर्वीच झाली होती बायपास शस्त्रक्रिया
मिळालेल्या माहितीनुसार, कुरुमदास भुतेकर यांना यापूर्वी हृदयविकाराचा त्रास होता. डिसेंबर महिन्यात त्यांना हृदयविकाराचा झटका आला होता. त्यानंतर त्यांच्यावर बायपास शस्त्रक्रिया करण्यात आली होती. विशेष म्हणजे, काही महिन्यांपूर्वीच त्यांच्या आईचं निधन झालं होतं. त्या दुःखातून कुटुंब सावरत असतानाच आता आणखी एक मोठा आघात झाला.
याच वर्षी 21 एप्रिल रोजी त्यांच्या मुलगा विशालचा विवाह पार पडला होता. त्यानंतर अवघ्या काही दिवसांत मुलगी नंदिनीचं लग्न आयोजित करण्यात आलं होतं. दोन्ही मुलांची लग्नं आनंदात पार पडावीत, अशी त्यांची इच्छा होती. मात्र मुलीचं कन्यादान करतानाच त्यांचा जीवनप्रवास संपला.
गावात शोककळा
या घटनेची माहिती परिसरात पसरताच गावात हळहळ व्यक्त करण्यात आली. भुतेकर कुटुंब सामाजिक आणि सर्वांशी जिव्हाळ्याचं नातं ठेवणारं कुटुंब म्हणून ओळखलं जात होतं. त्यामुळे त्यांच्या निधनाने गावकऱ्यांनाही मोठा धक्का बसला आहे.
गुरुवारी शोकाकुल वातावरणात त्यांच्यावर अंत्यसंस्कार करण्यात आले. त्यांच्या पश्चात पत्नी, एक मुलगा, दोन मुली, सुना, नातवंडे आणि दोन भाऊ असा मोठा परिवार आहे.
भावनिक क्षणाने डोळे पाणावले
लेकीच्या संसाराची स्वप्नं पाहणारा बाप कन्यादान करतानाच कायमचा निघून गेल्याने उपस्थित अनेकांच्या डोळ्यात अश्रू आले. सोशल मीडियावरही या घटनेबद्दल शोक व्यक्त केला जात आहे. अनेकांनी “लेकीच्या आनंदासाठी आयुष्यभर झटणारा बाप शेवटच्या क्षणापर्यंत तिच्यासोबत होता,” अशा भावनिक प्रतिक्रिया दिल्या आहेत.
ही घटना पुन्हा एकदा सांगून जाते की आयुष्य किती अनिश्चित आहे. आनंदाच्या क्षणातही काळ कोणत्या रूपात समोर येईल, हे सांगता येत नाही.
