‘लाडकी बहीण’नंतर आता ‘लाडकी विहीण योजना’ रंगभूमीवर; हास्याची खास मेजवानी लवकरच

मराठी रंगभूमीवर पुन्हा एकदा खळखळून हसवणारी, दैनंदिन आयुष्यातील गंमती-जमतींना हलक्याफुलक्या शैलीत रंगवणारी नवी कलाकृती प्रेक्षकांच्या भेटीला येत आहे. शासनाच्या ‘लाडकी बहीण’ योजनेनंतर सोशल मीडियावर चर्चेत आलेली ‘लाडकी विहीण योजना’ ही मात्र कोणतीही शासकीय योजना नसून शुद्ध मनोरंजनाची खास मेजवानी आहे. सुप्रसिद्ध अभिनेत्री निर्मिती सावंत यांच्या पुढाकारातून साकारत असलेले हे नाटक रसिकांना ताणतणावातून विरंगुळा देण्याचे आश्वासन देते.

नावात योजना, पण उद्देश फक्त मनोरंजन

‘लाडकी विहीण योजना’ या नावात ‘योजना’ असली तरी यात कोणत्याही कागदपत्रांची, अर्जांची किंवा अटी-शर्तींची गरज नाही. ही योजना थेट प्रेक्षकांच्या चेहऱ्यावर हास्य फुलवण्यासाठी आहे. कौटुंबिक नातेसंबंध, विहीण-भावजयीतील नाजूक संवाद, घरगुती राजकारण, आणि मराठी कुटुंबातील गमती-जमती यांचे जिवंत चित्रण या नाटकातून पाहायला मिळणार आहे. हलक्या फुलक्या शैलीत वास्तवावर भाष्य करत प्रेक्षकांना दोन-अडीच तासांची निखळ करमणूक देण्याचा प्रयत्न या नाटकातून करण्यात आला आहे.

दमदार टीमची साथ

या नाटकाची निर्मिती अष्टविनायक आणि पंचशील एण्टरटेन्मेंट यांनी संयुक्तपणे केली आहे. लेखन प्रथमेश शिवलकर यांचे असून दिग्दर्शन राजेश देशपांडे यांनी केले आहे. संगीताची धुरा अजित परब यांनी सांभाळली आहे, तर गीतलेखन क्षितीज पटवर्धन यांचे आहे. नेपथ्य प्रदीप मुळ्ये, प्रकाशयोजना सुनील जाधव, वेशभूषा पूर्णिमा ओक आणि रंगभूषा मदन गायकवाड यांनी केली आहे. सूत्रसंचालन प्रणित बोडके करणार आहेत.

कलाकारांचा उत्साह

या नाटकात निर्मिती सावंत यांच्यासोबत प्रसाद ओक, स्वप्नील जोशी, स्नेहा रायकर, पूर्णिमा अहिरे-केंडे, अधोक्षज कऱ्हाडे, सुनील जाधव आणि मुकेश जाधव आदी कलाकार झळकणार आहेत. पत्रकार परिषदेत बोलताना प्रसाद ओक यांनी सांगितले की, “योग्य संधीची वाट पाहत होतो. या नाटकाची संहिता वाचल्यावर ती रंगभूमीवर नक्कीच वर्क होईल, याची खात्री पटली.”

स्वप्नील जोशी यांनीही या उपक्रमात सहभागी होताना समाधान व्यक्त केले. “अष्टविनायक संस्थेशी जोडले जाणे ही अभिमानाची बाब आहे. दर्जेदार आणि सकस निर्मिती हीच आमची ओळख आहे,” असे ते म्हणाले. निर्माते दिलीप जाधव यांनी या नाटकाचे 150 हून अधिक प्रयोग होतील, असा आत्मविश्वास व्यक्त केला.

निर्मिती सावंत यांची ‘माहेरी’ परतफेड

प्रयोगांचे वेळापत्रक

‘लाडकी विहीण योजना’चे शुभारंभाचे प्रयोग पुढीलप्रमाणे होणार आहेत—

• 5 मार्च, दुपारी 4 वा. – प्रबोधनकार ठाकरे नाट्यगृह

• 6 मार्च, दुपारी 4 वा. – दीनानाथ नाट्यगृह

• 7 मार्च, दुपारी 4 वा. – यशवंत नाट्य मंदिर

• 8 मार्च, दुपारी 1 वा. – यशवंतराव चव्हाण नाट्यगृह

रसिकांसाठी खास ‘मनोरंजन योजना’

‘लाडकी विहीण योजना’ ही केवळ नावीन्यपूर्ण शीर्षक असलेली कलाकृती नसून, आजच्या धावपळीच्या जीवनात हसण्याचा आणि कुटुंबासह वेळ घालवण्याचा बहाणा आहे. शासनाच्या योजनांप्रमाणे लाभार्थी निवडले जाणार नसले, तरी या योजनेचा लाभ घेणारा प्रत्येक प्रेक्षक हास्याचा लाभार्थी ठरणार आहे.