ATM मध्ये पैसेच निघेनात… भर उन्हात लोकांच्या रांगा; महाराष्ट्रातील ‘या’ जिल्ह्यात नागरिक त्रस्त
लातूर | प्रतिनिधी
राज्यातील काही भागांमध्ये सध्या एटीएममधील चलन तुटवड्याची गंभीर समस्या निर्माण झाली असून, लातूर आणि परभणी जिल्ह्यातील नागरिकांना मोठ्या अडचणींचा सामना करावा लागत आहे. अनेक एटीएममध्ये पैसे नसल्याने नागरिकांना एका एटीएममधून दुसऱ्या एटीएमपर्यंत फिरावे लागत आहे. विशेष म्हणजे लग्नसराईच्या काळातच ही समस्या निर्माण झाल्याने नागरिकांचा संताप वाढताना दिसत आहे.
लातूर जिल्ह्यातील अनेक एटीएम सध्या बंद अवस्थेत असून, “No Cash” चे बोर्ड झळकत आहेत. अनेक नागरिकांनी सकाळपासून विविध एटीएम केंद्रांवर फेऱ्या मारल्या, मात्र बहुतांश ठिकाणी पैसे उपलब्ध नसल्याचे चित्र पाहायला मिळाले. काही ठिकाणी एटीएम सुरू असले तरी तिथे मोठ्या प्रमाणात गर्दी होत आहे. भर उन्हात महिलांसह ज्येष्ठ नागरिकांना रांगेत उभे राहावे लागत असल्याने नागरिक त्रस्त झाले आहेत.
Related News
IAS तुकाराम मुंढेंचा मोठा निर्णय! शाळांच्या 50 मीटर परिसरात वडापाव, समोसा, बर्गरवर बंदी
Cabinet Decisions : मोठी बातमी! महाराष्ट्र सरकारचे 7 मोठे निर्णय; ग्रामपंचायतीपासून न्यायालयांपर्यंत मोठ्या घोषणा
मोठी बातमी! जंतर-मंतर लाठीचार्ज प्रकरणी सुप्रीम कोर्टाचा मोठा आदेश; महाराष्ट्रासह 8 राज्यांना नोटीस
अभिजीत दिपके यांच्या घरी मंत्री संजय शिरसाटांची एन्ट्री; म्हणाले- “अगोदरच यायचं होतं पण…”
लाडकी बहिण योजनेबाबत मोठी बातमी! ई-केवायसीसाठी मिळणार 6 महिन्यांची मुदत
एका नागरिकाने प्रतिक्रिया देताना सांगितले की, “आज सकाळपासून पाच एटीएम तपासले, पण कुठेही पैसे मिळाले नाहीत. बँकेत गेल्यावर तिथेही कॅश कमी असल्याचे सांगण्यात आले. अकाउंटमध्ये पैसे असूनही आम्हाला स्वतःचे पैसे मिळत नाहीत, ही अत्यंत गंभीर बाब आहे.”
दरम्यान, परभणी जिल्ह्यातही अशीच परिस्थिती निर्माण झाली आहे. कॅश उपलब्ध नसल्यामुळे अनेक बँकांनी आपली एटीएम सेवा तात्पुरती बंद ठेवली आहे. काही मोजक्याच एटीएममध्ये पैसे उपलब्ध असल्याने त्या ठिकाणी नागरिकांची मोठी गर्दी होत आहे. काही ठिकाणी केवळ 100 रुपयांच्या नोटाच उपलब्ध असल्याच्या तक्रारीही समोर येत आहेत.
या कॅश टंचाईचा परिणाम छोट्या व्यावसायिकांवर आणि दैनंदिन व्यवहारांवर मोठ्या प्रमाणात होत आहे. ग्रामीण भागातील अनेक नागरिक अजूनही रोख व्यवहारांवर अवलंबून असल्याने त्यांना अधिक अडचणींचा सामना करावा लागत आहे. किराणा दुकाने, छोटे व्यापारी, भाजी विक्रेते तसेच लग्नसमारंभाचे व्यवहार यावरही या परिस्थितीचा परिणाम जाणवत आहे.
विशेष म्हणजे, एटीएममध्ये पैसे नसल्याने अनेक नागरिक बँकांमध्ये गर्दी करत आहेत. त्यामुळे बँक कर्मचाऱ्यांवरही अतिरिक्त ताण निर्माण झाला आहे. काही ठिकाणी ग्राहक आणि कर्मचाऱ्यांमध्ये वाद झाल्याच्याही घटना समोर आल्या आहेत.
नागरिकांनी प्रशासन आणि संबंधित बँकांकडे तातडीने कॅश उपलब्ध करून देण्याची मागणी केली आहे. “आमच्या खात्यात पैसे आहेत, पण गरजेच्या वेळी तेच पैसे मिळत नसतील तर बँकिंग व्यवस्थेचा काय उपयोग?” असा सवाल नागरिकांकडून उपस्थित केला जात आहे.
दरम्यान, बँक अधिकाऱ्यांकडून कॅश पुरवठा सुरळीत करण्याचे प्रयत्न सुरू असल्याचे सांगण्यात येत आहे. पुढील काही दिवसांत परिस्थिती पूर्ववत होईल, असा दावा संबंधित अधिकाऱ्यांनी केला आहे. मात्र सध्या तरी नागरिकांना मनस्ताप सहन करावा लागत आहे.
उन्हाळ्याची तीव्रता, लग्नसराईचा हंगाम आणि अचानक वाढलेली रोख पैशांची मागणी यामुळे हा तुटवडा निर्माण झाल्याचे प्राथमिक कारण सांगितले जात आहे. मात्र नागरिकांनी तातडीने उपाययोजना करण्याची मागणी प्रशासनाकडे केली आहे.
