मुंबई – पंतप्रधान नरेंद्र मोदी यांचा येत्या १७ सप्टेंबर रोजी ७५ वा वाढदिवस साजरा केला जाणार आहे. या पवित्र दिवशी, पंतप्रधान मोदींना सन्मान देण्यासाठी महाराष्ट्र एसटी महामंडळाने मोठा उपक्रम जाहीर केला आहे. परिवहन मंत्री आणि एसटी महामंडळाचे अध्यक्ष प्रताप सरनाईक यांनी सांगितले की, प्रमुख ७५ एसटी बसस्थानकांवर मोफत वाचनालय सुरू करण्यात येणार आहे.
या विशेष वाचनालयामध्ये मराठी भाषेतील प्रसिद्ध साहित्यिकांच्या पुस्तके, कविता संग्रह, कादंबऱ्या आणि स्पर्धा परीक्षांकरिता मौलिक संदर्भ ग्रंथ उपलब्ध राहणार आहेत. वि.स. खांडेकर, वि.वा. शिरवाडकर (कुसुमाग्रज), पु.ल. देशपांडे, नामदेवराव ढसाळ, भालचंद्र नेमाडे, शंकर पाटील अशा प्रथितयश साहित्यिकांचे साहित्य नागरिक मोफत वाचनासाठी घेऊ शकतील.
परिवहन मंत्री सरनाईक म्हणाले,
“विद्यमान खासदार श्रीकांत शिंदे व भारतीय जनता पक्षाचे ज्येष्ठ नेते विनय सहस्रबुद्धे यांच्या संकल्पनेतून पंतप्रधान नरेंद्र मोदी यांच्या ७५ व्या वाढदिवसाच्या निमित्ताने हा अनमोल उपक्रम राबवला जात आहे. बसस्थानकांवर “वाचन कट्टा” निर्माण करून सामान्य नागरिकांना साहित्यप्रेमाचा आनंद घेण्याची संधी देत आहोत.”
या मोफत वाचनालयामध्ये स्थानिक वृत्तपत्रे देखील दररोज उपलब्ध राहतील. वाचनालयातून पुस्तके बाहेर नेऊन वाचन करून परत आणण्याची व्यवस्था करण्यात येणार आहे. शिवाय, स्पर्धा परीक्षांची तयारी करणाऱ्या विद्यार्थ्यांसाठी विविध संदर्भ ग्रंथही मोफत उपलब्ध करण्यात येणार आहेत.
उपमुख्यमंत्री एकनाथ शिंदे यांच्या निर्देशानुसार महाराष्ट्रात लोकाभिमुख उपक्रम राबवले जात असून, या वाचनालयाचा उद्देश मराठी भाषेच्या समृद्ध वारशाचा प्रसार व संवर्धन करणे आहे.
सरकारने दिलेले आश्वासन –
परिवहन मंत्री प्रताप सरनाईक यांनी स्पष्ट केले की,
“ही सेवा पूर्णपणे मोफत असून जनतेसाठी आम्ही अनमोल भेट म्हणून देत आहोत. त्यामुळे मराठी भाषेची समृद्ध परंपरा कायम राहील आणि समाजातील शैक्षणिक स्थितीही वृद्धिंगत होईल.”
read also :https://ajinkyabharat.com/beedchaya-upasarpanan-sangitle-dhakkadayak-truth/
